ប្រទេសហ្វីលីពីន ៖ ស្តេចប្រដាល់ហ្វីលីពីន ម៉ានី ប៉ាក់គីអៅ (Manny Pacquiao) នឹងពិចារណាវិលឡើងសង្វៀនអាជីពវិញ ពោលក្រោយការបោះឆ្នោតពាក់កណ្តាលអាណត្តិជ្រើសរើសសមាជិកស្ថាប័ននីតិបញ្ញតិ្តនៅហ្វីលីពីន ថ្ងៃទី១២…
ប្រទេសហ្វីលីពីន ៖ ស្តេចប្រដាល់ហ្វីលីពីន ម៉ានី ប៉ាក់គីអៅ (Manny Pacquiao) នឹងពិចារណាវិលឡើងសង្វៀនអាជីពវិញ ពោលក្រោយការបោះឆ្នោតពាក់កណ្តាលអាណត្តិជ្រើសរើសសមាជិកស្ថាប័ននីតិបញ្ញតិ្តនៅហ្វីលីពីន ថ្ងៃទី១២ ខែឧសភា ខាងមុខនេះ។ នេះបើតាមការបង្ហើបឱ្យដឹងពីទីប្រឹក្សា និងជាប្រធានក្រុមហ៊ុនផ្សព្វផ្សាយរបស់ប៉ាក់គីអៅ ផ្ទាល់។
ម៉ានី ប៉ាក់គីអៅ វ័យ៤៦ឆ្នាំ ដែលជាអ្នកប្រដាល់សកលតែម្នាក់នៅក្នុងប្រវត្តិសាស្ត្រឈ្នះខ្សែក្រវាត់ពិភពលោកលើ៨ប្រភេទទម្ងន់ផ្សេងគ្នា និងជាអ្នកប្រដាល់តែម្នាក់គត់ដែលកាន់កាប់ខ្សែក្រវាត់ពិភពលោកយូរជាងគេក្នុងរយៈពេល៤ទសវត្សរ៍នោះ បានចូលនិវត្តន៍កាលពីឆ្នាំ ២០២១ ពោលអវត្តមានពីសង្វៀនអាជីពអស់ពេលជិត៤ឆ្នាំ ចាប់តាំងពីការចាញ់ចុងក្រោយ ក្រោមស្នាដៃអ្នកប្រដាល់សញ្ជាតិអាមេរិក Yordenis Ugás កាលពីខែសីហា ឆ្នាំ២០២១ ប៉ុន្តែជាបន្តបន្ទាប់លោកតែងតែទទួលបានសំណើពីការប្រកួតធំៗជាច្រើន ចាប់តាំងពីពេលនោះមក។
ប៉ាក់គីអៅ ត្រូវបានផ្សារភ្ជាប់យ៉ាងខ្លាំងទៅនឹងការប៉ះគ្នាជាមួយអ្នកប្រដាល់ឆ្នើមសញ្ជាតិអាមេរិក Mario Barrios ដោយប៉ាក់គីអៅផ្ទាល់ធ្លាប់បានថ្លែងថា លោកកំពុងពិភាក្សាលើកិច្ចព្រមព្រៀងដើម្បីប្រកួតជាមួយកីឡាករវ័យ២៩ឆ្នាំ Mario Barrios ដណ្តើមខ្សែក្រវាត់ពិភពលោក WBC welterweight ហើយបើការពិភាក្សាសម្រេចចេញជាផ្លែផ្កា ការប្រកួតនឹងធ្វើឡើងនៅចុងឆ្នាំ ២០២៤ ប៉ុន្តែអ្វីៗមិនបានសម្រេចរហូតមកទល់ពេលនេះ។
ចាប់តាំងពីចូលនិវត្តន៍រហូតមកទល់ពេលនេះ ប៉ាក់គីអៅ បានឡើងសង្វៀនប្រកួតចំនួន២លើក ដែលជាការប្រកួតមិនអាជីព។ លើកទី១ បានឈ្នះគ្រូក្បាច់គុនជនជាតិកូរ៉េខាងត្បូង កាលពីខែធ្នូ ឆ្នាំ២០២២ មុនពេលឈ្នះស្មើការប្រកួតជាមួយកីឡាករឃីកបុកស៊ីង (Kickboxing) និងជាអ្នកលេងគុនចម្រុះជនជាតិជប៉ុន Rukiya Anpo កាលពីខែកក្កដា ឆ្នាំ២០២៤។
យ៉ាងណាមិញ លោក Sean Gibbons ទីប្រឹក្សា និងជាប្រធានក្រុមហ៊ុនផ្សព្វផ្សាយរបស់ប៉ាក់គីអៅ បានប្រាប់ទស្សនាវដ្តី The Ring កាលពីថ្មីៗនេះថា ស្តេចប្រដាល់ហ្វីលីពីននឹងពិចារណាឡើងវិញនូវអាជីពប្រដាល់របស់លោក ហើយលទ្ធផលជម្រើសនឹងកើតឡើងនៅក្នុងពេលឆាប់ៗខាងមុខនេះ បន្ទាប់ពីការបោះឆ្នោតព្រឹទ្ធសភាហ្វីលីពីនបញ្ចប់។ លោក Gibbons បានថ្លែងថា «បន្ទាប់ពីការបោះឆ្នោតថ្ងៃទី១២ ខែឧសភា ប្រសិនបើប៉ាក់គីអៅ ក្លាយជាសមាជិកព្រឹទ្ធសភាសម្រាប់អាណត្តិទីពីរ នោះគាត់នឹងសម្រេចចិត្តថា តើគាត់ចង់ត្រឡប់មកកាន់ការប្រដាល់អាជីពម្តងទៀតឬអត់? ខ្ញុំប្រាថ្នាចង់មានច្រើនជាងនេះ ប៉ុន្តែប៉ាក់គីអៅស្ថិតក្នុងការប្រកួតប្រជែងដ៏តឹងតែង ហើយរឿងចុងក្រោយដែលគាត់មានក្នុងការគិតនៅពេលនេះគឺការប្រដាល់»។
លោក Gibbons បានលើកឡើងកាលពីឆ្នាំមុនថា ការប្រកួតជាមួយ Barrios គឺជាការប្រកួតដែលប៉ាក់គីអៅអាចយកឈ្នះបាន និងជាការប្រកួតដ៏ល្អឥតខ្ចោះសម្រាប់គាត់ លោកបានបន្ថែមថា ប៉ាក់គីអៅអាចប្រដាល់រហូតដល់គាត់មានអាយុ៥០ឆ្នាំ»៕
ចែករំលែកព័តមាននេះ