ពលរដ្ឋ៤៣គ្រួសាររងគ្រោះដោយអគ្គិភ័យឆេះផ្ទះនៅខណ្ឌច្បារអំពៅ បានទទួលអំណោយ
- ភ្នំពេញ
រាជធានីភ្នំពេញ ៖ នៅព្រឹកថ្ងៃទី២១ ខែ មិថុនា ឆ្នាំ២០២២នេះ ក្រុមការងារអនុសាខាកាកបាទក្រហម
រាជធានីភ្នំពេញ ៖ នៅព្រឹកថ្ងៃទី២១ ខែ មិថុនា ឆ្នាំ២០២២នេះ ក្រុមការងារអនុសាខាកាកបាទក្រហមកម្ពុជា ខណ្ឌច្បារអំពៅ ដឹកនាំដោយ លោក ចេង មុនីរ៉ា អភិបាលខណ្ឌ និងជា ប្រធានកិត្តិយសអនុសាខាខណ្ឌ បានចុះសាកសួរសុខទុក្ខ និងនាំយអំណោយមនុស្សធម៌ទៅផ្តល់ជូនដល់ប្រជាពលរដ្ឋរងគ្រោះដោយសារអគ្គីភ័យចំនួន៣៧ខ្នងផ្ទះស្មើ និង៤៣គ្រួសារ កាលពីវេលាម៉ោង៤និង៣០នាទីរសៀលថ្ងៃទី២០ ខែមិថុនា ឆ្នាំ ២០២២ កន្លងទៅនេះ ស្ថិតនៅភូមិដើមចាន់ សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ ។ គួររំលឹកថា ដឹងមូលហេតុហើយ! ករណីអគ្គិភ័យឆេះផ្ទះប្រជាពលរដ្ឋក្នុងខណ្ឌច្បារអំពៅអស់ជិត៤០ខ្នង
ក្នុងឱកាសនោះ លោក ចេង មុនីរ៉ា បានពាំនាំនូវការចូលរួមសោកស្តាយ ពីសំណាក់ឯកឧត្តម ឃួង ស្រេង ប្រធានគណៈកម្មាធិការសាខាកាកបាទក្រហមកម្ពុជា រាជធានីភ្នំពេញ និងជាពិសេសសម្តេចកិតិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជាមួយគ្រួសាររងគ្រោះ និងសូមឲ្យបងប្អូនមេត្តាកាត់ចិត្ត កុំអស់សង្ឃឹម ឱ្យតែនៅមានជីវិតរស់នៅ គឺបងប្អូនអាចប្រកបរបររកទទួលទាន ដើម្បីស្តាជីវភាពគ្រួសារឡើងវិញ ។
លោកអភិបាលក៏បានគូសបញ្ជាក់ថា សម្ដេចកិត្តិព្រឹទ្ធបណ្ឌិតប្រធាន ប៊ុន រ៉ានី ហ៊ុន សែន តែងតែយកចិត្តទុកដាក់គិតគូរជាប់ជានិច្ចចំពោះសុខទុក្ខប្រជាពលរដ្ឋជាទូទៅ ជាពិសេសជនរងគ្រោះ និងងាយរងគ្រោះគ្រប់ប្រភេទ ដោយមិនប្រកាន់ពីវណ្ណៈ ពណ៌សម្បុរ ជំនឿសាសនា ឬនិន្នាការនយោបាយអ្វីឡើយ ពោល «ទីណាមានការលំបាក ទីនោះមានកាកបាទក្រហមកម្ពុជា» ។
ជាមួយគ្នានោះដែរ លោកអភិបាល ក៏បានធ្វើការអំពាវនាវក្រើនរំលឹកដល់បងប្អូនប្រជាពលរដ្ឋទាំងអស់សូមប្រុងប្រយត្ន័ឲ្យបានខ្ពស់ក្នុងការបង្ការចំពោះគ្រោះអគ្គីភ័យនេះ ដែលកើតមានឡើងបានគ្រប់ពេល មិនថា ជាចេតនា ឬអចេតនាណាមួយដែលអាចកើតមានឡើងដោយឯកឯង ដូចជាករណីឆ្លងចរន្តភ្លើងជាដើម ។
សូមបញ្ជាក់ថា អំណោយមនុស្សធម៌ដែល បានចែកជូនក្នុង១គ្រួសារៗ ទទួលបាន ៖ អង្ករ២៥គីឡូក្រាម មី១កេស , ទឹកត្រី១យួរ , ត្រីខ១យួរ , បាឡុង១សម្រាប់ ដែលជាទេយ្យទានរបស់វត្តនៅក្នុងខណ្ឌច្បារអំពៅ និងថវិកាចំនួន១០ម៉ឺនរៀលផងដែរ ។
គួររំលឹកថា ផ្ទះតូចៗសង់ជាប់គ្នារដឹក ដែលមាទំហំ៣គុណ៤ម៉ែត្រ ចំនួន៣៧ខ្នង ត្រូវឆាបឆេះអស់ហ្មត់គ្មានសល់ កាលពីវេលាល្ងាចថ្ងៃទី២០ ខែមិថុនា ឆ្នាំ២០២២ បង្កឡើងដោយបុរសម្នាក់ជាពលរដ្ឋនៅតំបន់នោះ ដែលមានជម្លោះជាមួយប្រពន្ធខ្លួនឯង ហើយដុតផ្ទះរបស់ខ្លួន រហូតឆេះរាលដាលដល់លំនៅឋានគេដទៃ ជាបន្តបន្ទាប់តែម្តងទៅ ។ យ៉ាងណាមិញ រូបគេក៏ត្រូវបានសមត្ថកិច្ចឃាត់ខ្លួន ដើម្បីអនុវត្តនីតិវិធីផងដែរ ៕
ចែករំលែកព័តមាននេះ