ទីក្រុង​ម៉ា​ឌ្រី​ដ ៖ លោក Carlo Ancelotti នឹង​ចាក​ចេញពី​ក្លិប Real Madrid នៅ​ចប់​រដូវ​កាល​នេះ ខណៈ​ប្រភព​ពី​កាសែត​អេ​ស្ប៉ា​ញ Marca ព្រមទាំង Relevo បាន​រាយការណ៍​ថា គ្រូបង្វឹក​សញ្ជាតិ​អ៊ី​តា​លី​រូប​នេះ បាន​យល់ព្រម​ធ្វើ​ជា​គ្រូបង្វឹក​របស់​ក្រុម​ជម្រើសជាតិ​ប្រេ​ស៊ី​ល ដែល​ត្រូវ​បាន​ស្គាល់​ថា ក្រុម​ជោគជ័យ​បំផុត​នៅ​ក្នុង​ប្រវត្តិសាស្ត្រ World Cup តាម​រយៈ​ការ​ឈ្នះ​ជើងឯក​ច្រើន​ជាងគេ ពោល​៥​សម័យកាល​។

កាសែត​ល្បី​របស់​អេ​ស្ប៉ា​ញ​បាន​ចេញផ្សាយ​ថា អ្វី​គ្រប់យ៉ាង​ត្រូវ​បាន​រៀបចំ​រួច​ជាស​ម្រេច​លើ​កិច្ចព្រមព្រៀង​រវាង​លោក Ancelotti និង​សហព័ន្ធ​បាល់ទាត់​ប្រេ​ស៊ី​ល ដែល​អាច​កើត​ឡើងជា​ផ្លូវការ​នៅ​ខែមិថុនា​ខាង​មុខ​នេះ​។ ចំណែក​ខាង​ក្លិប Real Madrid ក៏​នឹង​ត្រៀម​ធ្វើ​ពិធី​លា​ដ៏​ពិសេស​សម្រាប់​លោក Ancelotti ឱ្យ​សម​នឹង​ស្នាដៃ​ដ៏​ធំធេង​ដែល​លោក​បាន​បន្សល់​ទុក​សម្រាប់​ក្រុម​រហស្សនាម «​ស្តេច​ស​» មួយ​នេះ ដោយ​លោក​ឈ្នះ​ពានរង្វាន់ Champions League ៣​ដង La Liga ២​ដង ព្រមទាំង​ពានរង្វាន់​ជា​ច្រើន​ផ្សេង​ទៀត អំឡុង​ពេល​ដឹកនាំ Real Madrid​។

ប្រភព​មួយ​ចំនួន​ផ្សេង​ទៀត​បាន​អះអាង​ថា ជំហាន​ដំបូង​លោក Ancelotti នឹង​មាន​កុងត្រា​រយៈពេល​១​ឆ្នាំ​ជា​មុន​សិន​ជាមួយ​សហព័ន្ធ​កីឡាបាល់ទាត់​ប្រេ​ស៊ី​ល ដែល​មាន​ន័យ​ថា លោក​នឹង​ត្រូវ​ដឹកនាំ​រហូត​ដល់​ចប់​ព្រឹត្តិការណ៍ World Cup ឆ្នាំ ២០២៦​។

នៅ​ពេល​ត្រូវ​បាន​សួរ​ដោយ​អ្នកកាសែត​អំពី​អនាគត​របស់​លោក​ក្នុង​សន្និសីទ​សារព័ត៌មាន បន្ទាប់​ពី​ការ​ចាញ់​ក្រុម Barcelona នៅ​វគ្គ​ផ្តាច់ព្រ័ត្រ​ពានរង្វាន់ Copa del Rey កាលពី​ថ្ងៃ​ទី​២៧ ខែមេសា លោក Ancelotti ពុំ​បាន​អត្ថាធិប្បាយ​ច្រើន​អំពី​បញ្ហា​នេះ​ឡើយ ដោយ​គ្រាន់តែ​និយាយ​ថា «​រឿង​ថា​តើ​ខ្ញុំ​បន្ត​នៅ Real Madrid ឬ​ក៏​អត់ គឺជា​បញ្ហា​នៅ​ស​ប្តា​ហ៍​ខាង​មុខ​នេះ មិនមែន​នៅ​ថ្ងៃនេះ​ទេ​»​។ លោក​ក៏​មិន​បាន​បញ្ជាក់​ថា លោក​នឹង​ដឹកនាំ Real Madrid នៅ​ក្នុង​ការ​ប្រកួត​ពានរង្វាន់ FIFA Club World Cup នៅ​រដូវក្តៅ​នេះ​ឬ​ក៏​អត់​នោះ​ដែរ​។

