ខេត្តកណ្តាល ៖ ភ្លើងប្រចណ្ឌ ប្តីឈ្លោះជាមួយប្រពន្ធ ប្រពន្ធខំគេចពីផ្ទះមកធ្វើការស៊ីឈ្នួលបកគល់ខ្ទឹមឲ្យគេ ដើម្បីបានប្រាក់ នៅដើរមកតាមឈ្លោះដល់កន្លែងធ្វើការទៀត ទ្រាំមិនបាន ក៏យកកាំបិតចាក់ប្រពន្ធដល់ថ្នាក់បាក់ផ្លែកាំបិតចេញពីដង ឃើញប្រពន្ធរបួសធ្ងន់ខ្លាំង…
ខេត្តកណ្តាល ៖ ភ្លើងប្រចណ្ឌ ប្តីឈ្លោះជាមួយប្រពន្ធ ប្រពន្ធខំគេចពីផ្ទះមកធ្វើការស៊ីឈ្នួលបកគល់ខ្ទឹមឲ្យគេ ដើម្បីបានប្រាក់ នៅដើរមកតាមឈ្លោះដល់កន្លែងធ្វើការទៀត ទ្រាំមិនបាន ក៏យកកាំបិតចាក់ប្រពន្ធដល់ថ្នាក់បាក់ផ្លែកាំបិតចេញពីដង ឃើញប្រពន្ធរបួសធ្ងន់ខ្លាំង ក៏នាំប្រពន្ធមកពេទ្យ តែ
មកតាមផ្លូវប្រពន្ធស្លាប់ទៅហើយ ។ ហេតុការណ៍នេះ បានកើតឡើងកាលពីវេលាម៉ោង២៣ និង ៣០នាទីថ្ងៃទី ៣០ មេសា ឆ្នាំ២០២៦ នៅចំណុចភូមិគោកអណ្តែត ឃុំស្អាងភ្នំ ស្រុកស្អាង ខេត្តកណ្ដាល ។
សមត្ថកិច្ចបានឲ្យដឹងថា ជនរងគ្រោះមានឈ្មោះ ផែន គន្ធា ភេទស្រី អាយុ២៦ឆ្នាំ ជនជាតិខ្មែរ មុខរបរជានារីបម្រើការ(KTV) មានទីលំនៅភូមិគោកអណ្តែត ឃុំស្អាងភ្នំ ស្រុកស្អាង ខេត្តកណ្ដាល
(ត្រូវជាប្រពន្ធ) ។ ចំណែកជនដៃដល់ជាប្តីមានឈ្មោះ សោម សិទ្ធ ភេទប្រុស អាយុ៣១ឆ្នាំ ជនជាតិខ្មែរ មុខរបររត់តុការ មានទីលំនៅភូមិ គោកអណ្តែត ឃុំស្អាងភ្នំ ស្រុកស្អាង ខេត្តកណ្ដាល ធ្លាប់ជាប់ពន្ធនាគារខេត្តកណ្តាលចំនួន០១លើក ករណីហិង្សាដោយចេតនា ដកហូតបានកូនកាំបិតចំនួន០១ដើមដងឈើមានស្នាមប្រឡាក់ឈាមបាក់ផ្លែ។
បើយោងតាមប្រភពព័ត៌មានបានអោយដឹងថា ជនសង្ស័យតែងតែឈ្លោះប្រកែកគ្នាជាមួយជនរងគ្រោះជាញឹកញាប់ ដោយជនសង្ស័យប្រចណ្ឌនិងជនរងគ្រោះធ្វើការជានារីKTV ។ នៅថ្ងៃទី ៣០ ខែមេសា ឆ្នាំ ២០២៦ វេលាម៉ោង២៣ និង៣០នាទី ជនសង្ស័យបានផឹកស្រាស្រវឹង និងបានឈ្លោះប្រកែកគ្នាជាមួយជនរងគ្រោះនៅក្នុងបន្ទប់ដេក ។ រួចហើយជនរងគ្រោះបានដើរចេញពីរក្នុងបន្ទប់មកខាងក្រៅផ្ទះ ដើម្បីមកស៊ីឈ្នួលបកគល់ខ្ទឹមគេយកលុយ ជនសង្ស័យក៏បានដើរតាមជនរងគ្រោះមកកន្លែងបកគល់ខ្ទឹម ខណៈពេលនោះជនសង្ស័យនិងជនរងគ្រោះបានឈ្លោះប្រកែកគ្នាស្រាប់តែជនសង្ស័យបានយកកូនកាំបិតបកគល់ខ្ទឹមយកមកចាក់ជនរងគ្រោះចំនួន០១កាំបិតត្រូវឃ្លៀក បណ្តាលឲ្យចេញឈាម និងបានបាក់ផ្លែកាំបិត រួចហើយជនសង្ស័យបានដឹកជនរងគ្រោះយកមកព្យាបាលរបួសនៅឯមន្ទីរពេទ្យបង្អែកស្រុកស្អាង ដោយជនរងគ្រោះមានរបួសធ្ងន់ធ្ងរពេកក្រុមគ្រូពេទ្យបានដឹកជនរងគ្រោះយកមកព្យាបាលរបួសនៅឯមន្ទីរពេទ្យរុស្ស៊ីដោយស្ថានភាពរបួសរបស់ជនរងគ្រោះធ្ងន់ធ្ងរពេកបានស្លាប់នៅឯមន្ទីរពេទ្យរុស្ស៊ី។
លុះនៅថ្ងៃទី០១ ខែឧសភា ឆ្នាំ ២០២៦ វេលាម៉ោង០៩ និង០០នាទី កម្លាំងព្រហ្មទណ្ឌស្រុកស្អាងសហការជាមួយកម្លាំងប៉ុស្តិ៍នគរបាលរដ្ឋបាលស្អាងភ្នំ បានឃាត់ខ្លួនជនសង្ស័យយកមកអធិការដ្ឋាននគរបាលស្រុកស្អាង ដើម្បីធ្វើការសាកសួរ ។ នៅចំពោះមុខសមត្ថកិច្ច នគរបាលជនសង្ស័យបានសារភាពថា ខ្លួនពិតជាបានយកកូនកាំបិតចាក់ជនរងគ្រោះបណ្ដាលឲ្យស្លាប់ពិតប្រាកដមែនដោយសារប្រចណ្ឌ ។
បច្ចុប្បន្ន ជនសង្ស័យត្រូវបានឃាត់ខ្លួនជាបណ្ដោះអាសន្ននៅអធិការដ្ឋាននគរបាលស្រុកស្អាងដើម្បីកសាងសំណុំរឿងចាត់ការតាមផ្លូវច្បាប់ ៕
ចែករំលែកព័តមាននេះ