រាជធានីភ្នំពេញ ៖ បុរស២នាក់ បានស្លាប់បាត់បង់ជីវិត ក្នុងករណីគ្រោះថ្នាក់ចរាចរណ៍រវាងម៉ូតូបុកជាមួយរថយន្តប្រភេទកូរ៉េ នៅផ្លូវបំបែកជាបួន បង្កការភ្ញាក់ផ្អើលកើតឡើងកាលពីវេលាម៉ោង២និង៣០នាទីរំលងអាធ្រាត្រឈានចូលថ្ងៃទី២៧ ខែមិនា ឆ្នាំ២០២៦ នៅចំនុចស្តុបទួលពង្រ…
រាជធានីភ្នំពេញ ៖ បុរស២នាក់ បានស្លាប់បាត់បង់ជីវិត ក្នុងករណីគ្រោះថ្នាក់ចរាចរណ៍រវាងម៉ូតូបុកជាមួយរថយន្តប្រភេទកូរ៉េ នៅផ្លូវបំបែកជាបួន បង្កការភ្ញាក់ផ្អើលកើតឡើងកាលពីវេលាម៉ោង២និង៣០នាទីរំលងអាធ្រាត្រឈានចូលថ្ងៃទី២៧ ខែមិនា ឆ្នាំ២០២៦ នៅចំនុចស្តុបទួលពង្រ ផ្លូវ៥០ម៉ែត្រកែងផ្លូវបេតុងទួលពង្រ សង្កាត់ចោមចៅទី១ ខណ្ឌពោធិសែនជ័យ រាជធានីភ្នំពេញ ។
តាមប្រភពព័ត៌មានពីប្រជាពលរដ្ឋដែលឃើញហេតុការណ៍ បានអោយដឹងថា មុនពេលកើតហេតុ គេឃើញបុរសម្នាក់បានបើករថយន្តប្រភេទកូរ៉េដឹកទំនិញ ម៉ាក Hyundai ពណ៌ស ពាក់ស្លាកលេខ ភ្នំពេញ 3F 8599 ធ្វើដំណើរតាមបណ្ដោយផ្លូវ បេតុងទួលពង្រ ក្នុងទិសដៅពីជើងទៅត្បូង លុះមកដល់ចំនុចកើតហេតុ ដែលជាផ្លូវបំបែកជាបួន ក៍ស្រាប់តែមានបុរស២នាក់ បានជិះម៉ូតូមួយគ្រឿងម៉ាក Honda best ពណ៌ស លាយក្រហម ពាក់ស្លាកលេខ 1KF 5399 បានជិះបោះពួយតាមបណ្ដោយផ្លូវ ៥០ម៉ែត្រ ក្នុងទិសដៅពីលិចទៅកើត ក្នុងល្បឿនលឿន ក៍ជ្រុលទៅបុកចំពីមុខរថយន្តចំហៀងខាងឆ្វេងយ៉ាងពេញទំហឹង បណ្ដាលឲ្យម៉ូតូខ្ទេចស្រុញផ្នែកខាងមុខ ព្រមទាំងធ្វើឲ្យអ្នកជិះម៉ូតូទាំង២បែកក្បាលហូរឈាមស្លាប់នៅកន្លែងកើតហេតុយ៉ាងអាណោចអាធ័មផងដែរ ។
ដោយឡែករថយន្តវិញ រងការខូចខាតផ្នែកខាងមុខចំហៀងខាងឆ្វេង អ្នកបើកបរបានគេចចេញពីកន្លែងកើតហេតុទៅបាត់ ។
ក្រោយកើតហេតុ សមត្ថកិច្ចមូលដ្ឋានបានប្រគល់អោយផ្នែកជំនាញចរាចរណ៍វាស់វែងយកមធ្យោបាយទៅរក្សាទុកនៅការិយាល័យនគរបាលចរាចរណ៍ផ្លូវគោក រង់ចាំដំណោះស្រាយ ចំនែកសពជនរងគ្រោះទាំង២នាក់ ត្រូវបានសមត្ថកិច្ចកំពុងព្យាយាមទាក់ទងរកសាច់ញាតិអោយមកទទួលយកទៅធ្វើបុណ្យតាមប្រពៃណី ៕
ចែករំលែកព័តមាននេះ