រាជធានីភ្នំពេញ ៖ លោក ឃួង ស្រេង អភិបាលនៃគណៈអភិបាលរាជធានីភ្នំពេញ បានមាន​ប្រសាសន៍​ថា ប្រទេសជាតិរីកចម្រើន មានការអភិវឌ្ឍន៍ជឿនលឿនរឹងមាំ គឺពឹងលើធនធានមនុស្សដែលមានបញ្ញាញាណខ្លាំងក្លា ។ ដូច្នេះ សូមប្អូនៗ ក្មួយៗ សិស្សានុសិស្សទាំងអស់ ប្រឹងប្រែង សិក្សា​​រៀនសូត្រឲ្យបានខ្លាំងក្លា ដើម្បីជាទំពាំងស្នងប្ញស្សី ក្នុងការអភិវឌ្ឍន៍ប្រទេសជាតិឲ្យមាន​ការ​រីកចម្រើនជឿនលឿន ក្លាយជាប្រទេសមានចំណូលខ្ពស់ នៅឆ្នាំ​២០៥០ ដែលជាបំណងប្រាថ្នាពល​រដ្ឋខ្មែរគ្រប់រូប ។

ការលើកឡើងរបស់​លោក ឃួង ស្រេង បែប​នេះ បានធ្វើឡើងក្រោយបានអានសារលិខិតថ្លែងអប​អ​រសាទរ​ក្នុងឱកាសបើកបវេសនកាលឆ្នាំសិក្សា២០២៥-២០២៦ របស់ស​ម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី​នៃកម្ពុជា នាព្រឹកថ្ងៃទី០១ វិច្ឆិកា ២០២៥ នេះ ក្នុងឱកាសដែលលោកអញ្ជើញ​ជាអធិបតីក្នុងពិធីបើកបវេសនកាលឆ្នាំសិក្សា២០២៥-២០២៦ និងពិធីចែករង្វាន់សិស្សពូកែ ទូទាំង​រាជធានីភ្នំពេញ និងសិស្សនិទ្ទេស A ឆ្នាំសិក្សា២០២៤-២០២៥ នៅវិទ្យាល័យព្រែកលៀប ខណ្ឌជ្រោយចង្វា ។

លោក ឃួង ស្រេង បានមានប្រសាសន៍លើកឡើងទៀតថា ប្រជាពលរដ្ឋយើងពិតជាមានមោទ​នភាព និងសប្បាយរីករាយណាស់ ដែលមានថ្នាក់ដឹកនាំ ដែលមានសមត្ថភាពខ្លាំងក្លាក្នុងការដឹកនាំប្រទេស នោះគឺសម្ដេចបវរធិបតីហ៊ុន ម៉ាណែត នាយករដ្ឋមន្ត្រី ។ ជាក់ស្ដែង យើងបានឃើញហើយថា កាលពីថ្ងៃទី២៦ តុលា កន្លងមកនេះ សម្ដេចបបរធិបតី​បានបង្ហាញឲ្យឃើញពីសមត្ថភាពដ៏ខ្លាំងក្លា ក្នុងការនាំប្រទេសជាតិមកនូវសន្តិភាពពេញលេញ ដែលយើងគ្រប់គ្នាជឿទុកចិត្តបានហើយបានធ្វើឱ្យប្រទេសជាតិរួចផុតពីសង្គ្រាមកាត់បន្ថយបានការស្លាប់ និងរបួសកងទ័ព និងប្រជាពលរដ្ឋទាំងសងខាងថែមទៀតផង។

លោក ឃួង ស្រេង នៅក្នុងឱកាសនោះ ក៏បានលើកឡើងពីវិស័យអប់រំក្រោយឆ្នាំ១៩៧៩ ដែល កម្ពុជា​មិនមានអ្វីទាំងអស់។ តែដោយការខិតខំប្រឹងប្រែងពីរាជរដ្ឋាភិបាលនាពេលនោះ ទើបធ្វើឲ្យវិស័យអប់រំមានការអភិវឌ្ឍ រីកចម្រើនរហូតមកដល់បច្ចុប្បន្ននេះ ។ ឯកឧត្តមអភិបាលរាជធានីភ្នំពេញបានសូមឱ្យកូនក្មួយទាំងអស់ប្រឹងប្រែងសិក្សារៀនសូត្រឲ្យបានខ្លាំងក្លា ដើម្បីយកចំណេះវិជ្ជាទាំងនេះមកបម្រើជាតិមាតុភូមិ ធ្វើឲ្យសេដ្ឋកិច្ចជាតិរបស់យើងកាន់តែរីកចម្រើនមួយកំរិតថែម​ទៀត ហើយចំណេះវិជ្ជាទាំងនេះ ក៏ជាខឿនការពារបូរណភាពទឹកដីរបស់យើងដ៏មានប្រសិទ្ធភាពផងដែរ ។

