ទីក្រុងតូក្យូ៖ ជប៉ុនបានបង្ហោះយានអវកាសគ្មានមនុស្សជិះទៅកាន់ឋានភពរណបដ៏អាថ៌កំបាំងមួយចំនួនដែលវិលជុំវិញភពព្រះអង្គារដើម្បីប្រមូលអាចម៍ដីនៅទីនោះយកមកពិសោធ។ ស្ថាប័នអវកាសចំនួន៥រួមគ្នានៅក្នុងការបំពេញបេសកម្មរយៈពេល៥ឆ្នាំដើម្បីបញ្ជូនយានរ៉ូបូតមួយគ្រឿង និងយានយន្តមួយគ្រឿងចុះលើឋានព្រះចន្ទហ្វូបូស (Phobos) ដែលជាព្រះចន្ទធំជាងគេ និងនៅកៀកនឹងភពអង្គារជាងគេ។
ទីភ្នាក់ងារស្រាវជ្រាវអវកាសរបស់ជប៉ុនដែលជាអ្នកដឹកនាំបេសកកម្មលើកនេះបានបាញ់បង្ហោះយានអវកាសតាំងពីមុនពេលព្រឹកព្រលឹមថ្ងៃនេះចេញពីទីលានមួយកន្លែងនៅលើកោះតានេកាស៊ីម៉ា (Tanegashima)។ មួយម៉ោងបន្ទាប់មក មន្ត្រីរដ្ឋាភិបាលជប៉ុនប្រកាសអំពីការបាញ់បង្ហោះដោយជោគជ័យនូវយានអវកាសនោះចូលទៅក្នុងតារាវិថីនៅពេលយាននោះផ្ដាច់ខ្លួនចេញពីគ្រាប់រ៉ុកកែតប៉ែកខាងលើ។
ក្រុមអ្នកត្រួតពិនិត្យការបាញ់បង្ហោះនេះនាំគ្នាស្រែកហ៊ោកញ្ជ្រៀវ និងលោតកញ្ឆេងដោយក្ដីត្រេកអរចំពោះជោគជ័យលើកនេះ។ ពួកគេចាប់រលាក់ដៃគ្នា និងឱបគ្នា។ កាលពីពេលកន្លងមក អង្គការណាហ្សាបានបញ្ជូនយានអវកាសទៅចុះលើភពអង្គារចំនួន៩ដងនារយៈពេល៥០ឆ្នាំចុងក្រោយនេះ។ ចំណែកប្រទេសចិនបង្ហោះយានអវកាសទៅចុះចតកាលពីឆ្នាំ២០២១។ ប៉ុន្តែមិនទាន់មានប្រទេសណាបង្ហោះយានទៅចុះចតនៅលើព្រះចន្ទហ្វូបូសនៅឡើយទេ ហើយក៏គ្មានប្រទេសណាជីកយកអាចម៍ដីពីភពអង្គារនៅឡើយដែរ កុំថាឡើយដល់ទៅជីកយកអាចម៍ដីពីភពរណបរបស់ភពអង្គារ។
ប្រសិនបើបេសកកម្មជីកយកអាចម៍ដី ឬកម្ទេចថ្មពីភពហ្វូបូសទទួលបានជោគជ័យ យានអវកាសនឹងត្រឡប់មកផែនដីវិញនៅឆ្នាំ២០៣១។ ភពហ្វូបូសប្រៀបដូចជាផ្ទាំងថ្មមានរាងដូចដំឡូងបារាំង មានប្រវែង២២គីឡូម៉ែត្រ។ ប្រសិនបើគេអាចយកបានអ្វីមួយពីភពនេះមកពីសោធ គេអាចនឹងសិក្សាស្វែងយល់អំពីចលនាភពរណបនៃភពអង្គារ ហើយក៏អាចនឹងសិក្សាស្វែងយល់អំពីភពរណបដទៃទៀតផងដែរ។ បេសកកម្មលើកនេះចំណាយថវិកា៥៧៨លានដុល្លារ, ត្រូវគេប្រសិទ្ធនាមថា Martian Moons Exploration និងបានបញ្ជូនយានអវកាសទម្ងន់៥តោន។ គេរំពឹងថាយានអវកាសនេះនឹងហោះទៅដល់ភពអង្គារនៅរដូវក្ដៅឆ្នាំក្រោយ៕ ប្រភព៖ AP
ចែករំលែកព័តមាននេះ