ប្រទេសអារ៉ាប៊ីសាអូឌីត ៖ យន្តហោះឯកជនដ៏ប្រណិតតម្លៃ ៨១ លានដុល្លារអាមេរិករបស់កីឡាករបាល់ទាត់ឆ្នើម Cristiano Ronaldo ត្រូវបានរាយការណ៍ថា ចាកចេញពីប្រទេសអារ៉ាប៊ីសាអូឌីតនៅពាក់កណ្តាលអធ្រាត្រឈានចូលថ្ងៃទី៣ ខែមីនា…
ប្រទេសអារ៉ាប៊ីសាអូឌីត ៖ យន្តហោះឯកជនដ៏ប្រណិតតម្លៃ ៨១ លានដុល្លារអាមេរិករបស់កីឡាករបាល់ទាត់ឆ្នើម Cristiano Ronaldo ត្រូវបានរាយការណ៍ថា ចាកចេញពីប្រទេសអារ៉ាប៊ីសាអូឌីតនៅពាក់កណ្តាលអធ្រាត្រឈានចូលថ្ងៃទី៣ ខែមីនា ឆ្នាំ២០២៦ ខណៈដែលគ្រាប់បែកបានធ្លាក់លើស្ថានទូតអាមេរិកនៅទីក្រុងរីយ៉ាដ (Riyadh)។ នេះបើយោងតាមកាសែត The Sun និង Daily Mail របស់ចក្រភពអង់គ្លេសចេញផ្សាយនៅថ្ងៃទី៣ ខែមីនា ឆ្នាំ២០២៦។
ខ្សែប្រយុទ្ធឆ្នើម Cristiano Ronaldo បច្ចុប្បន្នកំពុងរស់នៅទីក្រុងរីយ៉ាដ ដែលជារដ្ឋធានីនៃប្រទេសអារ៉ាប៊ីសាអូឌីតជាមួយគូដណ្តឹង Georgina Rodriguez និងកូន៥នាក់របស់ខ្លួន។ ប៉ុន្តែទោះយ៉ាងណាក៏ដោយ មិនទាន់មានរបាយការណ៍ច្បាស់ថា តើពួកគេស្ថិតនៅលើយន្តហោះនោះឬអត់នោះទេ។
យោងតាមប្រព័ន្ធផ្សព្វផ្សាយរដ្ឋអ៊ីរ៉ង់ ការវាយប្រហារដោយដ្រូនចំនួន២លើក បានកំណត់គោលដៅទីស្នាក់ការកណ្តាលទូតអាមេរិកនៅប្រទេសអារ៉ាប៊ីសាអូឌីតកាលពីយប់មិញ។ អ៊ីរ៉ង់ក៏បានប្រកាសដែរថា អគារបុគ្គលិកអាមេរិកមួយក្នុងប្រទេសបារ៉ែនត្រូវបានបំផ្លាញ។ ជនបរទេសកំពុងភៀសខ្លួនចេញពីតំបន់មជ្ឈិមបូព៌ារាប់ពាន់នាក់ ខណៈដែលជម្លោះបង្ហូរឈាមបានឈានចូលថ្ងៃទី ៤ ហើយ។
យោងតាមគេហទំព័រតាមដានជើងហោះហើរ Flightradar24 បានបង្ហាញថា យន្តហោះឯកជន Bombadier Global Express របស់ប្រធានក្រុមជម្រើសជាតិព័រទុយហ្គាល់ និងក្រុម Al Nassr នៃលីគកំពូលអារ៉ាប៊ីសាអូឌីតវ័យ៤១ឆ្នាំរូបនេះ បានធ្វើដំណើរជិត ៧ ម៉ោងទៅកាន់ប្រទេសអេស្ប៉ាញ។
យន្តហោះដ៏ប្រណីតនេះ បានចាកចេញពីអារ៉ាប៊ីសាអូឌីតនៅម៉ោង ៨ យប់ថ្ងៃទី២ ខែមីនា ឆ្នាំ២០២៦ ហើយចុះចតនៅម៉ោងជិត ១ ទៀបភ្លឺ ឈានចូលថ្ងៃទី៣ ខែមីនា។ ជាមួយគ្នានោះ Flightradar24 ក៏បានបង្ហាញថា យន្តហោះម្ចាស់ពាន Ballon d’Or ៥ សម័យកាលរូបនេះ បានហោះហើរពីលើប្រទេសអេហ្ស៊ីប និងឆ្លងកាត់សមុទ្រមេឌីទែរ៉ាណេ មុនពេលចុះចតនៅទីក្រុងម៉ាឌ្រីដ ប្រទេសអេស្ប៉ាញ៕
ចែករំលែកព័តមាននេះ