Man City ចាយជិត១០ម៉ឺនដុល្លារមួយថ្ងៃ ជួលមេធាវីការពារក្តីប្រឆាំងការចោទរបស់ EPL
អង់គ្លេស ៖ ក្លិបនៅក្នុងក្របខណ្ឌបាល់ទាត់ English Premier League ជាច្រើន បានគាំទ្រការទម្លាក់
អង់គ្លេស ៖ ក្លិបនៅក្នុងក្របខណ្ឌបាល់ទាត់ English Premier League ជាច្រើន បានគាំទ្រការទម្លាក់ក្រុមមេឃខៀវ Manchester City ចេញពីលីគកំពូលអង់គ្លេសមួយនេះ ប្រសិនបើពួកគេត្រូវបានរកឃើញថា មានពិរុទ្ធបំពានច្បាប់ហិរញ្ញវត្ថុ ក្នុងរយៈពេល៩រដូវកាល កន្លងមកនេះ ខណៈ City បច្ចុប្បន្នកំពុងចាយលុយដ៏សន្ធឹកសន្ធាប់ ចំណាយលើមេធាវីកំពូលការពារក្តីរបស់ពួកគេ។ នេះបើយោងតាមប្រភព Sky Sports ចេញផ្សាយកាលពីថ្ងៃទី០៧ ខែកុម្ភៈ ឆ្នាំ២០២៣។ គួររំលឹកថា រឿងធំ! Man City ប្រឈមកាត់ចេញពី Premier League ក្រោយរកឃើញបំពានច្បាប់ហិរញ្ញវត្ថុ
ក្លិប Man City បានចេញសេចក្តីប្រកាសមួយ កាលពីថ្ងៃទី០៦ កុម្ភៈ ថា ពួកគេមានការភ្ញាក់ផ្អើល ដែលត្រូវបានចោទប្រកាន់ដោយក្របខណ្ឌ Premier League ជាមួយនឹងការរំលោភបំពានច្បាប់ហិរញ្ញវត្ថុជាង១០០លើក ដែលគិតចាប់តាំងពីរដូវកាល ២០០៩-១០ ដល់ ២០១៧-១៨ ។
ការដាក់ទណ្ឌកម្មដ៏ធ្ងន់ធ្ងរបំផុតរបស់ក្របខណ្ឌ Premier League ក្នុងកាលៈទេសៈទាំងនេះ Man City ប្រឈមនឹងទោសទណ្ឌមួយចំនួន ក្នុងនោះរួមទាំងការកាត់ចេញពីលីគកំពូលអង់គ្លេសមួយនេះ ហើយការឈ្នះតំណែងជើងឯក Premier League កន្លងមក ក៏នឹងអាចដកហូតឱ្យទៅកាន់ក្រុមរងជើងឯកផងដែរ។ ជាមួយគ្នានោះ ក៏រួមមានទាំងការពិន័យជាទឹកប្រាក់យ៉ាងច្រើនសន្ធឹកសន្ធាប់ផងដែរ។
ប្រភពសិ្នតជាមួយនឹងរឿងនេះ បានបញ្ជាក់ថា នឹងមិនមានការអាណិតអាសូរណាមួយសម្រាប់ Man City នោះទេ ដែលបានឈ្នះជើងឯក Premier League ៦សម័យកាលក្នុងរយៈពេល ១១ឆ្នាំចុងក្រោយនេះ ប្រសិនបើពួកគេត្រូវបានរកឃើញថា មានកំហុសពិតប្រាកដមែន ដែលបច្ចុប្បន្នសំណុំរឿងនេះ កំពុងស្ថិតក្នុងដៃគណៈកម្មការឯករាជ្យ ដែលត្រូវបានបង្កើតឡើង។
លោក Lord Pannick មេធាវីដ៏ល្បីឈ្មោះនៅចក្រភពអង់គ្លេស ត្រូវបានកំណត់ជាមេធាវីការពារសម្រាប់ Man City ម្តងទៀត ខណៈដែលមេធាវីរូបនេះ ក៏បានការពារក្តីរបស់ពួកគេ នៅក្នុងបណ្តឹងឧទ្ធរណ៍របស់សហព័ន្ធបាល់ទាត់ទ្វីបអឺរ៉ុប UEFA ពាក់ព័ន្ធនឹងការបំពានច្បាប់ FFP នៅឯតុលាការអាជ្ញាកណ្តាលសម្រាប់កីឡា (CAS) កាលពីឆ្នាំ ២០២០។
បើយោងតាមរបាយការណ៍ពីទស្សនាវដ្តី The Lawyer បានអះអាងថា លោក Lord Pannick បានគិតថ្លៃរហូតដល់ ៨ម៉ឺនផោន ស្មើនឹងប្រមាណ ៩៦,០០០ដុល្លារក្នុងមួយថ្ងៃ សម្រាប់សេវាកម្មរបស់មេធាវីកំពូលរូបនេះ៕
ចែករំលែកព័តមាននេះ