សង្គ្រាមអ៊ុយក្រែន ៖ យោងតាមទិន្នន័យសម្ងាត់មួយរបស់ទីភ្នាក់ងារស្ថិតិរុស្ស៊ី ROSSTAT កាសែត BLOOMBERG អាមេរិកលាតត្រដាងកាលពីថ្ងៃទី១១ វិច្ឆិកា ថា ជនបរទេស១១.៣៣៥នាក់ ដែលជួយច្បាំងរុស្ស៊ី មានដើមកំណើតមកពីប្រទេសជិត១០០បានបាត់បង់ជីវិតក្នុងសង្គ្រាមនៅអ៊ុយក្រែន ។ ប្រធានាធិបតីរុស្ស៊ីលោកវ្ល៉ាឌីមៀរ ពូទីន មិនទទួលស្គាល់ទំហំនៃការបាត់បង់នោះឡើយ។
ព័ត៌មាននោះ ធ្លាយមកពីពួកអ្នកលួចព័ត៌មានវិទ្យា២គ្រុប គឺក្រុម CYBER PARTISANS ស្និទ្ធិពួកប្រឆាំងបេឡារុស និងក្រុមSILENT CROWអ៊ុយក្រែន។ តាមBLOOMBERGថា ការបាត់បង់របស់រុស្ស៊ីទាក់ទិនសង្គ្រាមឡើងដល់ប្រមាណជា៤០០.០០០នាក់ ។ ចំនួនជនបរទេសដែលស្លាប់ក្នុងសង្គ្រាមនេះ កើនដល់ជាង៨ដង រវាងឆ្នាំ២០២២និង២០២៥។ បណ្ដាអតីតសាធារណរដ្ឋសូវៀតជាអ្នកផ្ដល់ជាពិសេសទាហានបរទេសដែលស្លាប់ទាំងនោះ ។
ក្នុងចំណោមអ្នកទាំងនេះ ក៏មានជនជាតិរុស្ស៊ីដែលកើតនៅបរទេស កន្លែងដែលពួកគេទទួលបានសញ្ជាតិមួយទៀតផងដែរ។ ក្នុងចំណោមពួកគេប្រមាណជា៣៧០០នាក់ មានសញ្ជាតិអ៊ុយក្រែន ឬក៏ជាអ្នកកើតនៅអ៊ុយក្រែនក្រោយការរលំរលាយសហភាពសូវៀតនាដំណាច់ឆ្នាំ១៩៩១។ ក្នុងចំំណោមអ្នកទាំងនេះភាគច្រើនជាអ្នករស់នៅក្នុងបណ្ដាដែនដីអ៊ុយក្រែនដែលរុស្ស៊ីកាន់កាប់នាភាគខាងកើត ឬភាគខាងត្បូងប្រទេស។
ប្រមាណជា៨០% នៃអ្នកស្លាប់ដទៃទៀត មកពីអតីតសាធារណរដ្ឋសូវៀតនានា។ អ្នកស្លាប់ក្រៅពីនេះ ជាអ្នកមកពីនេប៉ាល់ ស្រីលង្កានិងចិន។ បន្ទាប់ពីដំណាច់ឆ្នាំ២០២៥មក មានអ្នកស្លាប់មកពីកូឡុំប៊ី កេនយ៉ានិងនីហ្សេរីយ៉ា ។ ក្នុងចំណោមអ្នកស្លាប់ក៏មានជនជាតិអាហ្វ្រិក៣៤០នាក់ ។ ក្នុងឆ្នាំ២០២៥ពួកគេមកជាពិសេសពីអេហ្ស៊ីប កាមីរ៉ូន នីហ្សេរីយ៉ា កេនយ៉ា ហ្គាណា និងអ៊ូហ្គង់
ដា៕
ចែករំលែកព័តមាននេះ