AFF Championship 2022 ៖ ថៃបង្កើនកំណត់ត្រាឈ្នះជើងឯក ក្រោយផ្តួលវៀតណាម
ថៃ ៖ ក្រុមបាល់ទាត់ជម្រើសជាតិថៃ ក្រោមការដឹកនាំរបស់គ្រូបង្វឹកសញ្ជាតិប្រេស៊ីល លោក Alexandre
ថៃ ៖ ក្រុមបាល់ទាត់ជម្រើសជាតិថៃ ក្រោមការដឹកនាំរបស់គ្រូបង្វឹកសញ្ជាតិប្រេស៊ីល លោក Alexandre
ថៃ ៖ ក្រុមបាល់ទាត់ជម្រើសជាតិថៃ ក្រោមការដឹកនាំរបស់គ្រូបង្វឹកសញ្ជាតិប្រេស៊ីល លោក Alexandre Polking បានក្លាយជាម្ចាស់ជើងឯកពានរង្វាន់ AFF Mitsubishi Electric Cup 2022 បន្ទាប់ពីយកឈ្នះក្រុមជម្រើសជាតិវៀតណាម ក្រោមការដឹកនាំរបស់គ្រូបង្វឹកសញ្ជាតិកូរ៉េខាងត្បូង លោក Park Hang-seo នៅក្នុងការប្រកួតជើងទី២ នៅឯកីឡដ្ឋាន Thammasat នៅក្នុងលទ្ធផល ១-០ កាលពីថ្ងៃទី១៦ ខែមករា ឆ្នាំ២០២៣។ ខណៈជើងទី១ នៅឯទឹកដីវៀតណាម បញ្ចប់ទៅដោយលទ្ធផលស្មើគ្នា ២-២ ដូច្នេះថៃឈ្នះដោយលទ្ធផល ៣-២។
១គ្រាប់ជ័យជម្នះរបស់ថៃ សម្រេចបានដោយប្រធានក្រុម Theerathon Bunmathan នៅនាទី២៤ ក្នុងវគ្គទី១ តាមរយៈការស៊ុតពីលើដំបូលទូកបញ្ចូលទីបានយ៉ាងអស្ចារ្យកក្រើកកីឡដ្ឋាន Thammasat ដែលមានមូលដ្ឋានក្នុងខេត្ត Pathum Thani ដើម្បីនាំក្រុមរហស្សនាម «ដំរីសឹក» មួយនេះ ឈ្នះជើងឯក AFF Mitsubishi Electric Cup 2022 និងជាលើកទី៧ ដើម្បីបន្តកំណត់ត្រាជាក្រុមឈ្នះជើងឯកពានរង្វាន់បុរសប្រចាំតំបន់អាស៊ានមួយនេះ ច្រើនជាងគេបំផុត។
ខ្សែប្រយុទ្ធថៃ Teerasil Dangda និងខ្សែប្រយុទ្ធវៀតណាម Nguyen Tien Linh បានជាប់ឈ្មោះជាអ្នករកគ្រាប់បាល់ច្រើនជាងគេប្រចាំព្រឹត្តិការណ៍ AFF Mitsubishi Electric Cup 2022 (Top Scorer) បន្ទាប់ពីបញ្ចប់ទៅមាន ៦គ្រាប់ដូចគ្នា ។ ខណៈដែលប្រធានក្រុមថៃ Theerathon Bunmathan ឈ្នះពានរង្វាន់កិត្តិយស MVP ប្រចាំព្រឹត្តិការណ៍ឆ្នាំនេះ ផងដែរ។
ជំនួបកាលពីថ្ងៃទី១៦ ខែមករា គឺជាការដឹកនាំលើកចុងក្រោយរបស់លោក Park Hang-seo ក្នុងនាមជាគ្រូបង្វឹកក្រុមជម្រើសជាតិវៀតណាម ដោយកុងត្រារបស់គាត់នឹងអស់សុពលភាព នៅថ្ងៃទី៣១ ខែមករា ឆ្នាំ២០២៣ ខាងមុននេះ បន្ទាប់ពីចំណាយពេល៥ឆ្នាំជាមួយក្រុមរហស្សនាម «អ្នកចម្បាំងផ្កាយមាស» មួយនេះ ដោយបានឈ្នះពានរង្វាន់ AFF Championship 2018 និងមេដាយមាសព្រឹត្តិការណ៍ស៊ីហ្គេម (Southeast Asian Games) ២ដង (២០១៩,២០២១)។
គួរបញ្ជាក់ថា ពានរង្វាន់បុរសប្រចាំតំបន់អាស៊ាន ត្រូវបានបង្កើតឡើងលើកដំបូងនៅក្នុងឆ្នាំ១៩៩៦ ដោយតម្រូវធ្វើការប្រកួត២ឆ្នាំម្តង។ ចាប់ពីឆ្នាំ១៩៩៦ រហូតដល់ឆ្នាំ ២០២២ ពានរង្វាន់នេះ បានផ្លាស់ប្តូរឈ្មោះចំនួន៣ដង ដែលរួមមាន Tiger Cup, AFF Suzuki Cup និងចុងក្រោយ AFF Mitsubishi Electric Cup ដែលត្រូវបានប្តូរនៅក្នុងឆ្នាំ ២០២២។ រយៈពេល២៧ឆ្នាំកន្លងមកនេះ ថៃ គឺក្រុមដែលឈ្នះជើងឯកច្រើនជាងគេបំផុត ពោលគឺចំនួន ៧ដង ចំណែកសិង្ហបុរីឈ្នះ ៤ដង វៀតណាមឈ្នះ ២ដង និងម៉ាឡេស៊ីលឈ្នះ ១ដង ខណៈដែលឥណ្ឌូណេស៊ី ជាក្រុមឈានដល់វគ្គផ្តាច់ព្រ័ត្រច្រើនជាងគេ ពោលចំនួន ៦ដង ប៉ុន្តែពុំដែលឈ្នះជើងឯកឡើយ៕ (ដកស្រង់ចេញពី ASEAN FOOTBALL)
ចែករំលែកព័តមាននេះ