ទីក្រុងវ៉ាស៊ីនតោន៖ លោកដូណាល់ត្រាំកាលពីយប់មិញថ្លែងថាលោកមិនសប្បាយចិត្តទាល់តែសោះនឹងសំណើថ្មីចុងក្រោយបង្អស់ដែលទើបតែផ្ញើជូនលោកដើម្បីពិនិត្យមើល។ លោកព្រមានថានឹង «វាយកម្ទេចពួកគេឱ្យវិនាសសាបសូន្យ» ប្រសិនបើពួកគេមិនព្រមចរចាគ្នាឱ្យមានកិច្ចព្រមព្រៀងទេនោះ។ លោកថ្លែងប្រាប់អ្នកសារព័ត៌មានថានៅខណៈនេះ លោកមិនពេញចិត្តនឹងអ្វីដែលពួកគេស្នើមកយើងទេ។
ការថ្លែងដូច្នេះបន្ទាប់ពីសារព័ត៌មានរបស់រដ្ឋអ៊ីរ៉ង់រាយការណ៍ថារដ្ឋាភិបាលរបស់ខ្លួនបានបញ្ជូនសំណុំឯកសារទៅប្រទេសប៉ាគីស្ថានក្នុងនាមជាអន្តរការីតាំងពីល្ងាចថ្ងៃព្រហស្បតិ៍។ ចំពោះសំណួរថាតើមូលហេតុអ្វីបានជាលោកមិនពេញចិត្តនឹងសំណើលើកចុងក្រោយបំផុតនេះ? លោកត្រាំឆ្លើយតបថាពួកគេទាមទារលក្ខខណ្ឌដែលលោកមិនអាចយល់ព្រមជាដាច់ខាត។ លោកនិយាយតែត្រឹមនេះដោយមិនបញ្ជាក់លម្អិតនោះឡើយ។
លោកត្រាំថាអ៊ីរ៉ង់ប្រើយុទ្ធសាស្ត្រជម្រុលដំណើរទៅមុខដោយសន្សឹមៗនៅក្នុងការចរចាគ្នា។ ប៉ុន្តែលោកថ្លែងបន្ថែមថានៅក្នុងជួរថ្នាក់ដឹកនាំអ៊ីរ៉ង់សព្វថ្ងៃនេះមានការប្រេះឆាគ្នាសម្បើមណាស់។ លោកមិនដឹងច្បាស់ថាតើពួកគេអាចដោះស្រាយបញ្ហាផ្ទៃក្នុងចេញរួចឬមិនរួចនោះទេ។ អ្នកសារព័ត៌មានបានសាកសួរលោកត្រាំថាតើលោកនឹងចាត់វិធានការបែបណាទៀតប្រសិនបើគ្មានដំណោះស្រាយសន្តិភាពទេ។ លោកសូមមិននិយាយត្រង់ចំណុចថានឹងវាយប្រហារអ៊ីរ៉ង់ជាថ្មីឬយ៉ាងណាឡើយ។
លោកគ្រាន់តែនិយាយដោយខ្លីថាលោកមិនចង់វាយប្រហារទ្រង់ទ្រាយធំទេ។ ប៉ុន្តែលោកថានោះអាចជាជម្រើសមួយដែរ។ តើយើងលើកទ័ពទៅវាយអ៊ីរ៉ង់ ហើយត្រឹមតែវាយពួកគេ ឬក៏យើងចង់បានអ្វីផ្សេង។ លោកក៏ត្រូវបានគេសួរពាក់ព័ន្ធនឹងឱសានវាទរយៈពេល៦០ថ្ងៃដែលមានចែងនៅក្នុងច្បាប់ War Power Act ដែលលោកត្រូវឆ្លងកាត់ការយល់ព្រមពីសភាខង់ហ្ក្រែស។ លោកថាគ្រាន់តែចេញសញ្ញាឱ្យលោកទៅស្នើសុំការយល់ព្រមពីសភាមានន័យថាជាការធ្វើផ្ទុយពីរដ្ឋធម្មនុញ្ញទាំងស្រុង៕ ប្រភព៖ ឆេនណល ញូស៍ អេស៊ា (Channel News Asia) និងប្រភពដទៃទៀត
ចែករំលែកព័តមាននេះ