ទោះ​យ៉ាងណា​ក៏​ដោយ របាយការណ៍​ពី​ប្រព័ន្ធ​ផ្សព្វផ្សាយ​អេ​ស្ប៉ា​ញ​រាយការណ៍​ថា បុគ្គល​៣​រូប​ត្រូវ​បាន​កំណត់​សម្រាប់​កាន់​តំណែង​គ្រូបង្វឹក​បណ្ដោះអាសន្ន បើ​លោក Ancelotti ពិតជា​ចាកចេញ​មែ​នោះ រួម​មាន​លោក Santiago Solari នាយក​ផ្នែក​កីឡា​ក្លិប Real Madrid ព្រមទាំង​គ្រូបង្វឹក​ក្រុម​យុវជន​ពីរ​រូប​គឺ​លោក Raul ឬ​លោក Alvaro Arbeloa​។ ទន្ទឹម​ជាមួយ​គ្នា​នោះ ប្រព័ន្ធ​ផ្សព្វផ្សាយ​អា​ល្លឺ​ម៉​ង់​ក៏​បាន​រាយការណ៍​ផង​ដែរ​ថា លោក Jurgen Klopp អតីត​គ្រូបង្វឹក​ក្រុម Liverpool បាន​បដិសេធ​ការងារ​នៅ Real Madrid ដូច្នេះ​លោក Xabi Alonso អតីត​ខ្សែបម្រើ​ឆ្នើម Real Madrid ដែល​បច្ចុប្បន្ន​ជា​គ្រូបង្វឹក​ក្រុម Bayer Leverkusen បាន​លេច​ចេញ​ជា​បេក្ខភាព​ឈានមុខ​គេ សម្រាប់​ជំនួស​តំណែង​លោក Ancelotti​។

សូម​ជម្រាប​ជូន​ថា លោក Carlo Ancelotti ត្រូវ​បាន​ចាត់ទុកជា​គ្រូបង្វឹក​បាល់ទាត់​ដ៏​ជោគជ័យ និង​អស្ចារ្យ​មួយ​រូប​នៅ​លើ​ពិភពលោក ដោយ​ធ្លាប់​បាន​ដឹកនាំ​ក្រុម​កំពូល​ៗ​ជា​ច្រើន Juventus, AC Milan, Chelsea, PSG, Bayern Munich និង Napoli ដោយ​ឈ្នះ​ពានរង្វាន់ និង​បង្កើត​បាន​កំណត់​ត្រា​ជា​ច្រើន​។ លោក​បាន​ដឹកនាំ Real Madrid ២​លើក ដោយ​លើក​ដំបូង​ចាប់ពី​ឆ្នាំ ២០១៣ ដល់ ២០១៥ និង​លើក​ទី​២ ចាប់តាំងពី​ឆ្នាំ ២០២១ រហូត​មក​ទល់​បច្ចុប្បន្ន​។

អ្នកគាំទ្រ​បាល់ទាត់​មើលឃើញ​ថា តាម​រយៈ​ស្នាដៃ និង​បទ​ពិសោធន៍​ដ៏​ក្រាសក្រែល​នេះ លោក Ancelotti សមសក្តិ​បំផុត​សម្រាប់​តំណែង​គ្រូបង្វឹក​ក្រុម​ជម្រើសជាតិ​ប្រេ​ស៊ី​ល ដែល​កំពុង​តែ​ទំនេរ ដើម្បី​នាំ​យក​ភាព​ខ្លាំង​របស់​ក្រុម​រហស្សនាម «​សាំ​បា​» មួយ​នេះ​ត្រឡប់​មក​វិញ ស​ម្រា​បើ​ការ​ប្រកួត​ពានរង្វាន់ FIFA World Cup ឆ្នាំ​២០២៦ ដែល​ប្រទេស​កា​ណា​ដា ម៉ិ​ក​ស៊ិ​ក និង​សហរដ្ឋអាមេរិក​ធ្វើ​ជា​ម្ចាស់ផ្ទះ​រួម​គ្នា​។ ដ្បិត​បច្ចុប្បន្ន​ពួក​គេ​កំពុង​ឈរ​នៅ​ចំណាត់ថ្នាក់​ទី​៤ នៅ​ក្នុង​ការ​ប្រកួត​វគ្គ​ជម្រុះ​ប្រចាំ​តំបន់​អា​មេ​រិ​ក​ខាងត្បូង ក្រោយ​ឆ្លងកាត់​១៤​ប្រកួត​កន្លង​មក ខណៈ​នៅ​សល់​៤​ប្រកួត​ទៀត​ដែល​ត្រូវ​លេង​៕ ដកស្រង់ ៖ Znews