រាជធានីភ្នំពេញ ៖ ក្នុងចំណោម៤ប្រភេទកីឡាដែលកម្ពុជាបានបញ្ជូនឱ្យទៅចូលរួមប្រកួតក្នុងព្រឹត្តិការណ៍កីឡាឆ្នេរខ្សាច់ជើងឯកអាស៊ីលើកទី៦(6th Asian Beach Games)នៅទីក្រុង Sanya ប្រទេសចិន កម្ពុជាដណ្ដើមបានមេដាយប្រាក់១គ្រឿងលើវិញ្ញាសាឯកត្តជននារីកីឡាអាគ័រត្លុងWomen Individual…
រាជធានីភ្នំពេញ ៖ ក្នុងចំណោម៤ប្រភេទកីឡាដែលកម្ពុជាបានបញ្ជូនឱ្យទៅចូលរួមប្រកួតក្នុងព្រឹត្តិការណ៍កីឡាឆ្នេរខ្សាច់ជើងឯកអាស៊ីលើកទី៦(6th Asian Beach Games)នៅទីក្រុង Sanya ប្រទេសចិន កម្ពុជាដណ្ដើមបានមេដាយប្រាក់១គ្រឿងលើវិញ្ញាសាឯកត្តជននារីកីឡាអាគ័រត្លុងWomen Individual Aquathlon(រត់និងហែល) កាលពីថ្ងៃទី២៣ ខែមេសា ។
កីឡាការិនី Margot Morokot ដែលជាកូនកាត់ខ្មែរ-បារាំង ជាអ្នកដណ្ដើមបានមេដាយខាងលើឱ្យកម្ពុជា ក្នុងចំណោមកីឡាការិនី២៧រូបមកពី១៥ប្រទេស។ ការឈ្នះមេដាយ១គ្រឿងពេលនេះជារឿងគួរឱ្យអបអរខ្លាំងណាស់ ដោយសារវាបានធ្វើឱ្យកម្ពុជាក្លាយជាប្រទេសសមាជិកអាស៊ានមុនគេដែលឈ្នះមេដាយកីឡាឆ្នេរខ្សាច់ប្រចាំទ្វីបអាស៊ី។
ព្រឹត្តិការណ៍កីឡាឆ្នេរខ្សាច់អាស៊ីលើកទី៦ដែលបានប្រារព្ធធ្វើឡើងនៅទីក្រុងSanya ប្រទេសចិនប្រភេទកីឡាជឺជិតស៊ូបានឡើងទៅដល់វគ្គ១៦ក្រុមហើយ ។ នេះបើតាមការឱ្យដឹងពីឯកឧត្តមវ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជាដែលជាប្រធានប្រតិភូដឹកនាំអត្តពលិកជម្រើសជាតិកម្ពុជាទៅចូលរួមប្រកួត។
ក្នុងព្រឹត្តិការណ៍កីឡាខាងលើ កម្ពុជាបានបញ្ជូនប្រតិភូ គ្រូបង្វឹក គ្រូជំនួយ និងកីឡាករ កីឡាការិនី៤ប្រភេទកីឡាដែលមានចំនួន៣២រូបឱ្យទៅចូលរួមប្រកួតមានជឺជីតស៊ូ ទ្រីអាត្លុង បាល់ទាត់លើតុ និងចំបាប់ ។ ប្រទេសចិនដែលជាម្ចាស់ផ្ទះបានដាក់១៤ប្រភេទកីឡាឱ្យកីឡាករ-កីឡាការិនីចំនួន៣៧៩៨នាក់មកពី៤៥ប្រទេសប្រកួតប្រជែងដណ្ដើមមេដាយចាប់ពីថ្ងៃទី២២ដល់៣០ មេសា ឆ្នាំ២០២៦។
ឯកឧត្ដម វ៉ាត់ ចំរើន បន្តថា នេះជាលើកទី៦ហើយដែលក្រុមអត្តពលិកជម្រើសជាតិកម្ពុជាបានចូលរួមព្រឹត្តិការណ៍កីឡាលើឆ្នេរខ្សាច់។ អ្វីដែលខុសប្លែកពីលើកមុនៗ គឺការចូលរួមឆ្នាំនេះមជ្ឈមណ្ឌលជាតិហ្វឹកហ្វឺនកីឡា និងអគ្គនាយកដ្ឋានកីឡានៃក្រសួងអប់រំ យុវជន និងកីឡា បានសម្រេចបញ្ជូនអត្តពលិកតែ៤ប្រភេទកីឡាប៉ុណ្ណោះ ដើម្បីរួមចំណែកជាមួយរាជរដ្ឋាភិបាលក្នុងការកាត់បន្ថយចំណាយ ។ ឯកឧត្ដមសង្ឃឹមថា កម្ពុជានឹងអាចទទួលបានលទ្ធផលជាទីគាប់ចិត្តវិលត្រឡប់មកមាតុភូមិវិញ។
ឯកឧត្ដម វ៉ាត់ ចំរើន បានថ្លែងអំណរគុណដល់រាជរដ្ឋាភិបាល និងឯកឧត្ដមបណ្ឌិតសភាចារ្យហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ដែលបានផ្ដល់ឱកាសដល់ក្រុមអត្តពលិកចូលរួមប្រកួត ទោះបីកាលៈទេសៈសេដ្ឋកិច្ចសកលមិនសូវអំណោយផល ដើម្បីរក្សាបាននូវសិទ្ធិជាសមាជិកភាពរបស់ចលនាអូឡាំពិកអាស៊ី ហើយក៏នឹងពិនិត្យលទ្ធភាពក្នុងការចូលរួមនៅ៤ឆ្នាំទៀត នៅក្រុង Cebu ប្រទេសហ្វីលីពីន។
សូមរំលឹកថា ក្នុងការចូលរួមលើកចុងក្រោយបង្អស់ កម្ពុជាទទួលបានមេដាយមាស៦គ្រឿង ប្រាក់៦គ្រឿង និងសំរឹទ្ធ៩គ្រឿងពីព្រឹត្តិការណ៍កីឡាលើឆ្នេរខ្សាច់ជើងឯកអាស៊ី កាលពីឆ្នាំ២០១៦ ដែលពេលនោះបានប្រព្រឹត្តទៅនៅក្រុង Da Nang ប្រទេសវៀតណាម ៕
ចែករំលែកព័តមាននេះ