ADផ្ទាំងផ្សព្វផ្សាយពាណិជ្ជកម្ម

តូចតែតាន់! រិទ្ធី គីងកុង អាយុត្រឹមតែ៩ឆ្នាំក្លាយជាអ្នកប្រដាល់ល្បីឈ្មោះប្រកួតមិនដែលចា.ញ់

5 ម៉ោង មុន

ភ្នំពេញ
២៩ ខែ មេសា ឆ្នាំ ២០២៥ ម៉ោង ១៤:៣៥

រាជធានីភ្នំពេញ ៖ បច្ចុប្បន្នវិស័យកីឡាទាំងអស់ត្រូវបានរាជរដ្ឋាភិបាលកម្ពុជាយកចិត្តទុកដាក់លើកកម្ពស់យ៉ាងខ្លាំង ជាពិសេសកីឡាប្រដាល់គុនខ្មែរនេះតែម្ដង ។ នៅក្នុងព្រឹត្តិការណ៍កីឡាស៊ីហ្គេមដែលកម្ពុជាធ្វើជាម្ចាស់ផ្ទះក៏មានដាក់បញ្ចូលនូវវិញ្ញាសាគុនខ្មែរដែលបង្ហាញឱ្យឃើញពីការយកចិត្តទុកដាក់លើប្រភេទកីឡាប្រយុទ្ធមួយនេះដែរ ។ ជាមួយគ្នានេះ សហព័ន្ធកីឡាប្រដាល់គុនខ្មែរដែលមានឯកឧត្តមខូវ ឆាយ…

0:00

តាមរយៈវិស័យកីឡាប្រដាល់គុនខ្មែរនេះបានធ្វើឲ្យកីឡាករ-កីឡាការិនីថ្នាលមួយចំនួនបានក្លាយជាបុគ្គលគំរូដោយមានអ្នកគាំទ្រជាច្រើនពេញចិត្តនូវការតស៊ូរបស់ពួកគេធ្វើឱ្យកេរ្តិ៍ឈ្មោះរបស់គេនិងក្រុមគ្រួសារលេចត្រដែតនៅក្នុងស្រទាប់មហាជន។

ជាក់ស្ដែង កីឡាកររិទ្ធី គីងកុង ដែលមានឈ្មោះពិតហុង លីហ័ង អាយុត្រឹមតែ៩ឆ្នាំប៉ុណ្ណោះ
បានក្លាយជាកីឡាករថ្នាលគុនខ្មែរមួយរូបទទួលបាននូវការគាំទ្រយ៉ាងខ្លាំងពីមហាជន
នាពេលបច្ចុប្បន្នតាមរយៈការប្រកួតមិនដែលចាញ់សោះក្នុងរយៈពេល១ឆ្នាំចុងក្រោយនេះ ។

លោក ផាត់ សូដា ជាគ្រូបង្វឹកប្រចាំក្លិបគុនខ្មែរសុ៊ុបពើហ្វៃបានឱ្យដឹងថា ដំបូងឡើយ លោកបានឃើញកុមារារិទ្ធី គីងកុង តែងមកលួចមើលគេហាត់ប្រដាល់ជារៀងរាល់ថ្ងៃធ្វើឱ្យលោកដឹងពីនិស្ស័យស្រឡាញ់ចូលចិត្តកីឡាមួយនេះទើបលោកប្រាប់គេឱ្យទៅហៅឪពុកម្ដាយមកសុំចូលហ្វឹកហាត់ត្រឹមត្រូវតែមិនទទួលបានការឆ្លើយតបជាវិជ្ជមានឡើយ។

លោកលឹម ហុង ដែលត្រូវជាឪពុករបស់កុមារារិទ្ធី គីងកុង ប្រាប់ថា ពីដំបូងលោកមិនអនុញ្ញាតឱ្យកូនរបស់លោកហាត់ប្រដាល់នោះទេព្រោះគេនៅតូចហើយនៅក្នុងវ័យកំពុងសិក្សាទៀតផង ។ ប៉ុន្តែរាល់ពេលចេញពីសាលាកូនប្រុសរបស់លោកគឺបាត់ពីផ្ទះមកលួចមើលគេហាត់ប្រដាល់រាល់ថ្ងៃ។ ដោយហាមឃាត់មិនឈ្នះ ទីបំផុតលោកក៏សម្រេចចិត្តមកសុំលោកគ្រូផាត់ សូដា ឱ្យកូនរបស់គាត់បានចូលហ្វឹកហាត់តាំងពីពេលនោះមក(ដើមឆ្នាំ២០២៤)។

បច្ចុប្បន្ន លោកមានតែជំរុញលើកទឹកចិត្តឱ្យកូនខិតខំប្រឹងប្រែងហ្វឹកហាត់បន្តទៀត ពីព្រោះនេះជាអ្វីដែលគេមានចិត្តស្រឡាញ់ចូលចិត្តទៅហើយ ។ រហូតមកទល់ពេលនេះ លោកមានការភ្ញាក់ផ្អើលយ៉ាងខ្លាំងព្រោះមិននឹកស្មានថា ត្រឹមរយៈពេលខ្លីប៉ុណ្ណោះកូនប្រុសរបស់លោកមានឈ្មោះល្បីខ្លាំងក្នុងពិភពប្រដាល់គុនខ្មែរតាមរយៈការប្រកួតជាង១០ដងមិនទាន់ស្គាល់ចាញ់ម្ដងណាឡើយរហូតទទួលរហស្សនាមថា«តូចតែតាន់»ទៀតផង។

គួរឱ្យដឹងផងដែរ កីឡាកររិទ្ធី គីងកុង មានបងប្អូនចំនួន៤នាក់ ប្រុស៣នាក់ស្រី១នាក់ ។ គេជាកូនទី២នៅក្នុងគ្រួសាររស់នៅភូមិខ្នំ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ ។ រិទ្ធី គីងកុង ដែលកំពុងរៀនថ្នាក់ទី៣នៅសាលាបឋមសិក្សាវត្តភ្នៀតបានចូលហ្វឹកហាត់កីឡាប្រដាល់គុនខ្មែរបានជាង១ឆ្នាំមកហើយ ដោយមានស្ថិតិប្រកួតបានចំនួន១៣ដងមិនដែលចាញ់ ក្នុងនោះផ្ដួលដៃគូឱ្យសន្លប់បាន៧ដង។ ការប្រកួតលើកចុងក្រោយកាលពីថ្ងៃទី២៧ ខែមេសា បានយកឈ្នះកីឡាករថៃNATHAO TOYOTA RAKYORNG ដោយពិន្ទុ ។ តាមប្រភពព័ត៌មានបានទម្លាយថា កីឡាករមាឌតូចតែតាន់រូបនេះត្រៀមទៅប្រកួតនៅប្រទេសជប៉ុននៅខែក្រោយនេះហើយ។

ចំណែកបងប្រុសរបស់គេឈ្មោះរិទ្ធី លីហួ មានអាយុ១១ឆ្នាំ ក៏ជាអ្នកប្រដាល់នៅក្នុងក្លិបជាមួយគ្នានេះដែរតែមិនទាន់ល្បីឈ្មោះខ្លាំងនៅឡើយ៕