ខេត្តតាកែវ ៖ មិនទាន់មានដំណោះស្រាយសមស្របណាមួយពីសំណាក់មន្ត្រីគយនៅច្រកទ្វារអន្តរជាតិភ្នំដិន ទៅក្រុមអាជីវករដែលទទួចសុំការយោគយល់លើតម្លៃពន្ធដែលពួកគាត់ត្រូវបង់យ៉ាងក្រាសក្រែលនាពេលនេះ ព្រោះតែវាខុសពីជំនាន់មេគយបាន ព្រោះតែវាខុសពីជំនាន់មេគយ។ សូមរំលឹកថា៖ ដូរមេគយខេត្តថ្មីមិនបានប៉ុន្មានផង ដំឡើងតម្លៃពន្ធអាជីវករទំនិញចេញ-ចូលពីវៀតណាមទ្វេគុណ
![](https://kohsantepheapdaily.com.kh/wp-content/uploads/2022/11/cd8e9e804c040fdc05dacefe6f70d637.jpg)
គិតមកដល់ថ្ងៃទី០៤ ខែវិច្ឆិកា ឆ្នាំ២០២៣ នេះ ក្រុមអាជីវកររាប់រយនាក់ដែលប្រកបរបរដឹកទំនិញចេញពីប្រទេសវៀតណាម តាមច្រកទ្វាអន្តរជាតិភ្នំដិន ស្រុកគីរីវង់ ខេត្តតាកែវ នៅមិនទាន់បានទទួលដំណោះស្រាយណាមួយពីមន្ត្រីគយដែលឈរជើងនៅទីតាំងខាងលើនេះនៅឡើយទេ ខណៈករណីនេះបានកើតឡើងជិតកន្លះខែមកហើយ។
![](https://kohsantepheapdaily.com.kh/wp-content/uploads/2022/11/6f7d1f904172d0de9facb91ddb0988fb.jpg)
ក្រុមអាជីវករលើកឡើងថា ពួកគាត់ត្រូវបង្ខំចិត្តបង់ពន្ធទំនិញដែលដឹកចេញតាមអ្វីដែលមន្ត្រីគយបានកំណត់ បើទោះបីជាតម្លៃថ្លៃជាងនាពេលកន្លងមកមួយគុណនិង២ គុណនិង៣ យ៉ាងណាក៏ដោយ ព្រោះពួកគាត់ត្រូវការចំណូលផ្គត់ផ្គង់គ្រួសារ និងបង់ធនាគារ ទោះចំណេញតិចទួចយ៉ាងណាក្តី ។
![](https://kohsantepheapdaily.com.kh/wp-content/uploads/2022/11/d218f6e8838ec1fc4021da1b5294143d.jpg)
ពួកគាត់បន្ថែមថា រថយន្តកង់៦លើកមុន បង់ពន្ធទំនិញនៅលើរថយន្តមិនដល់១លានរៀល ឬលើ១លានរៀលតិចតួច តែពេលនេះ ពួកគាត់ត្រូវបង់រហូតដល់៦ ទៅ៧លានរៀលឯណោះ ។ ដោយឡែក អាជីវករដែលដឹកទំនិញតាមរម៉ក ឬរថយន្តសាំយ៉ុង គឺមន្ត្រីគយមិនអនុញ្ញាតឲ្យដឹកដូចមុននោះទេ ធ្វើយ៉ាងណាត្រូវដឹកចេញតាមរយន្តធំៗ ចាប់ពីរថយន្តកង់៦ឡើងទៅ ។
![](https://kohsantepheapdaily.com.kh/wp-content/uploads/2022/11/3956f3a543a575885be9a27599376a71.jpg)
អាជីវករម្នាក់លើកឡើងថា ថ្ងៃមុនក្រដាសពន្ធដែលគយដាក់មកគាត់ គឺត្រូវបង់១លាន២០ម៉ឺនរៀល តែជាក់ស្តែង ពេលបង់លុយគាត់ត្រូវបង់រហូតដល់៦លានរៀលទៅវិញ។ គាត់ថា ក្រដាស់ពន្ធកំណត់តម្លៃសរសេរផ្សេង បង់លុយផ្សេងអត់យល់ គឺចាក់ស្តើងស៊ីក្រាស់។
![](https://kohsantepheapdaily.com.kh/wp-content/uploads/2022/11/89fa5f6c2fa00002a1190e69c1f3207d.jpg)
ពាក់ព័ន្ធនឹងការដំឡើងតម្លៃពន្ធនេះលោក ស៊ុន ឆាយ ប្រធានសាខាគយនិងរដ្ឋករខេត្តតាកែវបានឲ្យដឹងតាមរយៈការហៅទូរស័ព្ទកាលពីរសៀលថ្ងៃទី៣១ ខែតុលានេះដែរថា ពិតជាមានការដំឡើងតម្លៃយកពន្ធពីអ្នករកស៊ីដឹកទំនិញចេញពីប្រទេសវៀតណាមមែន ព្រោះនេះ ជាគោលការណ៍ប្រមូលពន្ធពីអគ្គនាយកដ្ឋានគយ និងរដ្ឋករកម្ពុជា។
![](https://kohsantepheapdaily.com.kh/wp-content/uploads/2022/11/0141686794506f257822e59bb2012ea6.jpg)
ក្រុមអាជីវករសំណូមពរទៅមេគយ និងមន្ត្រីគយថ្នាក់លើមេត្តាពិនិត្យលើករណីនេះផង ពិសេស សំណូមពរសូមកុំហាមឃាត់រ៉ឺម៉ក ឬរថយន្តសាំយ៉ុង មិនឲ្យដឹកទំនិញដូចសព្វថ្ងៃនេះអី ព្រោះពួកគាត់គ្មានលុយទិញរថយន្តធំៗមកដឹកនោះទេ៕
![](https://kohsantepheapdaily.com.kh/wp-content/uploads/2022/11/41ba630a5102ead14d9ab0099d776ca5.jpg)
![](https://kohsantepheapdaily.com.kh/wp-content/uploads/2022/11/d4656b514627c174a27e34dcd3ff7910.jpg)
![](https://kohsantepheapdaily.com.kh/wp-content/uploads/2022/11/8ec354664669743ba7d4a8004775dc30.jpg)
ចែករំលែកព័តមាននេះ