ខេត្តកណ្តាល ៖ ករណីឃាតកម្មគិតទុកជាមុន ពាក់ព័ន្ធនឹងការចាប់ជំរិតទារប្រាក់ពីឪពុកម្តាយកុមារី អាយុ៥ឆ្នាំម្នាក់ បានកើតឡើងយ៉ាងរន្ធត់ ដោយជនសង្ស័យ ដែលត្រូវជាពូបង្កើតរបស់កុមារីរងគ្រោះ បានធ្វើសកម្មភាពរុញក្មួយស្រីរបស់ខ្លួនចូលក្នុងប្រឡាយទឹក ដើម្បីសម្លាប់ចោល ក្រោយពីបារម្ភថា កុមារីរងគ្រោះស្គាល់អត្តសញ្ញាណខ្លួនច្បាស់ និងអាចធ្វើឱ្យខ្លួនត្រូវសមត្ថកិច្ចចាប់ខ្លួន ។
យោងតាមសេចក្តីប្រកាសព័ត៌មានរបស់ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល បានឱ្យដឹងថា ហេតុការណ៍នេះកើតឡើងនៅវេលាម៉ោង៨និង៣០នាទីថ្ងៃទី១២ ខែវិច្ឆិកា ឆ្នាំ២០២៦ នៅផ្ទះឈ្មោះ ថាត ថេត ស្ថិតក្នុងភូមិព្រែកតាមេម សង្កាត់ព្រែកស្តី ក្រុងសំពៅពូន ខេត្តកណ្តាល ។
កុមារីរងគ្រោះមានឈ្មោះ ថ,រ,ច,ន អាយុ៥ឆ្នាំ ចំណែកជនសង្ស័យមានឈ្មោះ ឡាយ សុខជា ភេទប្រុស អាយុ២៩ឆ្នាំ ត្រូវជាពូបង្កើតរបស់កុមារីរងគ្រោះ ។
តាមការបញ្ជាក់ក្នុងសេចក្តីប្រកាសព័ត៌មាន មុនពេលកើតហេតុ ជនសង្ស័យបានចាប់ក្មួយស្រីរបស់ខ្លួន ក្នុងគោលបំណងជំរិតទារប្រាក់ពីឪពុកម្តាយកុមារីរងគ្រោះ។ ប៉ុន្តែក្រោយមក ជនសង្ស័យបានគិតថា ប្រសិនបើទុកកុមារីឱ្យនៅរស់នោះរូបគេអាចត្រូវសមត្ថកិច្ចតាមចាប់ខ្លួនបាន ដោយសារកុមារីស្គាល់ខ្លួនច្បាស់ ទើបសម្រេចចិត្តដឹកកុមារីទៅកាន់ទីតាំងស្ងាត់មួយ ដើម្បីសម្លាប់ចោល ។
ប្រភពដដែលបន្តថា ជនសង្ស័យបានដឹកកុមារីឆ្លងទូកនៅចំណុចព្រែកតាផ ចូលទៅក្នុងភូមិសាស្ត្រខេត្តតាកែវ រហូតដល់ចំណុចប្រឡាយលេខ១២ ស្ថិតក្នុងភូមិព្រែកតាផ ឃុំគោកធ្លក ស្រុកអង្គរបុរី ខេត្តតាកែវ ដែលជាទីតាំងស្ងាត់ និងមិនសូវមានមនុស្សឆ្លងកាត់ ។
នៅទីនោះ ជនសង្ស័យបានឈប់ម៉ូតូ ហើយប្រាប់កុមារីរងគ្រោះថា ម៉ាស៊ីនម៉ូតូក្តៅ ត្រូវសម្រាកមួយសន្ទុះសិន ប្រមាណ២០នាទីក្រោយមក ជនសង្ស័យបានបបួលកុមារីថា ទីនេះមានទេសភាពស្អាត ហើយឱ្យចុះទៅដើម្បីថតរូប ដោយបញ្ជាឱ្យកុមារីឈរនៅលើចង្អើ ដើម្បីបង់សំណាញ់។ ភ្លាមនោះ ជនសង្ស័យបានធ្វើសកម្មភាពរុញកុមារីរងគ្រោះឱ្យធ្លាក់ចូលក្នុងទឹកប្រឡាយតែម្តង ។
សមត្ថកិច្ចបានបញ្ជាក់ថា ប្រាក់ដែលជនសង្ស័យបានទាមទារពីឪពុកម្តាយកុមារីរងគ្រោះ គឺមិនទទួលបាននោះទេ។
បច្ចុប្បន្ន ជនសង្ស័យត្រូវបានសមត្ថកិច្ចឃាត់ខ្លួន ព្រមទាំងដកហូតវត្ថុតាងមួយចំនួន រួមមាន ទូរសព្ទដៃ២គ្រឿង ស៊ីមកាត២ និងម៉ូតូ១គ្រឿង ដើម្បីកសាងសំណុំរឿងចាត់ការតាមនីតិវិធីច្បាប់ ៕
ចែករំលែកព័តមាននេះ