រាជធានីភ្នំពេញ ៖ កំពូលជើងខ្លាំងក្របីព្រៃពេជ្រ សម្បត្តិបានប្រើកណ្ដាប់ដៃវាយកីឡាករB.AMGALANBAYAR មកពីប្រទេសម៉ុងហ្គោលី ឱ្យបោះបង់ការប្រកួតនៅត្រឹមទី៣ ក្នុងការប្រកួតដណ្ដើមខ្សែក្រវាត់ពិភពលោកនៅលសង្វៀនទូរទស្សន៍ថោនកាលពីថ្ងៃទី២៦ ខែមេសា ឆ្នាំ២០២៦ ។…
រាជធានីភ្នំពេញ ៖ កំពូលជើងខ្លាំងក្របីព្រៃពេជ្រ សម្បត្តិបានប្រើកណ្ដាប់ដៃវាយកីឡាករB.AMGALANBAYAR មកពីប្រទេសម៉ុងហ្គោលី ឱ្យបោះបង់ការប្រកួតនៅត្រឹមទី៣ ក្នុងការប្រកួតដណ្ដើមខ្សែក្រវាត់ពិភពលោកនៅលសង្វៀនទូរទស្សន៍ថោនកាលពីថ្ងៃទី២៦ ខែមេសា ឆ្នាំ២០២៦ ។
គូនេះប្រកួតគ្នានៅក្នុងប្រភេទទម្ងន់៦០គីឡូក្រាម ដែលធ្វើឡើងមានរយៈពេល៥ទឹក។ប៉ុន្តែក្របីព្រៃពេជ្រ សម្បត្តិបានប្រើធម៌ក្ដៅវាយបំបាក់ធ្មុងអ្នកប្រដាល់ជើងខ្លាំងមកពីប្រទេសម៉ុងហ្គោលីម្នាក់នេះឱ្យបោះបង់ការប្រកួតនៅត្រឹមទឹកទី៣ ដើម្បីក្លាយជាម្ចាស់ខ្សែក្រវាត់ពិភពលោក។
តាមការឱ្យដឹងពីគណៈកម្មការរៀបចំការប្រកួតរវាងគេទាំងពីរធ្លាប់បានប៉ះគ្នាម្ដងរួចមកហើយ កាលពីវគ្គប្រកួតវិលជុំដែលមានគ្នា៨នាក់។ប៉ុន្តែកាលណោះពេជ្រ សម្បត្តិបានត្រឹមយកឈ្នះពិន្ទុប៉ុណ្ណោះ។ហេតុដូចនេះហើយទើបធ្វើឱ្យកីឡាករម៉ុងហ្គោលីម្នាក់នេះនៅមិនទាន់អស់ចិត្តបានមកសំប្រកួតសងសឹក ជម្រះបញ្ជីគ្នាម្ដងទៀត។
តាមពិតកីឡាករB.AMGALANBAYARជនជាតិម៉ុងហ្គោលីម្នាក់នេះថ្វីដៃប្រកួតរបស់គេក៏មិនជាអន់នោះដែរ គេបានវាយសម្រុកយ៉ាងសន្ធាប់ទៅលើកីឡាករពេជ្រ សម្បត្តិតាំងពីទឹកទី១ ធ្វើឱ្យពេជ្រ សម្បត្តិជាពិសេសស្នៀតកែងកីឡាករម៉ុងហ្គោលីបានបុកត្រូវក្បាលពេជ្រ សម្បត្តិឱ្យបែកឈាមហូរពេញមុខ។ប៉ុន្តែស្នៀតកណ្ដាប់ដៃពេជ្រ សម្បត្តិក៏មិនអន់នោះដែរបានវាយបកសងវិញភ្លាមៗ។ចូលដល់ទឹកទី២កីឡាករម៉ុងហ្គោលីម្នាក់នេះនៅតែសម្រុកទាត់និងបុកស្នៀតជង្គង់កាន់តែសាហាវ ។
កីឡាករពេជ្រ សម្បត្តិដែលមានឈាមហូរពេញមុខនោះបានព្យាយាមវាយបកសងវិញ មិនទុកឱ្យកីឡាករម៉ុងហ្គោលីម្នាក់នេះបានសុខស្រួលឡើយ។និយាយរួមនៅក្នុងទឹកទី២គេទាំងពីរវាយបកសងទៅវិញទៅមកកាន់តែសាហាវលើសដើម។ទោះជាយ៉ាងណាចូលដល់ទឹកទី៣ពេជ្រ សម្បត្តិបានបញ្ជូនស្នៀតកណ្ដាប់ដៃស្ដាំយ៉ាងធ្ងន់វាយចូលគល់ធ្គាមខាងឆ្វេងកីឡាករB.AMGALANBAYARធ្វើឱ្យកីឡាករម៉ុងហ្គោលីម្នាក់នេះបោះបង់ចោលការប្រកួតតែម្ដង។ភ្លាមៗនោះកីឡាករម៉ុងហ្គោលីម្នាក់នេះត្រូវបានលោកគ្រូពេទ្យបញ្ជូនទៅមន្ទីរពេទ្យសង្គ្រោះបន្ទាន់ បន្ទាប់ពីបានពិនិត្យឃើញថាគល់ធ្គាមឆ្វេងបានបាក់។
កីឡាករពេជ្រ សម្បត្តិដែលត្រូវបានអ្នកតាមដានការប្រកួតភាគច្រើនមានការពេញចិត្តបំផុតនោះគឺស្នៀតកណ្ដាប់ដៃនេះតែម្ដង។ការយកឈ្នះនិងផ្ដួលគូប្រកួតឱ្យសន្លប់ជាហូរហែមកនោះគឺគ្មានអ្វីក្រៅពីស្នៀតកណ្ដាប់ដៃរបស់គេនោះទេ។ជាក់ស្ដែងជ័យជម្នះរបស់គេលើកនេះគឺការប្រើស្នៀតកណ្ដាប់ដៃស្ដាំបំបាក់កីឡាករម៉ុងហ្គោលីដើម្បីបានគ្រងតំណែងជាម្ចាស់ខ្សែក្រវាត់ពិភពលោកទម្ងន់៦០គីឡូក្រាម៕
ចែករំលែកព័តមាននេះ