សង្ស័យធ្លាយព័ត៌មានដឹកដីចាក់អនាធិបតេយ្យពេក ទើបរដ្ឋអំណាចខេត្តចេញសេចក្តីប្រកាស
- កំពង់ស្ពឺ
ខេត្តកំពង់ស្ពឺ ៖ កាលពីថ្ងៃទី ២៤ ខែសីហា ឆ្នាំ ២០២៦ រដ្ឋបាលខេត្តកំពង់ស្ពឺ បានចេញសេចក្តីប្រកាសស្តីពីការចុះពិនិត្យ តាមដាន និងចាត់វិធានការ លើសកម្មភាពការចាក់បំពេញអាចម៍ដី ដែលពុំមានលិខិតអនុញ្ញាតត្រឹមត្រូវនៅក្នុងមូលដ្ឋានក្រុង-ស្រុកទាំង៩ទូទាំងខេត្តកំពង់ស្ពឺ ។ យោងអនុក្រឹត្យលេខ ១៨ អនក្រ.បក ចុះថ្ងៃទី ៨ ខែកុម្ភៈ ឆ្នាំ ២០១៧ របស់រាជរដ្ឋាភិបាលកម្ពុជា
-តាមការចាំបាច់របស់រដ្ឋបាលខេត្តកំពង់ស្ពឺ ។
តបតាមខ្លឹមសារកម្មវត្ថុ និងយោងខាងលើ សូមជម្រាបជូន លោកអភិបាលក្រុង -ស្រុក បច្ចុប្បន្ននេះ រដ្ឋបាលខេត្តសង្កេតឃើញមានសកម្មភាពការចាក់បំពេញអាចម៍ដី នៅតាមទីតាំងមួយចំនួនពាក់ព័ន្ធ ការប្រើប្រាស់ដី ការបំពេញដី ឬការកែប្រែស្ថានភាពដី ពុំមានលិខិត អនុញ្ញាតត្រឹមត្រូវ ។ ដើម្បីពង្រឹងការគ្រប់គ្រង សណ្តាប់ធ្នាប់ ការប្រើប្រាស់ដីធ្លី និងការអនុវត្តច្បាប់ នៅមូលដ្ឋានឱ្យកាន់តែមានប្រសិទ្ធភាព រដ្ឋបាលខេត្ត សូម ក្រើនរំលឹកដល់រដ្ឋបាល ក្រុង-ស្រុក ត្រូវអនុវត្តតួនាទី ភារកិច្ចរបស់ខ្លួន ឱ្យបានហ្មត់ចត់ និងត្រូវអនុវត្តន៍តាមការ ណែនាំឱ្យបានម៉ឺងម៉ាត់ដូចខាងក្រោម ៖
១. ត្រូវចាត់តាំងមន្ត្រីជំនាញ សហការជាមួយអាជ្ញាធរឃុំ សង្កាត់ ភូមិចុះពិនិត្យជាប្រចាំលើទីតាំងដី ដែលមានសកម្មភាព ចាក់បំពេញអាចម៍ដី ត្រូវពិនិត្យឱ្យបានច្បាស់លាស់ អំពីទីតាំង ទំហំផ្ទៃដី ម្ចាស់ទីតាំង និង គោលបំណង នៃការចាក់បំពេញ និងលិខិតអនុញ្ញាតពាក់ព័ន្ធ ។
២.ករណីរកឃើញសកម្មភាពចាក់បំពេញអាចម៌ដី ដែលពុំមានលិខិតអនុញ្ញាតត្រឹមត្រូវ ត្រូវណែនាំ ឱ្យម្ចាស់ទីតាំង ផ្អាកសកម្មភាពជាបណ្ដោះអាសន្ន និងត្រូវចាត់វិធានការតាមនីតិវិធីជាធរមាន ។
៣.ចំពោះទីតាំងដី ដែលពុំស្ថិតក្នុងសមត្ថកិច្ចរបស់រដ្ឋបាលក្រុង- ស្រុក ត្រូវរាយការណ៍ជាបន្ទាន់ មករដ្ឋបាលខេត្ត និងសហការជាមួយមន្ទីរ អង្គភាពជំនាញ ឬស្ថាប័នមានសមត្ថកិច្ចពាក់ព័ន្ធ ដើម្បីចុះពិនិត្យ និងចាត់វិធានការតាមមុខងារ និងសមត្ថកិច្ចរៀងៗខ្លួន ។
៤. ត្រូវរៀបចំកត់ត្រាទីតាំង ដែលបានចុះពិនិត្យ ដោយបញ្ជាក់ពីស្ថានភាពជាក់ស្តែង លិខិតអនុញ្ញាត ម្ចាស់ទីតាំង វិធានការ ដែលបានអនុវត្ត និងមានរូបភាពភ្ជាប់ជាភស្តុតាងតាមការចាំបាច់ ។
៥. ត្រូវរាយការណ៍ជូនរដ្ឋបាលខេត្ត អំពីលទ្ធផល នៃការចុះពិនិត្យ និងវិធានការ ដែលបានអនុវត្ត ជាប្រចាំ។ ករណីមានលក្ខណៈធ្ងន់ធ្ងរ ប៉ះពាល់ដល់ដីសាធារណៈ ផ្លូវសាធារណៈ ប្រឡាយ ប្រព័ន្ធរំដោះទឹក ឬផលប្រយោជន៍សាធារណៈ ត្រូវរាយការណ៍មករដ្ឋបាលខេត្តជាបន្ទាន់។
៦. ករណីរដ្ឋបាលខេត្ត ចុះពិនិត្យ ឬទទួលបានព័ត៌មាន រកឃើញមានសកម្មភាពចាក់បំពេញអាចម៍ដី នៅមូលដ្ឋានក្រុង- ស្រុក ដោយពុំមានលិខិតអនុញ្ញាតត្រឹមត្រូវ កំពុងបន្តអនុវត្តក្នុងដែនសមត្ថកិច្ច និងពុំមានការចុះពិនិត្យ ណែនាំ ទប់ស្កាត់ ឬរាយការណ៍តាមការណែនាំខាងលើ រដ្ឋបាលខេត្តនឹង ចាត់វិធានការរដ្ឋបាលចំពោះរដ្ឋបាលក្រុង-ស្រុកនោះ ជាធរមាន។
អាស្រ័យហេតុនេះ សូមលោកអភិបាលក្រុង- ស្រុក ជ្រាប និងចាត់ចែងអនុវត្តឱ្យបានម៉ឺងម៉ាត់ និងមានប្រសិទ្ធភាពខ្ពស់ ។
ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