រាជធានីភ្នំពេញ ៖ នៅទីបំផុតនោះ ស្ត្រីរងគ្រោះដែលបានប្តឹងអតីតម្តាយក្មេក និងប្អូនថ្លៃស្រីប្រើហិង្សាលើខ្លួន ក៏សម្រេចដកពាក្យបណ្តឹងវិញ ក្រោយពីភាគីទាំង២បានធ្វើការព្រមព្រៀងគ្នា និងគិតថា ធ្លាប់រស់នៅក្នុងរង្វង់គ្រួសារជាមួយគ្នាពេលកន្លងមក ។…
រាជធានីភ្នំពេញ ៖ នៅទីបំផុតនោះ ស្ត្រីរងគ្រោះដែលបានប្តឹងអតីតម្តាយក្មេក និងប្អូនថ្លៃស្រីប្រើហិង្សាលើខ្លួន ក៏សម្រេចដកពាក្យបណ្តឹងវិញ ក្រោយពីភាគីទាំង២បានធ្វើការព្រមព្រៀងគ្នា និងគិតថា ធ្លាប់រស់នៅក្នុងរង្វង់គ្រួសារជាមួយគ្នាពេលកន្លងមក ។ សូមរំលឹកថា ៖ ដាក់បញ្ជាទៅនគរបាលខណ្ឌប្ញស្សីកែវស្រាវជ្រាវជាបន្ទាន់ រឿងអតីតម្តាយក្មេកព្រួតគ្នាវាយកូនប្រសាស្រី
យោងតាមផេកស្នងការរាជធានីភ្នំពេញបានឱ្យដឹងថា ស្ត្រីរងគ្រោះដែលប្តឹងអតីតម្តាយក្មេក និងប្អូនថ្លៃស្រី នៅក្នុងសង្កាត់ប្ញស្សីកែវ ខណ្ឌប្ញស្សីកែវ ជុំវិញការប្រើអំពើហិង្សាលើខ្លួន ភាគីទាំងពីរបានព្រមព្រៀងគ្នាសម្រេចដកពាក្យបណ្តឹង ក្រោយសមត្ថកិច្ចប៉ុស្តិ៍នគរបាលរដ្ឋបាលប្ញស្សីកែវ បានកោះហៅអតីតម្តាយក្មេក និងអតីតប្អូនថ្លៃមកសាកសួរ ។
ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានបំភ្លឺជូនសាធារណៈជនថា ករណីស្ត្រីម្នាក់ឈ្មោះ ចាន់ រតនា អាយុ២៣ឆ្នាំ ប្រកបមុខរបរនៅផ្ទះ រស់នៅភួមិបឹងសាឡាង សង្កាត់ប្ញស្សីកែវ ខណ្ឌប្ញស្សីកែវ រាជធានីភ្នំពេញ ដែលបានសំណូមពរតាមបណ្តាញសារព័ត៌មាន ស្នើសុំឱ្យ ឯកឧត្តម ឧត្តមសេនីយ៍ទោ ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ជួយអន្តរាគមន៍ ពាក់ព័ន្ធនឹងករណី មានស្ត្រី០២ ដែលជាអតីតម្តាយក្មេកឈ្មោះ ញ៉ុង សុភាព អាយុ៥៩ឆ្នាំ និងស្ត្រីជាអតីតប្អូនថ្លៃមានឈ្មោះ ទ្រុយ ចន្ទ្រា អាយុ២៥ឆ្នាំ បានសម្រុកចូលដល់ក្នុងផ្ទះជួលរបស់នាងនឹងព្រួតគ្នាវ៉ៃយ៉ាងអនាធិបតេយ្យ ក្នុងសង្កាត់ប្ញស្សីកែវ បង្កឱ្យរងរបួសនៅលើផ្ទៃមុខ ខណៈដែលអតីតម្តាយក្មេកនិងប្អូនថ្លៃស្រី បានមកផ្ទះនាងក្នុងបំណងយកកូននាង ទៅនៅជាមួយពួកគេ តែនាងជនរងគ្រោះមិនព្រម ក៏មានការវាយប្រតាយប្រតប់គ្នាតែម្តង នៅក្នុងហេតុការណ៍កើតឡើងថ្ងៃទី០៤ ខែកញ្ញា ឆ្នាំ២០២៣ កន្លងទៅ
នេះ។
ក្រោយពីទទួលព័ត៌មាននេះភ្លាម ឯកឧត្តមស្នងការក៏បានដាក់បទបញ្ជាទៅលោកវរសេនីយ៍ឯក ហ៊ាង ថារ៉េត អធិការនៃអធិការដ្ឋាននគរបាលខណ្ឌប្ញស្សីកែវ ដើម្បីស្រាវជ្រាវជាបន្ទាន់។ បន្ទាប់មកប៉ុស្តិ៍នគរបាលរដ្ឋបាលប្ញស្សីកែវ ក៏បានចេញលិខិតកោះហៅស្ត្រីជាប្អូនថ្លៃដែលជាជនបង្ក ដើម្បីចូលខ្លួនមកបំភ្លឺជុំវិញករណីហិង្សានេះ នៅប៉ុស្តិ៍នគរបាលរដ្ឋបាលប្ញស្សីកែវ ខណ្ឌប្ញស្សីកែវ នារសៀលថ្ងៃទី០៨ ខែកញ្ញា ឆ្នាំ២០២៣ បន្ទាប់ពីស្ត្រីរងគ្រោះបានដាក់ពាក្យបណ្តឹងនៅប៉ុស្តិ៍នគរបាលរដ្ឋបាលប្ញស្សីកែវ ។
នៅពេលដែលមន្ត្រីប៉ុស្តិ៍នគរបាលរដ្ឋបាលប្ញស្សីកែវ កោះហៅភាគីទាំងពីរមកជួបដោះស្រាយទល់មុខគ្នានៅរសៀលថ្ងៃទី០៨ ខែកញ្ញា ឆ្នាំ២០២៣ ពួកគាត់ទាំងពីរភាគីមានវត្តមានម្តាយបង្កើតស្ត្រីរងគ្រោះ ស្ត្រីរងគ្រោះ និងវត្តមានអតីតម្តាយក្មេក និងអតីតប្អូនថ្លៃស្រី ខណៈនោះស្ត្រីជាប្អូនថ្លៃហើយជាជនបង្ក ក៏បានសុំទោសទទួលកំហុសដែលបានប្រព្រឹត្តអំពើហិង្សាទៅលើអតីតបងស្រីថ្លៃ បន្ទាប់មកភាគីទាំងពីរបានសម្របសម្រួលព្រមព្រៀងគ្នាលើហេតុផលថាធ្លាប់រស់នៅក្នុងរង្វង់គ្រួសារជាមួយគ្នាកន្លងមក។
ក្នុងនោះ ក៏មានការឯកភាពពីលោកហេង ផេង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានឱ្យសមត្ថកិច្ចធ្វើកិច្ចសន្យាអប់រំធានាទៅលំនៅដ្ឋានវិញ និងដកពាក្យបណ្តឹងបញ្ចប់រឿងនៅប៉ុស្តិ៍នគរបាលរដ្ឋបាលប្ញស្សីកែវ ខណ្ឌប្ញស្សីកែវ ។
ចែករំលែកព័តមាននេះ