ភ្នំពេញ៖ «ហេតុអី បានពួកគេចូលចិត្តបង្ករឿងម្លេះ?» សម្តេច​​​តេ​ជោ ​ហ៊ុន​ សែន ​បាន​បង្ហោះ​សំណួរ​នេះ ​នៅក្នុង​ប្រព័ន្ធ​​តេឡេក្រាម​របស់​សម្តេច​​ផ្ទាល់​​ នា​ព្រលប់​ថ្ងៃ​ទី​២១ ខែ​មីនា​ ឆ្នាំ២០២៣ នេះ ភ្លាមៗ ក្រោយ​​សម្តេច​តេជោ បានផ្សព្វផ្សាយ​នូវអត្ថបទព័ត៌មាន ស្តីពី «សមត្ថកិច្ចចាប់ខ្លួន លោក យឹម ស៊ីណន និង​លោក ហ៊ុន កុសល ក្រោយសរសេរនៅលើបណ្តាញសង្គមញុះញង់ ពាក់ព័ន្ធនឹង​រូបភាពព្រះមហាក្សត្រ»។

រូបភាពព្រះមហាក្សត្រកម្ពុជា ព្រះរាជទានព្រះអគ្គិជ័យកីឡា សម្រាប់ព្រឹត្តិការណ៍ប្រកួតកីឡា​អាស៊ីអាគ្នេយ៍ លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ នៅខេត្តសៀមរាប នាថ្ងៃទី២១ ខែមីនា ឆ្នាំ២០២៣នេះ ត្រូវបានសមាជិកក្រុមប្រឆាំងមួយចំនួន យកទៅបង្ហោះបន្ត​បន្ទាប់​វាយប្រហារតាមទស្សនៈផ្សេងៗ ដោយគ្រាន់តែយករូបភាពជ្រុងណាមួយ ហើយធ្វើការ​ប្រៀបធៀប វាយប្រហារលើសម្តេចតេជោ ហ៊ុន សែន បណ្តាលឱ្យសាធារណជន មានការ​ភាន់ច្រឡំ។

ស្របជាមួយនឹងយុទ្ធនាការវាយប្រហារនេះ លោក យឹម ស៊ីណន បានបង្ហោះនៅលើហ្វេសប៊ុក​របស់លោកដូច្នេះថា៖ «បើតាមសំលេងពលរដ្ឋតាមហាង កាហ្វេ៖ ថ្ងៃនេះ យើងអាច​ឃើញច្បាស់​ថា នរណាជាស្តេច ផែនដីពិតប្រាកដ»។

ចំណែកលោក ហ៊ុន កុសល ក៏បានបង្ហោះ​ថា៖ «ឃើញពួកគេ ធ្វើបាបព្រះទ័យ និង​បន្ទាប​ព្រះចេស្តា​ព្រះមហាក្សត្រ​ខ្មែរ​គ្រប់​ច្រក​បែប​នេះ​។ ទូលបង្គំជាអ្នកនយោបាយជំនាន់ក្រោយ ប្តេជ្ញានឹងប្រើ​សមត្ថភាព ដែលមានទាំងប៉ុន្មាន ចូលរួមពូនផ្តុំជាមួយលោកប្រធាន កឹម សុខា ការពារ​ព្រះចេស្ដាក្សត្រ និងព្រះរាជបល្ល័ង្ក ដែលប្រជារាស្ត្រខ្មែរ មិនអាចខ្វះបាន»។

តាមរយៈបណ្តាញសង្គម និង Comment នៅលើការបង្ហោះក្នុងហ្វេសប៊ុកមួយរបស់លោក យឹម ស៊ីណន​ សម្តេចតេជោ ហ៊ុន សែន បានចាត់ទុកថា ការបង្ហោះពាក់ព័ន្ធលើបញ្ហានេះ ជារឿងបំភ្លៃ។

សម្តេចតេជោ បានបញ្ជាក់ថា «មានតែព្រះមហាក្សត្រទេ ដែលព្រះអង្គដឹងច្បាស់»។ សម្តេច ក៏បានឆ្លើយឆ្លងបន្ថែមទៀតថា៖ «បើគ្មានទោស ទើបចម្លែក ព្រោះ​នេះមិនមែនជា​របៀបបញ្ចេញ​មតិទេ តែជាការបំភ្លៃការពិតមួយ ដោយចេតនា។ ទោះយ៉ាងណា យើងទុកជូនតុលាការ ជាអ្នកកាត់ក្តី»៕