រាជធានីភ្នំពេញ ៖ លោកឧត្តមសេនីយ៍ត្រី សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ បានឲ្យដឹងថា បុរស២នាក់ ដែលត្រូវបានកម្លាំងសមត្ថកិច្ចឃាត់ខ្លួន កាលពីល្ងាចថ្ងៃទី២១ ខែមីនា ឆ្នាំ២០២៣ នៅមូលដ្ឋានខណ្ឌពោធិ៍សែនជ័យ និងខណ្ឌដង្កោនោះ ត្រូវបានកម្លាំងសមត្ថកិច្ចបញ្ជូនខ្លួនទៅកាន់អយ្យការអមសាលាដំបូងរាជធានីភ្នំពេញ នារសៀលថ្ងៃទី២២ ខែមីនា ឆ្នាំ២០២៣នេះហើយ ពាក់ព័ន្ធបទល្មើស ទី១- បទញុះញង់ និងទី២- ពីបទប្រមា.ថលើអង្គព្រះមហាក្សត្រ។
សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅថ្ងៃទី ២២ ខែមីនា ឆ្នាំ២០២៣ នេះ បានថ្លែងផងដែរថា ៖ មិនលើកលែងទោសជាដាច់ខាតដល់ពពួកក្រុមជ្រុលនិយមដែលបានប្រមា.ថអង្គព្រះមហាក្សត្រជាទីគោរពសក្តារៈ និងបំផ្លាញកេរ្តិ៍ឈ្មោះនាយករដ្ឋមន្ត្រី ។
សម្តេចតេជោ ហ៊ុន សែន ថ្លែងបន្តថា មានការបង្ហោះព័ត៌មានមិនពិតនៅលើបណ្ដាញសង្គម ដែលជាចេតនាដ៏អាក្រក់ប្រមា.ថព្រះចេស្ដាព្រះមហាក្សត្រ និងកិត្តិយសរបស់នាយករដ្ឋមន្ត្រី ក្នុងពេលព្រះអង្គយាងជាព្រះរាជអធិបតីដ៏វិសេសវិសាល ប្រោសព្រះរាជប្រទានព្រះអគ្គិកីឡា សម្រាប់ការប្រកួតកីឡាអាស៊ីអាគ្នេយ៍លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ នៅប្រាសាទអង្គរវត្ត។
សម្តេចតេជោ ហ៊ុន សែន ថ្លែងបន្តទៀតថា ពេលនេះ សមត្ថកិច្ចបានឃាត់ខ្លួនក្រុមប្រឆាំង២នាក់ ហ៊ុន កុសល និង យឹម ស៊ីណន កាលពីថ្ងៃទី ២១ ខែមីនា ម្សិលមិញនេះ ទាក់ទងនឹងការបង្ហោះសារប្រមា.ថលើព្រះចេស្ដា អង្គព្រះមហាក្សត្រ។ សម្ដេចតេជោ ថ្លែងបញ្ជាក់បន្ថែមទៀតថា សម្ដេចនឹងមិនលើកលែងទោសឱ្យជាដាច់ខាត ចំពោះជនណាដែលមូលបង្កាច់ខុសពីការពិត ដោយសង្កត់នូវការព្រមា.នធ្ងន់ៗថា «លើកនេះសំពងហើយ កុំថាសំពងលើសិទ្ធិបញ្ជេញមតិ តែសំពងលើជនដែលប្រមា.ថដល់ព្រះចេស្តា អង្គព្រះមហាក្សត្រ និងមូលបង្កាច់បំផ្លាញកេរ្តិ៍ឈ្មោះនាយករដ្ឋមន្ត្រី»។
ទន្ទឹមនឹងនោះ សម្តេចតេជោ ជំរុញដល់គ្រប់ទូរទស្សន៍ទាំងអស់ចាក់ផ្សាយឡើងវិញនូវ ព្រះរាជពិធីប្រោសព្រះរាជទានព្រះអគ្គិជ័យកីឡា និងពិធីរត់ភ្លើងគប់កីឡា សម្រាប់ព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ និងកីឡាអាស៊ានប៉ារ៉ាហ្គេមលើកទី១២ ឆ្នាំ២០២៣ កាលពីថ្ងៃទី២១ ខែមីនា ម្សិលមិញ ដើម្បីឱ្យពលរដ្ឋបានឃើញពីការគោរពប្រណិបត្តិរបស់សម្ដេចតេជោ ចំពោះអង្គព្រះមហាក្សត្រ។ គួរបញ្ជាក់ថា ៖ ហេតុអ្វីបានពួកគេចូលចិត្តបង្ករឿងម្ល៉េះ? ៕
ចែករំលែកព័តមាននេះ