រាជធានីភ្នំពេញ ៖ ទីផ្សារកន្ធាយ នាពេលបច្ចុប្បន្នហាក់មានការត្រូវប៉ាន់ខ្លាំង ក្រោយបងប្អូនប្រជាកសិករដែលចិញ្ចឹមកន្ធាយមានឈ្នួញទិញអស់ៗក្នុងតម្លៃសមរម្យ ហើយការចិញ្ចឹមមានលក្ខណៈងាយស្រួយ ទោះមានដើមទុនតិចក៏អាចសាកល្បងចិញ្ចឹមបាននោះ ។ ជាការពិត បុរសម្នាក់ចិញ្ចឹមកន្ធាយដំបូងជាលក្ខណគ្រួសារតិចតួចប៉ុណ្ណោះ…
រាជធានីភ្នំពេញ ៖ ទីផ្សារកន្ធាយ នាពេលបច្ចុប្បន្នហាក់មានការត្រូវប៉ាន់ខ្លាំង ក្រោយបងប្អូនប្រជាកសិករដែលចិញ្ចឹមកន្ធាយមានឈ្នួញទិញអស់ៗក្នុងតម្លៃសមរម្យ ហើយការចិញ្ចឹមមានលក្ខណៈងាយស្រួយ ទោះមានដើមទុនតិចក៏អាចសាកល្បងចិញ្ចឹមបាននោះ ។
ជាការពិត បុរសម្នាក់ចិញ្ចឹមកន្ធាយដំបូងជាលក្ខណគ្រួសារតិចតួចប៉ុណ្ណោះ តែចុងក្រោយលោកអាចពង្រីករបស់មួយបាន ដោយនាពេលបច្ចុប្បន្ន លោកទទួលទិញកន្ធាយ និងប្រមូលកន្ធាយសាច់ដែលលោកចិញ្ចឹម ដើម្បីបញ្ចេញទៅក្នុងទីផ្សារ ឬលក់អោយឈ្នួលយ៉ាងតិចណាស់មួយតោនក្នុងមួយសប្តាហ៍ ។
គួរជម្រាបដែរថា គណនី Tik Tok របស់លោកមានឈ្មោះថា កន្ធាយខ្មែរ ដោយលោកតែងបង្ហាញចំណេះដឹងពាក់ព័ន្ធ និងការចិញ្ចឹមកន្ធាយ និងលក់កូនក៏ដូចជា បច្ចេកទេសផ្សេងៗ ដើម្បីអោយបងប្អូនបានដឹងនោះ ។ តើបងប្អូនយល់យ៉ាងណា គួរអោយចាប់អារម្មណ៍ទេ? ដើមទុនតិច ទទួលបានផលច្រើន មិនលំបាកលក់ចេញមានឈ្មួលទិញដល់ផ្ទះ សំខាន់អោយតែពូកែចិញ្ចឹមនោះ និងមានកន្ធាយធំៗល្អនោះ ។
តាមរយៈបទសម្ភាសន៍ជាមួយសារព័ត៌មានកោះសន្តិភាព លោក ចន បូរិន ដែលជាអ្នកចិញ្ចឹមកន្ធាយនោះ លោកថា ដំបូងឡើយក្នុងឆ្នាំ ២០១៨ លោកបានចាប់ផ្តើមជាដើមទុនតិចតួចប៉ុណ្ណោះ ដោយអាចថាតិចមែនទែន ។
តែក្រោយមកលោកអាចពង្រីករបចិញ្ចឹមកន្ធាយមួយនេះបានតាមរយៈការខិតខំស្វែករកបច្ចេកទេសផ្សេងៗពីបងប្អូនដែលមានជំនាញ ហើយលោកក៏បានទៅរៀនយកជំនាញនេះពីប្រទេសថៃផងដែរ ។ នាពេលបច្ចុប្បន្នលោកថា ទីផ្សារមានគាំទ្រពីសំណាក់អ្នកបរិភោគ ដោយក្នុងមួយសប្តាហ៍លោកថា លក់កន្ធាយសាច់បានប្រមាណជា១តោន តែមួយតោននេះលោកទិញបានពីបងប្អូនដែលចិញ្ចឹម និងកន្ធាយរបស់លោកដែលចិញ្ចឹមបានផងដែរ ។
