AFF Cup 2022 ៖ ថៃរកបានជិត១លានដុល្លារ ក្រោយគ្រងតំណែងជើងឯក
ថៃ ៖ ក្រុមបាល់ទាត់ជម្រើសជាតិថៃ រកបានជិត ៣៥លានបាត ដែលស្មើនឹង ១,០៥លានដុល្លារអាមេរិ
ថៃ ៖ ក្រុមបាល់ទាត់ជម្រើសជាតិថៃ រកបានជិត ៣៥លានបាត ដែលស្មើនឹង ១,០៥លានដុល្លារអាមេរិក បន្ទាប់ពីឈ្នះជើងឯកពានរង្វាន់បុរសប្រចាំតំបន់អាស៊ានឆ្នាំ២០២២ (AFF Mitsubishi Electric Cup 2022) កាលពីថ្ងៃទី១៦ ខែមករា ឆ្នាំ២០២៣ កន្លងទៅ។ នេះបើយោងតាមប្រភពពីសារព័ត៌មានថៃ Main Stand – International ដែលបានចេញផ្សាយ កាលពីថ្ងៃទី១៧ ខែមករា កន្លងទៅ។ គួររំលឹកថា AFF Championship 2022 ៖ ថៃបង្កើនកំណត់ត្រាឈ្នះជើងឯក ក្រោយផ្តួលវៀតណាម
ក្រុមដំរីសឹកថៃ ដែលជាក្រុមការពារតំណែងជើងឯក ក្រោមការដឹកនាំរបស់គ្រូបង្វឹកសញ្ជាតិប្រេស៊ីល លោក Alexandre Polking បានការពារតំណែងជើងឯកប្រចាំតំបន់អាស៊ានដោយជោគជ័យ ក្រោយយកឈ្នះលើក្រុមអ្នកចម្បាំងផ្កាយមាសវៀតណាម នៅក្នុងការប្រកួតជើងទី២ នៅឯកីឡដ្ឋាន Thammasat ដោយលទ្ធផល ១-០ ហើយដោយសរុបលទ្ធផលទាំងពីរជើង ថៃឈ្នះក្នុងលទ្ធផល ៣-២។ សម្រាប់ថៃ នេះគឺជាការឈ្នះជើងឯកពានរង្វាន់ AFF Cup ជាលើកទី៧ និងជាក្រុមដែលឈ្នះជើងឯកច្រើនជាងគេផងដែរ។
ដោយបានប្រកាសរួចហើយ លោកស្រី Nualphan Lamsam ដែលគ្រប់គ្នាស្គាល់ច្បាស់ថា Madame Pang ដែលជាអ្នកចាត់ការទូទៅក្រុមបាល់ទាត់ជម្រើសជាតិថៃ នឹងផ្តល់ប្រាក់រង្វាន់ដល់ក្រុមចំនួន ១០លានបាត សម្រាប់ការឡើងដល់វគ្គផ្តាច់ព្រ័ត្រ AFF Cup 2022។ ប៉ុន្តែទោះយ៉ាងណា ស្ត្រីអ្នកជំនួយវ័យ៥៦ឆ្នាំរូបនេះ បានអះអាងនៅក្នុងបទសម្ភាសន៍ក្រោយបញ្ចប់ការប្រកួត កាលពីថ្ងៃទី១៦ ខែមករា កន្លងទៅ ថា លោកស្រីនឹងផ្តល់ប្រាក់សុទ្ធទ្វេដងចំនួន ២០លានបាត ដល់ក្រុមជម្រើសជាតិថៃ ដែលប្រឹងប្រែងរហូតឈ្នះតំណែងជើងឯក។ បន្ថែមពីលើប្រាក់រង្វាន់ផ្ទាល់ពីសំណាក់ Madame Pang ប្រធានសមាគមបាល់ទាត់ថៃ លោក Somyot Poompanmoung ក៏នឹងផ្តល់ប្រាក់បន្ថែមចំនួន ៥លានបាតផងដែរ។
បន្ទាប់ពីបន្ថែម២៥លានបាត ចូលទៅក្នុងប្រាក់រង្វាន់របស់ពី AFF ក្នុងនាមជាម្ចាស់ជើងឯកប្រហែល ១០លានបាត ដូច្នេះតម្លៃសរុបគឺប្រហែល ៣៥លានបាត ដែលស្មើនឹងប្រហែល ១,០៥លានដុល្លារ ខណៈដែលគេនៅមិនទាន់ដឹងថា តើប្រាក់ទាំងអស់នេះ នឹងត្រូវបែងចែកដល់កីឡាករ និងបុគ្គលិករបស់ក្រុមជម្រើសជាតិថៃយ៉ាងណានោះទេ។
សូមជម្រាបជូនថា ពានរង្វាន់បុរសប្រចាំតំបន់អាស៊ាន AFF Cup ត្រូវបានបង្កើតឡើងលើកដំបូងក្នុងឆ្នាំ១៩៩៦ ដោយតម្រូវធ្វើការប្រកួត២ឆ្នាំម្តង។ ចាប់ពីឆ្នាំ១៩៩៦ រហូតដល់ឆ្នាំ ២០២២ ពានរង្វាន់នេះ បានផ្លាស់ប្តូរឈ្មោះចំនួន៣ដង ដែលរួមមាន Tiger Cup, AFF Suzuki Cup និងចុងក្រោយ AFF Mitsubishi Electric Cup ដែលទើបតែត្រូវបានប្តូរនៅក្នុងឆ្នាំ ២០២២។ រយៈពេល២៧ឆ្នាំកន្លងមកនេះ ថៃ គឺក្រុមឈ្នះជើងឯកច្រើនជាងគេ ពោលគឺ ៧ដង ចំណែកសិង្ហបុរីឈ្នះ ៤ដង វៀតណាមឈ្នះ ២ដង និងម៉ាឡេស៊ីលឈ្នះ ១ដង ខណៈដែលឥណ្ឌូណេស៊ី ជាក្រុមឈានដល់វគ្គផ្តាច់ព្រ័ត្រច្រើនជាងគេ ពោល ៦ដង ប៉ុន្តែពុំដែលឈ្នះជើងឯកឡើយ៕
ចែករំលែកព័តមាននេះ