ទីក្រុងតេអេរ៉ង់៖ រដ្ឋាភិបាលអ៊ីរ៉ង់បានផ្ញើសំណើមួយទៀតទៅឱ្យអាមេរិកពិនិត្យមើល ហើយផ្ញើតាមរយៈប្រទេសប៉ាគីស្ថានដែលជាអន្តរការី។ នេះបើយោងតាមការផ្សាយរបស់ទីភ្នាក់ងារព័ត៌មាន IRNA។ បើដូច្នេះមែន វាជាចំណាត់ការថ្មីមួយទៀតសំដៅធ្វើឱ្យប្រសើរឡើងនូវស្ថានភាពបច្ចុប្បន្នដែលដំណើរការចរចាគ្នាហាក់ដូចជានៅទ្រឹងមួយកន្លែង។ ទីភ្នាក់ងារព័ត៌មាន IRNA មិនបានផ្សព្វផ្សាយសេចក្ដីលម្អិតនៅក្នុងសំណើនោះទេ។ ប៉ុន្តែបន្ទាប់ពីផ្សព្វផ្សាយមិនទាន់បានប៉ុន្មានផង តម្លៃប្រេងឆៅតាមហាងឆេងទីផ្សារអន្តរជាតិចាប់ផ្ដើមធ្លាក់ចុះព្រឹបៗតែម្ដង។
គេមិនទាន់ដឹងច្បាស់ថាតើសំណើរបស់អ៊ីរ៉ង់នោះបានទៅដល់ដៃទីក្រុងវ៉ាស៊ីនតោនហើយឬនៅទេ។ សម្រាប់ពេលនេះ បទឈប់បាញ់នៅតែមានសុពលភាពជាធរមានពិតមែនហើយ។ ប៉ុន្តែកាលពីមុននេះ ប្រេងឆៅឡើងថ្លៃខ្លាំងបន្ទាប់ពីមានសេចក្ដីរាយការណ៍ថាលោកត្រាំត្រៀមកោះប្រជុំគ្នាដើម្បីកំណត់ថាតើត្រូវប្រើចំណាត់ការយោធាបែបណាដើម្បីបង្ខំឱ្យអ៊ីរ៉ង់ចូលតុចរចា។ ដោយសារដំណឹងនេះ អ៊ីរ៉ង់ក៏មិនអាចនៅស្ងៀមបានឡើយ។ អ៊ីរ៉ង់ចាប់ផ្ដើមដាក់ឱ្យដំណើរការប្រព័ន្ធការពារដែនអាកាសរបស់ខ្លួនជាបណ្ដើរៗហើយ ហើយត្រៀមផែនការឆ្លើយតបទៅអាមេរិកវិញប្រសិនបើខ្លួនរងការវាយប្រហារជាថ្មី។ នេះបើយោងតាមការបង្ហើបឱ្យដឹងពីមន្ត្រីជាន់ខ្ពស់អ៊ីរ៉ង់២រូបប្រាប់អ្នកសារព័ត៌មាននៅក្នុងលក្ខខណ្ឌមិនឱ្យបញ្ចេញឈ្មោះ។
រហូតមកដល់ពេលនេះ ទីក្រុងវ៉ាស៊ីនតោនមិនទាន់ប្រកាសថាខ្លួននឹងចាត់វិធានការបែបណាជាបន្តទៀតនោះទេ។ លោកត្រាំថ្លែងកាលពីថ្ងៃអង្គារថាលោកមិនសប្បាយចិត្តទាល់តែសោះនឹងសំណើរបស់អ៊ីរ៉ង់ដែលដាក់ជូនលោកពិនិត្យមើលកាលពីលើកមុន។ គេដឹងថានៅក្នុងសំណើនោះ អ៊ីរ៉ង់ទាមទារឱ្យអាមេរិកបិទបញ្ចប់ការបិទខ្ទប់ដែនសមុទ្ររបស់ខ្លួន (អ៊ីរ៉ង់)។ ចំពោះបញ្ហានុយក្លេអ៊ែរ និងការចម្រាញ់សារធាតុអ៊ុយរ៉ាញ៉ូមដែលលោកត្រាំចាត់ទុកថាមានសារសំខាន់ជាអាទិភាពនោះត្រូវអ៊ីរ៉ង់ស្នើសុំយកទៅពិភាក្សានៅពេលក្រោយ។ ពោលគឺអ៊ីរ៉ង់ស្នើសុំចុះកិច្ចព្រមព្រៀងសន្តិភាពជាមុនសិនមុននឹងនិយាយអំពីបញ្ហានេះ (នុយក្លេអ៊ែរ)។
អ្នកនាំពាក្យក្រសួងការបរទេសអ៊ីរ៉ង់យល់ថាគេមិនគួររំពឹងទុកខ្ពស់ពេកទេថាការចរចាគ្នាអាចនឹងទទួលបានលទ្ធផលឆាប់ៗនេះ។ មន្ត្រីជាន់ខ្ពស់នៃឆ្មាំបដិវត្តឥស្លាមព្រមានថាទន្ទឹមនឹងការចង់ចរចាគ្នាដើម្បីដោះស្រាយបញ្ហាដោយសន្តិវិធី អ៊ីរ៉ង់ក៏ត្រៀមកម្លាំងដើម្បីវាយអាមេរិកដែរ។ ប្រសិនបើអាមេរិកវាយប្រហារជាថ្មីមកលើអ៊ីរ៉ង់ ទោះបីវាយប្រហារមានកម្រិតកំណត់ក៏ដោយ ក៏អាមេរិកនឹងទទួលរងការវាយបកវិញទៅលើមូលដ្ឋានរបស់ខ្លួននៅក្នុងតំបន់មជ្ឈិមបូព៌ានៅក្នុងអ្វីដែលមន្ត្រីរូបនេះពិពណ៌នាថាជា «ការវាយប្រហាររយៈពេលយូរ និងគួរឱ្យឈឺចុកចាប់»៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