ទីក្រុងអូតាវ៉ា ៖ ប្រទេសកាណាដាបានប្រកាសដាក់ពន្ធតបតវិញខ្ពស់រហូតដល់ ៥០% ដូចគ្នាទៅលើមុខទំនិញជាច្រើនរបស់សហរដ្ឋអាមេរិក ដើម្បីជាការសងសឹកទៅនឹងការដាក់ពន្ធចុងក្រោយបង្អស់លើទំនិញកាណាដា ដែលត្រូវបានប្រកាសដោយប្រធានាធិបតីអាមេរិក លោក ដូណាល់ ត្រាំ (Donald Trump) កាលពីចុងសប្តាហ៍មុន។ នេះបើតាមប្រភពពី BBC បានចេញផ្សាយ។
មន្ត្រីកាណាដា កាលពីថ្ងៃទី២៥ សីហា បានប្រកាសថា ពន្ធរបស់កាណាដានឹងត្រូវអនុវត្តលើទំនិញអាមេរិកដែលមានតម្លៃជិត ២៨ ពាន់លានដុល្លារកាណាដា ឬស្មើនឹង ២០ ពាន់លានដុល្លារអាមេរិក ដោយរាប់ចាប់តាំងពីដែកថែប រហូតដល់គ្រឿងសង្ហារឹម ត្រីធូណាស្រស់ និងអាវយឺតកប្បាសផងដែរ។ បញ្ជីទំនិញគោលដៅទាំងនេះ ត្រូវបានរៀបចំឡើងឱ្យត្រូវគ្នាទៅនឹងទំនិញរបស់កាណាដាដែលជាប់ពន្ធរបស់សហរដ្ឋអាមេរិក ហើយពន្ធតបតរបស់កាណាដានេះ គ្រោងចាប់ផ្តើមអនុវត្តជាផ្លូវការនៅថ្ងៃទី៨ ខែកញ្ញា ខាងមុខនេះ។
នេះគឺជាការកើនឡើងកម្តៅចុងក្រោយបង្អស់ បន្ទាប់ពីកិច្ចចរចាពាណិជ្ជកម្មរវាងសហរដ្ឋអាមេរិក និងកាណាដាបានបរាជ័យកាលពីចុងសប្តាហ៍មុន ដោយភាគីនីមួយៗបានចោទប្រកាន់គ្នាទៅវិញទៅមកថា ដាក់ការទាមទារនៅនាទីចុងក្រោយ ដោយគ្មានហេតុផលសមរម្យ។
រដ្ឋមន្ត្រីក្រសួងហិរញ្ញវត្ថុកាណាដា លោក François-Philippe Champagne បានថ្លែងថា ការសងសឹករបស់កាណាដា ធ្វើឡើងដើម្បីឆ្លើយតបទៅនឹងពន្ធ ៥០% ដែលបានដាក់ដោយរដ្ឋបាលរបស់លោក ត្រាំ លើមុខទំនិញជាច្រើនរបស់កាណាដា បន្ទាប់ពីកិច្ចចរចាពាណិជ្ជកម្មបរាជ័យកាលពីថ្ងៃសុក្រសប្តាហ៍មុន។ ពន្ធទាំងនោះនឹងផ្តល់ផលវិបាកពិតប្រាកដដល់កម្មករ អាជីវកម្ម និងសហគមន៍កាណាដានៅទូទាំងប្រទេស ដូច្នេះកាណាដាចាំបាច់ត្រូវតែឆ្លើយតបវិញ ដោយលោកបានហៅការសងសឹកនេះថា ទង្វើមានសមាមាត្រស្មើគ្នា និងជាយុទ្ធសាស្ត្រ។
ជាមួយគ្នានោះដែរ លោកក៏បានបន្ថែមទៀតថា ប្រទេសកាណាដាក៏នឹងផ្តល់ថវិកាបន្ថែមចំនួន ៧,៥ ពាន់លានដុល្លារកាណាដា (៥,៤ ពាន់លានដុល្លារអាមេរិក) ផងដែរទៅដល់បណ្តាអាជីវកម្ម និងកម្មករដែលរងផលប៉ះពាល់ដោយសារពន្ធរបស់សហរដ្ឋអាមេរិក សម្រាប់បណ្តាកម្មវិធីគាំទ្រ ដែលបង្កើតឡើងដើម្បីកាត់បន្ថយការបាត់បង់ការងារ និងជួយទប់ទល់ក្រុមហ៊ុននានាឱ្យនៅបន្តដំណើរការទៅមុខបាន៕
ចែករំលែកព័តមាននេះ