យោងតាមមន្ទីរព័ត៌មានខេត្តមណ្ឌលគិរីបានឱ្យដឹងថា ឯកឧត្តម ឈួរ សុបញ្ញា បានបង្ហាញពីទឹកចិត្តឈឺចាប់ក្នុងសកម្មភាពចុះពិនិត្យនៅវត្តព្រៃចាន់ កាលពីរសៀលថ្ងៃទី៩ មករា ២០២៦ ថា គឺជាភាពឈឺចាប់ដ៏ធ្ងន់ធ្ងរដែលមិនអាចពិពណ៌នាបាន…
យោងតាមមន្ទីរព័ត៌មានខេត្តមណ្ឌលគិរីបានឱ្យដឹងថា ឯកឧត្តម ឈួរ សុបញ្ញា បានបង្ហាញពីទឹកចិត្តឈឺចាប់ក្នុងសកម្មភាពចុះពិនិត្យនៅវត្តព្រៃចាន់ កាលពីរសៀលថ្ងៃទី៩ មករា ២០២៦ ថា គឺជាភាពឈឺចាប់ដ៏ធ្ងន់ធ្ងរដែលមិនអាចពិពណ៌នាបាន ។ ទិដ្ឋភាពដែលបានឃើញមុខភ្នែក មិនមែនជាការខូចខាតធម្មតាទេ ប៉ុន្តែជាសកម្មភាពសាហាវ គ្មានមនុស្សធម៌ និងមិនគោរពតម្លៃសាសនា វប្បធម៌ និងអត្តសញ្ញាណជាតិរបស់យើង ។
ឯកឧត្តមបន្តទៀតថា ទីសក្ការៈមិនមែនជាអគារធម្មតានោះទេ ប៉ុន្តែជាខ្សែចំណងនៃមនោសញ្ចេតនានៃការលះបងរបស់បរិស័ទ ចំណងប្រវត្តិសាស្ត្រ ដែលជាគ្រឹះនៃដួងព្រលឹង និងជាមូលដ្ឋានសីលធម៌របស់សង្គមខ្មែរ ។ ការបំផ្លិចបំផ្លាញទីសក្ការៈ គឺជាការបំផ្លាញស្មារតីសាមគ្គី និងការរស់នៅដោយសេចក្តីគោរពគ្នាទៅវិញទៅមក ដែលជាគុណតម្លៃសកល ។
តាមទស្សនៈព្រះពុទ្ធសាសនា អំពើបំផ្លិចបំផ្លាញទីសក្ការៈ គឺជាអកុសលកម្មធ្ងន់ ដែលកើតចេញពី អវិជ្ជា ទោសៈ និងមោហៈ។ អំពើបែបនេះ មិនត្រឹមតែបង្កទុក្ខវេទនាដល់អ្នកដទៃទេ ប៉ុន្តែជាការបំផ្លាញខ្លួនឯងតាមច្បាប់កម្មផងដែរ ។ សង្គមណាដែលមិនគោរពទីសក្ការៈ សង្គមនោះក៏កំពុងបំផ្លាញស្នូលសីលធម៌របស់ខ្លួនឯងដោយមិនដឹងខ្លួន។
ទន្ទឹមនឹងនេះ ពីទស្សនៈច្បាប់ និងបទដ្ឋានអន្តរជាតិ ការបំផ្លិចបំផ្លាញទីសក្ការៈ និងបេតិកភណ្ឌវប្បធម៌ គឺជាការបំពានធ្ងន់ធ្ងរលើគោលការណ៍ការពារបេតិកភណ្ឌវប្បធម៌ និងសិទ្ធិវប្បធម៌របស់ប្រជាជន។ វាជាសកម្មភាពដែលមិនអាចទទួលយកបាននៅក្នុងសង្គមស៊ីវិល័យ និងមិនអាចលាក់បាំងក្រោមពាក្យណាមួយបានឡើយ។
ឯកឧត្តមសូមថ្កោលទោសយ៉ាងដាច់ខាតចំពោះសកម្មភាពអំពើហិង្សានេះ ហើយទាមទារឱ្យមានការទទួលខុសត្រូវតាមច្បាប់ និងតាមគោលការណ៍មនុស្សធម៌អន្តរជាតិ ។ ជាមួយគ្នានេះឯកឧត្តមអំពាវនាវឱ្យសហគមន៍ជាតិ និងអន្តរជាតិ ឈររួមគ្នាការពារ និងថែរក្សាទីសក្ការៈ សាសនា និងបេតិកភណ្ឌវប្បធម៌ ដើម្បីឲ្យសេចក្តីសន្តិភាព និងកិត្តិយសមនុស្សធម៌ មិនត្រូវបានបំផ្លាញឡើយ។
ចែករំលែកព័តមាននេះ