ខេត្តស្ទឹងត្រែង ៖ ទំនប់វារីអគ្គិសនី សេសានក្រោម ២ ត្រូវបានគេចាត់ទុកថា ជាទំនប់វារីអគ្គិសនីដែលធំជាងគេបំផុតនៅកម្ពុជា ដោយសារវាមានសមត្ថភាពផលិតថាមពលអគ្គិសនីបានរហូតដល់ ៤០០ មេហ្គាវ៉ាត់ (MW) ។ ក្នុងបទសម្ភាសជាមួយអ្នកសារព័ត៌មានជាតិ កាលពីពេលថ្មីៗនេះ លោក ម៉ែន គុង អភិបាលរងខេត្តស្ទឹងត្រែង បានបញ្ជាក់ជាថ្មីនូវមោទនភាពរបស់ខេត្ត ក្នុងការគ្រប់គ្រងបណ្តុំថាមពលដ៏ធំជាងគេរបស់ប្រទេស គឺ «វារីអគ្គិសនីសេសានក្រោម ២» ដែលជាឆ្អឹងខ្នងនៃស្ថិរភាពអគ្គិសនីនៅកម្ពុជា ។

យោងតាមការបញ្ជាក់របស់លោកអភិបាលរង ទំនប់វារីអគ្គិសនីមួយនេះមានសមត្ថភាពផលិតថាមពលបានរហូតដល់ ៤០០ មេហ្គាវ៉ាត់ (MW) ។ តួលេខនេះបានធ្វើឱ្យវាឈរនៅលំដាប់ថ្នាក់លេខ ១ ជាវារីអគ្គិសនីដែលធំជាងគេបំផុតនៅក្នុងព្រះរាជាណាចក្រកម្ពុជា នាំមុខវារីអគ្គិសនីស្ទឹងតាតៃ និងកំចាយ ។ គម្រោងយក្សដែលមានតម្លៃវិនិយោគប្រមាណ ៨០០លានដុល្លារអាមេរិកនេះ ត្រូវបានសាងសង់ឡើងនៅចំណុចប្រសព្វនៃទន្លេសេសាន និងទន្លេស្រែពក ក្នុងស្រុកសេសាន ខេត្តស្ទឹងត្រែង ។

លក្ខណៈពិសេសនៃទំនប់នេះរួមមាន ៖ តួប៊ីនយក្ស បំពាក់ដោយម៉ាស៊ីនផលិតអគ្គិសនីចំនួន ៨ គ្រាប់ ដែលក្នុងមួយគ្រាប់មានកម្លាំង ៥០ មេហ្គាវ៉ាត់ ។ ប្រវែងទំនប់ ជាទំនប់ប្រភេទបេតុង និងដីបំពេញ ដែលមានប្រវែងសរុបប្រហែល ៦.៥ គីឡូម៉ែត្រ ។

លោក ម៉ែន គុង បានសង្កត់ធ្ងន់ថា វត្តមាននៃវារីអគ្គិសនីសេសានក្រោម ២ មិនត្រឹមតែបម្រើដល់ការប្រើប្រាស់នៅក្នុងខេត្តស្ទឹងត្រែងប៉ុណ្ណោះទេ ប៉ុន្តែថាមពលដ៏មហាសាលនេះត្រូវបានបញ្ជូនទៅកាន់រាជធានីភ្នំពេញ និងបណ្តាខេត្តនានា ដើម្បីបម្រើដល់វិស័យឧស្សាហកម្ម និងជីវភាពប្រចាំថ្ងៃរបស់ប្រជាពលរដ្ឋ ។

វាបានដើរតួនាទីយ៉ាងសំខាន់ក្នុងការកាត់បន្ថយការនាំចូលថាមពល ពីប្រទេសជិតខាង ។ កាត់បន្ថយថ្លៃដើមអគ្គិសនី សម្រាប់ជំរុញការវិនិយោគ។ ធានាសន្តិសុខថាមពល ទោះបីជាស្ថិតក្នុងរដូវប្រាំង ដែលតម្រូវការប្រើប្រាស់កើនឡើងខ្ពស់ក៏ដោយ ។

ទន្ទឹមនឹងការផលិតថាមពល អាជ្ញាធរខេត្ត និងក្រុមហ៊ុនវិនិយោគក៏បានយកចិត្តទុកដាក់ខ្ពស់លើការគ្រប់គ្រងផលប៉ះពាល់ បរិស្ថាន និងការអភិវឌ្ឍសហគមន៍នៅតំបន់ជុំវិញ ដើម្បីធានាថាការរីកចម្រើនផ្នែកសេដ្ឋកិច្ចដើរទន្ទឹមគ្នាជាមួយនឹងការទទួលខុសត្រូវសង្គម ។

ទោះបីវាផ្តល់ផលចំណេញច្រើនខាងថាមពល ប៉ុន្តែគម្រោងនេះក៏បានបង្កឱ្យមានការ ពិភាក្សាដេញដោលច្រើនទាក់ទងនឹងផលប៉ះពាល់បរិស្ថាន និងការផ្លាស់ប្តូរទីលំនៅរបស់ប្រជាពលរដ្ឋក្នុងតំបន់ផងដែរ ៕