ខេត្តស្វាយរៀង៖មហាជនលើកឡើងថាឈ្មួញនាំសត្វគោរស់ឆ្លងដែនទៅប្រទេសវៀតណាមក្នុង១ថ្ងៃរាប់សិបក្បាលតាមច្រករបៀងសំរោងគ្មានឃើញមន្ត្រីជំនាញណាអើពើឡើយ ។ ករណីនេះបានកើតឡើងនារសៀលថ្ងៃទី៨មករា២០២៦នៅចំណុចច្រករបៀងនៃប៉ុស្តិ៍វរៈការពារព្រំដែនសំរោងឃុំសំរោងស្រុកចន្ទ្រា។
មហាជនឲ្យដឹងទៀតថាសត្វគោដែលក្រុមឈ្មួញនាំឆ្លងដែនទៅប្រទេសវៀតណាមគឺជាសត្វគោ ពូជគោបាធំៗ និងសត្វគោក្របីពូជចម្រុះ ដោយក្រុមឈ្មួញដឹកមកទម្លាក់នៅក្នុងក្រោលនៅជិតប៉ុស្តិ៍នៃច្រករបៀងសំរោង។
ទាក់ទិនករណីនេះដែរលោកប៉ាងវិបុល ប្រធានការិយាល័យបសុពេទ្យស្រុកចន្ទ្រា បានប្រាប់អ្នកសារព័ត៌មានយើងថា រយៈពេល២ខែនេះក្រុមហ៊ុនផាប់រស្មី បានមកជួលក្រោលគោ នៅជិតប៉ុស្ត៍សំរោងដើម្បីដាក់គោក្របីត្រៀមលក់ឲ្យឈ្មួញវៀតណាម។ ដោយក្រុមហ៊ុនផាប់រស្មី គេមានអាជ្ញាបន័ប្រមូលទិញសត្វគោក្របីក្នុងស្រុកនិងបណ្តាខេត្តនានា នាំចេញទៅប្រទេសវៀតណាម ។ កន្លងមកក្រុមហ៊ុនផាប់ រស្មី នាំចេញ ទៅប្រទេសវៀតណាមតាមច្រកព្រំដែនស្រុករមាសហែក ស្រុករំដួល ស្រុកស្វាយទាប ក្រុងបាវិត។
ទើបតែរយៈពេល២ខែចុងក្រោយនេះក្រុមហ៊ុនផាប់រស្មី បានមកជួលក្រោលគោ ដាក់គោក្របី នៅជិតប៉ុស្តិ៍ព្រំដែនសំរោងនេះ កាលពីមុនគឺជាក្រោលគោក្របី របស់ក្រុមហ៊ុន ពាហនៈពាណិជ្ជ ដោយក្រុមហ៊ុននាំសត្វគោក្របីមកពីបរទេស គឺមកពីប្រទេសថៃ ចាប់តាំងពីបិទព្រំដែនថៃមកក្រុមហ៊ុនពាហនៈពាណិជ្ជ បានផ្អាកការនាំចេញសត្វគោក្របីទៅប្រទេសវៀតណាមទៀតទើបក្រុមហ៊ុនផាប់ រស្មីមកជួលក្រោលស្តុបគោក្របីបន្ត ហើយនាំចេញទៅប្រទេសវៀតណាម។ដូច្នេះមន្ត្រីជំនាញការិយាល័យបសុពេទ្យស្រុកចន្ទ្រា មិនមានការចុះពិនិត្យអ្វីទេ ដោយគេបង់ឲ្យស្រុកខេត្តរួចហើយ។
ចំណែកលោកថន ធារៈ ប្រធានក្រុមហ៊ុនផាប់ រស្មី បានប្រាប់អ្នកសារព័ត៌មាន យើងថា ក្រុមហ៊ុនមានអាជ្ញាប័ណ្ណ ប្រមូលទិញគោក្នុងស្រុក មកពីស្រុករមាសហែក និងមានអ្នកប្រមូលទិញនៅឃុំពពែតស្រុកស្វាយទាប១កន្លែងមានរថយន្ត២គ្រឿង នៅសង្កាត់ព្រៃអង្គុញក្រុងបាវិត១កន្លែងមានរថយន្ត២គ្រឿងនាំចេញទៅប្រទេសវៀតណាមតាមច្រកទ្វារព្រំដែននានាក្នុងខេត្តស្វាយរៀង ដោយមានអាជ្ញាប័ណ្ណនាំចេញរយៈពេល៣ឆ្នាំទៅ៥ឆ្នាំ។
ចំណែកមហាជនវិញបានលើកឡើងថា សត្វគោដែលឈ្មួញដឹកមកទម្លាក់នៅក្នុងក្រោលជិតប៉ុស្តិ៍ព្រំដែនសំរោងនេះគឺជាប្រភេទពូជគោ កូនកាត់ធំៗនាំចូលពីបរទេស ដែលស្រុកខ្មែរយើងជាពិសេសប្រជាពលរដ្ឋខេត្តស្វាយរៀងពុំសូវមានចិញ្ចឹមទេមានតែចិញ្ចឹមគោក្តាម ក្របីក្នុងស្រុក ។
ព័ត៌មានបន្ថែមនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