ខេត្តកំពង់ឆ្នាំង ៖ ជនរងគ្រោះចំនួន០៤នាក់ ដែលបានរងគ្រោះដោយសារសត្វឆ្កែចចកព្រៃមួយក្បាលខាំ កាលពីថ្ងៃទី២៤ ខែឧសភា កន្លងមក នៅចំណុចភូមិស្នោ ឃុំខុនរ៉ង ស្រុកបរិបូណ៌ បានទទួចស្នើសុំការជួយឧបត្ថម្ភថវិកាដល់ពួកគាត់សម្រាប់ថ្លៃព្យាបាល ព្រោះតែតម្លៃនៃការព្យាបាល ពេទ្យឯកជនថ្លៃពេក ពុំមានលទ្ធភាព ។ សេចក្តីអំពាវនាវនេះបានធ្វើឡើងនៅព្រឹកថ្ងៃទី២៨ ខែឧសភា ឆ្នាំ២០២២ ។ សូមរំលឹកថា៖ ចចកព្រៃ មិនដឹងចេញមកពីណា ដេញខាំពលរដ្ឋជាច្រើននាក់ផ្អើលទាំងព្រឹក
ប្រជាពលរដ្ឋ ដែលរងគ្រោះទាំង៤នាក់ មាន១-ឈ្មោះ យោត សាអែម អាយុ២៧ឆ្នាំ ភេទស្រី ជាកម្មករ រងរបួសជើងនិងដៃ ។ ទី២-ឈ្មោះ ប៉ិល សុចិន អាយុ៣២ឆ្នាំ ភេទស្រី របួសដៃ ។ ៣-ឈ្មោះ ទឿន ចំណាន អាយុ១៧ឆ្នាំ ភេទស្រី ជាកម្មកររោងចក្ររបួសដៃ និង៤-កុមារា ឈ្មោះសុច សុវីន អាយុ១៣ឆ្នាំ របួសដៃ និងត្រូវឆ្កែខាំទាំងបែកទូរសព្ទនៅក្នុងដៃ ។
ពួកគាត់បានបញ្ជាក់ថា ក្រោយពេលរងគ្រោះដោយឆ្កែចចកខាំ ពួកគាត់បានទៅរកពេទ្យឯកជនព្យាបាលហើយត្រូវបានគ្រូពេទ្យឯកជន ក្នុងស្រុកបរិបូណ៌ទារថ្លៃព្យាបាល ក្នុងតម្លៃ៥០ម៉ឺនរៀលក្នុងម្នាក់ៗ ដោយព្យាបាល៥លើកក្នុងមួយលើកតម្លៃ១០ម៉ឺនរៀល ។ ពួកគាត់បានទៅចាក់លើកទី១ អស់តម្លៃ១០ម៉ឺនរៀលរួចហើយនៅលើកទី២ រហូតដល់លើកទី៥ទៀត ដែលតម្រូវបង់ថ្លៃគ្រូពេទ្យម្នាក់៤០ម៉ឺនរៀល ម្នាក់ៗបន្ថែមទៀត ដែលជាហេតុធ្វើឲ្យពួកគាត់ជាជនក្រីក្រពុំមានលទ្ធភាពបង់ថ្លៃព្យាបាលឡើយដោយហេតុនេះពួកគាត់សំណូមពរដល់សប្បុរសជន និងអាជ្ញាធរ សូមមេត្តាជួយ ដល់ពួកគាត់ដែលកំពុងជួបការខ្វះខាតនេះផង។
បើតាមការបញ្ជាក់របស់លោក ទត វិបុលមេភូមិស្នោ ឃុំខុនរ៉ង ស្រុកបរិបូណ៌ បានឱ្យដឹងថានៅព្រឹកព្រលឹមស្រាងៗ ថ្ងៃទី២៤ ខែឧសភា មានសត្វចចកព្រៃមួយក្បាល ចេញពីក្នុងព្រៃបានមកខាំអ្នកគួរទៅលើកយកចង្រិតពីកន្លែងដែលពួកគាត់ដាក់ចាប់ ។ ក្រោយពីខាំ អ្នកទៅយកចង្រិត រួចហើយ សត្វចចកបានរត់ចូលក្នុងភូមិនឹងខាំប្រជាពលរដ្ឋជាបន្តបន្ទាប់បណ្ដាលអោយរងរបួសទាំង៤នាក់ យ៉ាងនេះក្តីឆ្កែចចកនោះត្រូវបានប្រជាពលរដ្ឋចាប់វាយបណ្ដាលឲ្យងាប់ ទៅហើយ។
ដោយឡែកលោកវេជ្ជ បណ្ឌិត ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំងក៏បានឱ្យដឹងដែរ ថា ចំពោះថ្នាំព្យាបាលសត្វឆ្កែខាំ មន្ទីរពេទ្យខេត្ត ពុំមាន ថ្នាំទេ លើកលែង នៅវិទ្យាស្ថានប៉ាស្ទ័រ ។ ហើយសម្រាប់ការព្យាបាលនៅតាមមន្ទីរពេទ្យឯកជនគឺមានតម្លៃថ្លៃបែបនេះហើយ៕
ចែករំលែកព័តមាននេះ