ប្រទេស​អេ​ស្ប៉ា​ញ ៖ កីឡាករ Kylian Mbappé បាន​បំបែក​កំណត់​ត្រា​របស់​កីឡាករ Cristiano Ronaldo នៅ Real Madrid ប៉ុន្តែ​មិន​អាច​ជួយ​ក្រុម​រហស្សនាម​ស្តេច​ស​មួយ​នេះ ឈ្នះ​ជើងឯក​ពានរង្វាន់ Copa del Rey រដូវ​កាល ២០២៤-២៥ បាន​ឡើយ បន្ទាប់​ពី​ចាញ់​ក្រុម​អ្នកមាន​បុណ្យ Barcelona នៅ​ក្នុង​លទ្ធផល ៣​ទល់​នឹង​២ កាលពី​ថ្ងៃ​ទី​២៦ ខែមេសា ឆ្នាំ​២០២៥​។

ជំនួប El Clásico វគ្គ​ផ្តាច់ព្រ័ត្រ​ពានរង្វាន់ Copa del Rey រដូវ​កាល ២០២៤-២៥ ដែល​ធ្វើ​ឡើង​នៅ​កីឡដ្ឋាន La Cartuja ទីក្រុង​សេ​វី​ល (Seville) បាន​បិទ​បញ្ចប់​ទៅ​ដោយ​ក្រុម Barcelona គឺជា​ម្ចាស់​ជើងឯក និង​ជា​ការ​ឈ្នះ​លើក​ទី​៣២​របស់​ខ្លួន ដើម្បី​ឈរ​ជា​ក្រុម​ឈ្នះ​ពានរង្វាន់​នេះ​ច្រើន​ជាងគេ បន្ទាប់​យកឈ្នះ​ក្រុម Real Madrid នៅ​ក្នុង​ការ​ប្រកួត​ដែល​ត្រូវ​បន្ថែម​ម៉ោង​១៥​នាទី​២​ដង ដោយ​លទ្ធផល ៣-២ ក្រោយ​ចប់​៩០​នាទី​ស្មើនឹង​គ្នា​លទ្ធផល ២-២​។ ជ័យជម្នះ​របស់​ក្រុម​លោក Hansi Flick សម្រេច​បាន​ដោយ​កីឡាករ Pedri, Ferran Torres និង Jules Koundé ចំណែក​២​គ្រាប់​របស់​ក្រុម​លោក Carlo Ancelotti រកបាន​ដោយ​កីឡាករ Kylian Mbappé និង Aurélien Tchouaméni​។

ដោយឡែក ខ្សែប្រយុទ្ធ Kylian Mbappé បាន​រក​គ្រាប់​បាល់​បញ្ចូល​ទី​តាម​រយៈ​ការ​ទាត់​ហ្វ្រី​ឃី​កដោយ​ផ្ទាល់​មួយ​ជើង​បញ្ចូល​ទី ដែល​ភាសា​បច្ចេកទេស​ហៅ​ថា Direct Free-kick ជា​លើក​ដំបូង​ក្នុង​អាជីព​របស់​ខ្លួន​នៅ​នាទី​៧០​ទល់​នឹង Barcelona កាលពី​ថ្ងៃ​ទី​២៦ ខែមេសា កន្លង​ទៅ ដ្បិត​ហ្វ្រី​ឃី​កដោយ​ផ្ទាល់​១​គ្រាប់​ពី​ខ្សែប្រយុទ្ធ​សញ្ជាតិ​បារាំង​រូប​នេះ គឺជា​គ្រាប់​បាល់​ទី​៣៤​របស់​គេ​ចាប់តាំងពី​ផ្លាស់​ពី PSG មក​ចូលរួម​ជាមួយ Real Madrid កាលពី​ខែមិថុនា ឆ្នាំ​២០២៤ ដែល​ជា​រដូវ​កាល​ដំបូង​របស់​ខ្លួន ដោយ​បាន​បំបែក​កំណត់​ត្រា​ខ្សែប្រយុទ្ធ​ព័រ​ទុ​យ​ហ្គា​ល់ Cristiano Ronaldo និង​ខ្សែប្រយុទ្ធ​ហូ​ឡង់ Ruud van Nistelrooy ដែល​រកបាន​៣៣​គ្រាប់​ដូច​គ្នា នៅ​រដូវ​កាល​ដំបូង​ជាមួយ Real Madrid​។

ទោះ​យ៉ាងណា​ក៏​ដោយ Mbappé ត្រូវការ​៤​គ្រាប់​ថែម​ទៀត ដើម្បី​អាច​បំបែក​កំណត់​ត្រា​លោក Iván Zamorano ខ្សែប្រយុទ្ធ​សញ្ជាតិ​ស៊ី​លី ដែល​រកបាន​៣៧​គ្រាប់​នៅ​រដូវ​កាល​ដំបូង​របស់​លោក ១៩៩២-៩៣ ជាមួយ Real Madrid៕ ប្រភព ៖ Onefootball, Bleacher Report Football, LiveScore និង Znews