សហរដ្ឋអាមេរិក ៖ ព្រឹត្តិការណ៍​បាល់ទាត់​ពិភពលោក FIFA World Cup ឆ្នាំ ២០២៦ អាច​ត្រូវ​បាន​ពន្យារពេល ប្រសិនបើ​ជម្លោះ​នៅ​មជ្ឈិមបូព៌ា​រីក​រាលដាល​ដល់​តំបន់​អឺរ៉ុប ឬ​អា​មេ​រិ​ក​ខាងជើង ដែល​បង្កើត​ហានិភ័យ​សន្តិសុខ​ធ្ងន់ធ្ងរ​ដល់​ការ​ប្រកួត​កីឡា​ដ៏​ធំ​បំផុត​នៅ​ក្នុង​ប្រវត្តិសាស្ត្រ​មួយ​នេះ​។

បើ​យោង​តាម​សាស្ត្រាចារ្យ Simon Chadwick អ្នកជំនាញ​ដែល​បាន​ចូលរួម​ក្នុង​ការ​វាយតម្លៃ និង​ស្រាវជ្រាវ​លើ​ព្រឹត្តិការណ៍ FIFA World Cup ឆ្នាំ​២០២២ បាន​លើក​ឡើង​ថា សេណា​រី​យ៉ូ​នៃ​ការ​ពន្យារពេល​ការ​ប្រកួត​គឺ​មិន​ទំនង​ទាល់តែ​សោះ​។ លោក​ជឿជាក់​ថា ការ​ផ្លាស់​ប្តូរ​កាលវិភាគ​នៃ​ព្រឹត្តិការណ៍​កីឡា​សកល​ទ្រង់ទ្រាយ​ធំ​មួយ​ក្នុង​រយៈពេល​ប៉ុន្មាន​ខែ​មុន​ពេល​បើក​ការ​ប្រកួត នឹង​បង្កើត​បញ្ហា​ប្រឈម​ដ៏​ធំ​សម្បើម​ទាំង​ផ្នែក​ភស្តុ​ភារ ហិរញ្ញវត្ថុ និង​នយោបាយ​។

ទោះជា​យ៉ាងណា​ក៏​ដោយ លោក Chadwick ក៏​បាន​សង្កត់ធ្ងន់​ផង​ដែរ​ថា ស្ថានភាព​អាច​កាន់តែ​អាក្រក់​ទៅ​ៗ ប្រសិនបើ​ជម្លោះ​រីក​រាលដាល​ដល់​អឺរ៉ុប ឬ​អា​មេ​រិ​ក​ខាងជើង​បណ្តាល​ឱ្យ​មានការ​រំខាន​ដល់​ការ​ធ្វើ​ដំណើរ​តាម​ផ្លូវអាកាស ឬ​ប៉ះពាល់​យ៉ាងធ្ងន់ធ្ងរ​ដល់​ការ​ផ្គត់ផ្គង់​ប្រេង ហើយ​នៅ​ពេល​នោះ សហព័ន្ធ​បាល់ទាត់​ពិភពលោក (FIFA) អាច​បង្ខំ​ឱ្យ​ពិចារណា​ពន្យារពេល​ព្រឹត្តិការណ៍ World Cup ឆ្នាំ​២០២៦​។

ភាព​តានតឹង​ភូមិសាស្ត្រ​នយោបាយ​កាន់តែ​ខ្លាំង​ឡើង​រវាង​សហរដ្ឋអាមេរិក អ៊ី​ស្រា​អែ​ល និង​អ៊ី​រ៉​ង់ បាន​បង្កើន​ការ​ព្រួយបារម្ភ​អំពី​ផល​ប៉ះពាល់​នៃ​ជម្លោះ​ទៅ​លើ​ព្រឹត្តិការណ៍ World Cup ឆ្នាំ​២០២៦​។ មន្ត្រី​បាល់ទាត់​អ៊ី​រ៉​ង់​មួយ​ចំនួន​បាន​លើក​ឡើង​ថា ក្រុម​ជម្រើសជាតិ​ពួក​គេ​អាច​ពិបាក​ក្នុង​ការ​ចូលរួម​ព្រឹត្តិការណ៍​ដែល​សហរដ្ឋអាមេរិក កា​ណា​ដា និង​ម៉ិ​ក​ស៊ិ​ក​ធ្វើ​ជា​ម្ចាស់​រួម​គ្នា ដែល​នឹង​ចាប់ផ្តើម​នៅ​ថ្ងៃ​ទី​១១ ខែមិថុនា រហូត​ដល់​ថ្ងៃ​ទី​១៩ ខែកក្កដា ឆ្នាំ​២០២៦​។

