ប្រទេសចិន ៖ អ្នករត់ម៉ារ៉ាតុងចំនួន១០នាក់ ត្រូវបានហាមឃាត់មិនឱ្យចូលរួមប្រកួតរយៈពេល៣ឆ្នាំ ដោយស្ថាប័នអត្តពលកម្មកំពូលរបស់ប្រទេសចិន បន្ទាប់ពីពួកគេត្រូវបានរកឃើញថាបានបត់ជើងតូចនៅទីសាធារណៈ អំឡុងពេលការប្រកួតព្រឹត្តិការណ៍ Suzhou Marathon ឆ្នាំ…
ប្រទេសចិន ៖ អ្នករត់ម៉ារ៉ាតុងចំនួន១០នាក់ ត្រូវបានហាមឃាត់មិនឱ្យចូលរួមប្រកួតរយៈពេល៣ឆ្នាំ ដោយស្ថាប័នអត្តពលកម្មកំពូលរបស់ប្រទេសចិន បន្ទាប់ពីពួកគេត្រូវបានរកឃើញថាបានបត់ជើងតូចនៅទីសាធារណៈ អំឡុងពេលការប្រកួតព្រឹត្តិការណ៍ Suzhou Marathon ឆ្នាំ ២០២៥ នៅទីក្រុងស៊ូចូវ (Suzhou) ខេត្តជាំងស៊ូ (Jiangsu) ដែលបង្កឱ្យមានការផ្ទុះកំហឹងយ៉ាងខ្លាំងពីសំណាក់ប្រជាជនចិន។ នេះបើតាមប្រភពពីសារព័ត៌មាន VnExpress បានចេញផ្សាយកាលពីថ្ងៃទី២ ខែឧសភា ឆ្នាំ២០២៥។
អ្នករត់ទាំង១០នាក់ ត្រូវបានគេថតជាប់កំពុងឈរបត់ជើងតូចនៅទីសាធារណៈ រួមទាំងលើផ្លាកឈ្មោះសាលារៀន និងលើផើងផ្កា សួនផ្កាដែលនៅជាប់បង្គន់សាធារណៈ អំឡុងពេលប្រកួតកាលពីថ្ងៃទី២ ខែមីនា ឆ្នាំ២០២៥ កន្លងទៅ ហើយវីដេអូត្រូវបានបង្ហោះ និងចែកចាយពាសពេញបណ្ដាញទំនាក់ទំនងសង្គមចិន។ សកម្មភាពអវិជ្ជមាននេះ បានទាក់ទាញការរិះគន់ភ្លាមៗជាពិសេស ដោយសារបង្គន់ចល័តសាធារណៈជាច្រើនដែលផ្តល់ដោយអ្នករៀបចំព្រឹត្តិការណ៍ ស្ថិតនៅចម្ងាយត្រឹមតែប៉ុន្មានម៉ែត្រប៉ុណ្ណោះ។
ជាលទ្ធផលសមាគមអត្តពលិកចិន បានកំណត់អត្តសញ្ញាណអ្នកចូលរួមរត់ដែលប្រព្រឹត្តល្មើស ហើយបានដាក់បំរាមរយៈពេលបីឆ្នាំ នេះបើយោងតាមប្រភពពី What’s On Weibo បានចេញផ្សាយ។ សមាគមបានបញ្ជាក់ក្នុងសេចក្តីប្រកាសព័ត៌មានថា «យើងសង្ឃឹមថា អ្នកចូលរួម និងភាគីពាក់ព័ន្ធទាំងអស់ចាត់ទុករឿងនេះជាមេរៀនមួយ»។ ដ្បិតការបត់ជើងតូចនៅតាមទីសាធារណៈក្នុងក្រុងស៊ូចូវ ខេត្តជាំងស៊ូ ត្រូវផាកពិន័យជាប្រាក់ចំនួន១ពាន់យន់ ឬ ១៣៧ដុល្លារអាមេរិក។
បន្ថែមពីលើការដាក់ពិន័យអ្នកចូលរួមរត់ សមាគមបានដកហូតវិញ្ញាបនប័ត្រផ្លូវការរបស់ព្រឹត្តិការណ៍ Suzhou Marathon សម្រាប់ឆ្នាំ ២០២៦ នាពេលខាងមុខ ដោយបានដកព្រឹត្តិការណ៍ដ៏ធំមួយនេះ ចេញពីកាលវិភាគរត់ម៉ារ៉ាតុងផ្លូវការប្រចាំឆ្នាំរបស់សមាគម។
បញ្ហាដែលបានកើតឡើងនៅក្នុងព្រឹត្តិការណ៍ Suzhou Marathon កាលពីពេលថ្មីៗនេះ បានធ្វើឱ្យអ្នកលេងបណ្តាញសង្គមរំលឹកឡើងអំពីរឿងដ៏ចម្រូងចម្រាសស្រដៀងគ្នានឹងព្រឹត្តិការណ៍រត់ Beijing Marathon កាលពីឆ្នាំ ២០១៣ នៅទីក្រុងប៉េកាំង ដែលអ្នកចូលរួមជាច្រើនត្រូវបានបង្ខំចិត្តបត់ជើងតូចនៅតាមទីសាធារណៈ ដោយសារតែមានបង្គន់មិនគ្រប់គ្រាន់។ ចាប់តាំងពីពេលនោះមក អ្នករៀបចំព្រឹត្តិការណ៍នេះបានបន្ថែមចំនួនបង្គន់ចល័តយ៉ាងច្រើន។
សូមជម្រាបថា Suzhou Marathon គឺជាព្រឹត្តិការណ៍រត់ម៉ារ៉ាតុងលំដាប់កំពូលមួយផងដែររបស់ប្រទេសចិន ដែលត្រូវបានបញ្ជាក់ជាផ្លូវការដោយសហព័ន្ធអត្តពលកម្មចិន និងរៀបចំដោយរដ្ឋាភិបាលក្នុងតំបន់ ខណៈដែលការរត់ឆ្នាំនេះបានទាក់ទាញអ្នកចុះឈ្មោះចូលរួមជាង១៦ម៉ឺននាក់ឯណោះ៕
ចែករំលែកព័តមាននេះ