រាជធានីភ្នំពេញ ៖ មួយរយៈពេលចុងក្រោយនេះ អោយតែមានគ្រោះអគ្គិភ័យកើតឡើង គេតែងតែឃើញក្រុមគ្រូពេទ្យនៅតាមបណ្តាអង្គភាពនានា បានចុះដោយផ្ទាល់ទៅប្រចាំការ ដើម្បីត្រៀមក្នុងការជួយសង្គ្រោះដល់ជនរងគ្រោះដែលនឹងកើតមានឡើងជាយថាហេតុដើម្បីធានាជួយសង្គ្រោះដល់ជនរងគ្រោះអោយបានទាន់ពេល ។ នេះជាការគិតគូរនិងយកចិត្តទុកដាក់ពីប្រមុខរាជរដ្ឋាភិបាល និងថ្នាក់ដឹកនាំក្រសួងពាក់ព័ន្ធ ។
ទន្ទឹមនោះ កម្លាំងនគរបាលបង្ការពន្លត់អគ្គិភ័យ និងសង្គ្រោះនៅតាមបណ្តាខេត្ត រាជធានីក៏បានសហការល្អ ជាមួយក្រុមគ្រូពេទ្យនៅតាមបណ្តាអង្គភាព ដើម្បីធានាជួយសង្គ្រោះដល់ជនរងគ្រោះអោយបានទាន់ពេលវេលាផងដែរ ។
តាមនាយកដ្ឋានបង្ការពន្លត់អគ្គិភ័យ និងសង្គ្រោះបានឲ្យដឹងថា កម្លាំងបង្ការពន្លត់អគ្គិភ័យ និងសង្គ្រោះរបស់នាយកដ្ឋាននៃអគ្គស្នងការដ្ឋាននគរបាលជាតិ ក្រសួងមហាផ្ទៃ បានបន្តសហប្រតិបត្តិការយ៉ាងជិតស្និទ្ធបំផុត ជាមួយក្រុមការងារលោកគ្រូ អ្នកគ្រូពេទ្យ សង្គ្រោះបន្ទាន់របស់មន្ទីរពេទ្យរដ្ឋនៃក្រសួងសុខាភិបាល ដើម្បីត្រៀមជួយសង្គ្រោះប្រជាពលរដ្ឋដែលរងគ្រោះថ្នាក់ដោយគ្រោះថ្នាក់អគ្គិភ័យ គ្រោះថ្នាក់ចរាចរណ៍ និងគ្រោះថ្នាក់សង្គមផ្សេងៗយ៉ាងលឿនរហ័ស និងទាន់ពេលវេលា ចូលរួមថែរក្សាការពារប្រទេសជាតិយើងឱ្យបានរុងរឿងជាអមតៈ ៕
ចែករំលែកព័តមាននេះ