លោកថា ការងារចិញ្ចឹមដំបូងលោកមានត្រឹមកន្ធាយមួយស្រះប៉ុណ្ណោះ តែនាពេលបច្ចុប្បន្ន លោកមានរហូតដល់១០ស្រះហើយ តែនៅតែផ្គត់ផ្គង់មិនគ្រប់ អាចថា តម្រូវការទីផ្សារ គឺមានច្រើននោះដោយមានឈ្នួលមកទិញពីលោកលើសពីការរំពឹងទុក ។
លោក ចន បូរិន ដែលមានស្រុកកំណើតនៅខេត្តព្រៃវែង រូបនេះ បន្ថែមថា រាល់ថ្ងៃលោកក៏មានលក់កន្ធាយផងដែរ ដោយមួយខែៗលោកមានកូនកន្ធាយសម្រាប់ការលក់ចេញប្រមាណជា១ម៉ឺន សម្រាប់បងប្អូនដែលចង់ទិញយកទៅចិញ្ចឹមនោះ ។
លោកថា ចំពោះបងប្អូនដែលចង់ចិញ្ចឹមអាចមកដល់ទីតាំងផ្ទាល់ ដើម្បីទិញ ឬចង់រៀន ដោយលោកនឹងផ្តល់ចំណេះដឹងនៃការចិញ្ចឹមនេះ ជាពិសេសបច្ចេកដែលទទួលបានផលច្រើនដូចដែលលោកបានអនុវត្តន៍កាលពីកន្លងទៅ ។
លោក ចន បូរិន ដែលមានជំនាញក្នុងការចិញ្ចឹមកន្ធាយនេះលោកថា កន្ធាយមិនលំបាកចិញ្ចឹមពេកនោះទេ ដោយយើងដឹងពីវាថា នៅពេលកន្ធាយឈឺ យើងគួរធ្វើបែបម្តេច ក្នុងការព្យាបាលវានោះ ។ បើទាក់ទងនឹងចិញ្ចឹមកន្ធាយវិញលោកថា កាន់តែងាយស្រួលទៀត ដោយចំណីកន្ធាយចែកចេញជាបីថ្នាក់ទី១ចំណីបេ ។ ទី២ចំណី ប្រភេទសាច់ ក្នុងនោះរួមមាន ត្រី កំពឹស ពោះត្រី ក្បាលត្រីជាដើម ។ ថ្នាក់ទី៣ ប្រភេទបន្លែ រួមមាន ត្រកួន ស្ពៃ ល្ពៅ និងបន្លែជាច្រើនទៀត ។
ជាការពិត តាមរយៈបន្លែត្រីសាច់ទាំងអស់នេះអាចស្រួលរកត្រី ហើយលោកបូរិនថា ពពួកចំណីទាំងនេះ កន្ធាយរបស់លោកចូលចិត្តស៊ីវាណាស់ ហើយស៊ីច្រើនទៀតផង ។
គួរបញ្ជាក់ដែរថា រាល់បច្ចេកទេសក្នុងការចិញ្ចឹមលោក បូរិន អាចបង្រៀនបាន ហើយលោកក៏មានកន្ធាយលក់ផងដែរ ដូច្នេះបងប្អូនអាចសាក់ល្បងបានត្រឹមតែ ៦ទៅ៧ខែប៉ុណ្ណោះ គឺផលកន្ធាយអាចនឹងប្រមូលផលបានហើយ ៕ ដោយ៖លីហួ គីមឆាយ
ចែករំលែកព័តមាននេះ