ខេត្តមណ្ឌលគិរី ៖ លោក គង់ គឹមនី អភិបាលខេត្តមណ្ឌលគិរី មានប្រសាសន៍ថា ព្រឹត្តិការណ៍ប្រណាំងទូកង(ខ្នាតតូច) ដើម្បីអបអរសាទរព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ឆ្នាំ២០២៦នេះ នឹងក្លាយជាដែកឆក់ដ៏សំខាន់ក្នុងការទាក់ទាញភ្ញៀវទេសចរជាតិ និងអន្តរជាតិ ទៅកម្សាន្តនៅទឹកដីខេត្តភូមិភាគឦសានមួយនេះឱ្យកាន់តែច្រើនកុះករ ។
ថ្លែងក្នុងពិធីបើកព្រឹត្តិការណ៍ប្រណាំងទូកងខេត្តមណ្ឌលគិរី នាថ្ងៃទី១៣ ខែវិច្ឆិកា ឆ្នាំ២០២៦ ដោយមានការអញ្ជើញចូលរួមជាគណៈអធិបតីដ៏ខ្ពង់ខ្ពស់ពីសំណាក់លោក ម៉ែន ង៉ុយ ប្រធានក្រុមប្រឹក្សាខេត្ត ព្រមទាំងថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋយ៉ាងច្រើនកុះករ ។ លោក គង់ គឹមនី បានសំណូមពរយ៉ាងទទូចដល់ម្ចាស់ផ្ទះសំណាក់ សណ្ឋាគារ រីសត និងភោជនីយដ្ឋាននានាទូទាំងខេត្ត សូមកុំដំឡើងថ្លៃសេវាកម្ម និងម្ហូបអាហារហួសហេតុ ហើយត្រូវយកចិត្តទុកដាក់ផ្តល់សេវាកម្មឱ្យបានល្អប្រកបដោយភាពរួសរាយរាក់ទាក់ ដើម្បីផ្តល់ភាពកក់ក្តៅ និងបង្កើនទំនុកចិត្តដល់ភ្ញៀវទេសចរ ដែលមកទស្សនាកម្សាន្ត ។
យោងតាមរបាយការណ៍របស់លោក ឌឹម នី អភិបាលរងខេត្ត និងជាប្រធានអនុគណៈកម្មការរៀបចំការប្រណាំងទូកងខេត្តមណ្ឌលគិរី បានឱ្យដឹងថា ទីលានប្រណាំងទូកត្រូវបានរៀបចំឡើងនៅទំនប់សែនសុខដុម ក្រុងសែនមនោរម្យ ដែលមានចម្ងាយផ្លូវប្រណាំងសរុប ២៥០ម៉ែត្រ បែងចែកជាខ្សែទឹកក្នុង និងខ្សែទឹកក្រៅ ព្រមទាំងមានក្រុមការងារបច្ចេកទេស និងគណៈកម្មការកាត់សេចក្តីយ៉ាងត្រឹមត្រូវ និងសុក្រឹតបំផុត ។
សម្រាប់ឆ្នាំ២០២៦នេះ មានទូកងសរុបចំនួន ៣១ទូក មកពីមន្ទីរអង្គភាពជុំវិញខេត្ត ក្រុង-ស្រុក ក្រុមហ៊ុន និងអាជីវករនានា បានដាក់ពាក្យចូលរួមប្រកួតប្រជែង ដែលមានកីឡាករចំណុះទូកសរុប ៣០២នាក់ (កីឡាករបម្រុង ៦២នាក់)។ ទូកទាំងអស់ត្រូវបានវាស់វែង និងបែងចែកជា ៣ផែន ។ ផែនទី១ (ប្រវែង ៧ម៉ែត្រ ដល់ ៨.៣០ម៉ែត្រ) ចំណុះ ៦នាក់ មានចំនួន ១៤ទូក។ ផែនទី២ (ប្រវែង ៨.៤០ម៉ែត្រ ដល់ ១០ម៉ែត្រ) ចំណុះ ៨នាក់ មានចំនួន ៧ទូក។ ផែនទី៣ (ប្រវែងលើស ១០ម៉ែត្រ ដល់ ១៤ម៉ែត្រ)ចំណុះ ១០នាក់ មានចំនួន ១០ទូក ។
ការប្រណាំងនេះនឹងប្រព្រឹត្តទៅរយៈពេល ៣ថ្ងៃ ដោយក្នុងមួយគូត្រូវអុំ ២ជើងក្នុងមួយថ្ងៃ (ប្តូរខ្សែទឹកក្នុង និងក្រៅ) សរុបទាំងអស់មាន ៧២ជើង ដើម្បីស្វែងរកជ័យលាភី ដែលមានល្បឿនលឿនជាងគេតាមផែននីមួយៗ។ ចំពោះទូកជ័យលាភីលេខ១ ដល់លេខ៣ នឹងទទួលបានទង់ជ័យលាភី និងថវិកាអម (ដោយលេខ១ ទទួលបានពានរង្វាន់បន្ថែម) លេខ៤ ទទួលបានទង់កិត្តិយស និងថវិកាអម ចំណែកឯទូកដែលពុំបានជាប់ចំណាត់ថ្នាក់ ក៏ទទួលបានប្រាក់រង្វាន់លើកទឹកចិត្តផងដែរ ៕
ចែករំលែកព័តមាននេះ