នៅ​ក្នុង​វគ្គ​ចែក​ពូ​ល អ៊ី​រ៉​ង់​ត្រូវ​តទល់​នឹង​នូ​វែ​ល​សេ​ឡង់ បែ​ល​ហ្ស៊ិ​ក និង​អេ​ហ្ស៊ី​ប ដែល​ការ​ប្រកួត​ធ្វើ​ឡើង​ទឹកដី​សហរដ្ឋអាមេរិក​។ នេះ​បង្កើន​ក្តី​បារម្ភ​ពី​សន្តិសុខ និង​ការ​រឹត​បន្តឹង​ការ​ធ្វើ​ដំណើរ ដោយសារ​ពលរដ្ឋ​អ៊ី​រ៉​ង់​បច្ចុប្បន្ន​ត្រូវ​បាន​រឹតត្បិត​មិន​ឱ្យ​ចូល​ទឹក​សហរដ្ឋអាមេរិក ក្រោម​គោលនយោបាយ​គ្រប់គ្រង​ការ​ធ្វើ​ដំណើរ​មួយ​ចំនួន​របស់​រដ្ឋបាល​លោក ត្រាំ​។

បើ​ទោះបីជា​ការ​លើក​ឡើង​បែប​នេះ ប៉ុន្តែ​ដោយ​មើលទៅ​លើ​កាលៈទេសៈ​បច្ចុប្បន្ន ភាគ​ដ៏​ខ្ពស់​នៃ​លទ្ធភាព​ព្រឹត្តិការណ៍ World Cup ឆ្នាំ ២០២៦ នឹង​ដំណើរការ​ទៅ​តាម​ការ​គ្រោងទុក​។ កាលពី​ថ្ងៃ​ទី​៣ ខែមីនា ឆ្នាំ​២០២៦ លោក JT Batson នាយក​ប្រតិបត្តិ​បាល់ទាត់​សហរដ្ឋអាមេរិក​បាន​ប្រាប់​កាសែត Sky News ថា «​លោក Gianni Infantino ប្រធាន FIFA បាន​ចែករំលែក​កាលពី​អំពី​ចេតនា​នៃ​ព្រឹត្តិការណ៍ World Cup ដ៏​មាន​សុវត្ថិភាព ដែល​ក្រុម​ទាំងអស់​កំពុង​ចូលរួម ហើយ​យើង​ពិតជា​គាំទ្រ​យ៉ាង​ខ្លាំង​ចំពោះ​រឿង​នោះ​»​។

ការ​ប្រកួត​បើក​ឆាក​ត្រូវ​បាន​គ្រោងទុក​នឹង​ធ្វើ​ឡើង​នៅ​ទីក្រុង​ម៉ិ​ក​ស៊ិ​កស (Mexico City) នៅ​ពេល​ម្ចាស់ផ្ទះ​ម៉ិ​ក​ស៊ិ​ក​ត្រូវ​តទល់​ជាមួយ​អាហ្វ្រិក​ខាងត្បូង ខណៈ​ការ​ប្រកួត​សរុប​ចំនួន ១០៤ នឹង​ត្រូវធ្វើ​ឡើង​នៅ​ទូ​ទាំង​ប្រទេស​សហ​ម្ចាស់ផ្ទះ​ទាំង ៣ ដោយ​ក​សហរដ្ឋអាមេរិក​ធ្វើ​ជា​ម្ចាស់ផ្ទះ​ចំនួន ៧៨ ប្រកួត រួម​ទាំង​វគ្គ​ផ្តាច់ព្រ័ត្រ​ផង​ដែរ​៕ ប្រភព ៖ SPORTbible និង Znews