រាជរដ្ឋាភិបាលកម្ពុជា​អាចរីកចម្រើនជឿនលឿនអភិវឌ្ឍន៍ទៅបាន គឺពឹងលើក្មួយៗ​ជំនាន់ក្រោយទាំងអស់នេះហើយ ។ ចំណែករាជធានីភ្នំពេញក៏ដូច្នោះដែរ បើមិនមានការចូលរួមពីប្រជាពលរដ្ឋទេ រាជធានីភ្នំពេញក៏មិនមានអនាម័យ បរិស្ថាននិងការអភិវឌ្ឍរីកចំរើនដូចពេលនេះដែរ ។

លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡារាជធានីភ្នំពេញបានមានប្រសាសន៍លើកឡើងដែរថា​ ការរៀបចំប្រឡងជ្រើសរើសសិស្សពូកែទូទាំងរាជធានី ផ្នែកអក្សរ សិល្ប៍ខ្មែរ គណិតវិទ្យា រូបវិទ្យាថ្នាក់ទី៩ និងថ្នាក់ទី១២ ចាក់ទី១២ ដែលមកពី​មកពីគ្រប់គ្រឹះស្ថានមធ្យមសិក្សាសាធារណៈ និងឯកជនទូទាំងរាជធានីមានចំនួន២៤នាក់ ក្នុងនោះ យុវតី១០នាក់ ហើយសិស្សពូកែទាំងនេះ បានទៅប្រលងជ្រើសរើសសិស្សពូកែទូទាំងប្រទេស នាថ្ងៃទី២៦ ខែមេសា ឆ្នាំ២០២៥ នៅវិទ្យាល័យជាស៊ីម សន្ធម៉ុក រាជធានីភ្នំពេញ ដែលបេក្ខជនមកពីគ្រប់រាជធានី ខេត្តចំនួន២៤០នាក់។

ជា​លទ្ធផល រាជធានីភ្នំពេញ ដណ្តើមបានជ័យលាភីចំនួន​៦​នាក់ យុវតី​២​នាក់ ក្នុងនោះ មេដាយមាស​១ លើមេដាយមាសទូទាំងប្រទេស៦​នាក់ មេដាយប្រាក់​៣ លើមេដាយប្រាក់ទូទាំងប្រទេស៦ មេដាយសំរិទ្ធ ១លើមេដាយសំរិទ្ធទូទាំងប្រទេស៦ ទទួលបានវិញ្ញាបនបត្រសិស្សពូកែទូទាំងប្រទេសចំណាត់ថ្នាក់លេខ៤ ចំនួន​១​នាក់។

លោកប្រធានបន្តថា ចំពោះសម្ភារ និងការសំណេះសំណាលពីសំណាក់ឯកឧត្តមឃួង ស្រេង នាពេលនេះជាការលើកទឹកចិត្តដល់គណៈនាយកគ្រប់គ្រឹះស្ថានសិក្សា និងគណៈនាយកសាលគ្រប់កំរិតលោកគ្រូ អ្នកគ្រូនិងសិស្សានុសិស្ស ឱ្យខិតខំបង្រៀន និងរៀនបន្ថែមទៀត។ ជាការ​តបស្នងចំពោះការយកចិត្តទុកដាក់នេះជំនួសមុខឱ្យមន្ត្រីអប់រំទូទាំង រាជធានីភ្នំពេញ យើងខ្ញុំទាំងអស់គ្នា ប្តេជ្ញាចិត្តចូលរួមបំពេញការងារឱ្យកាន់តែល្អប្រសើរថែមទៀត៕