ទីក្រុងកៀវ៖ ថ្ងៃនេះ រុស្ស៊ីវាយប្រហារដោយមីស៊ីល និងដ្រូនទៅលើទីតាំងស៊ីវិលនៅអ៊ុយក្រែនបណ្ដាលឱ្យស្លាប់មនុស្សយ៉ាងតិច៤នាក់។ នេះបើយោងតាមមន្ត្រីរដ្ឋាភិបាលអ៊ុយក្រែន។ ហេតុការណ៍នេះកើតឡើងស្របពេលដែលលោកហ្សេឡិនស្គីកំពុងបំពេញទស្សនកិច្ចនៅប្រទេសន័រវេដើម្បីស្វះស្វែងរកការធានាពីអាមេរិក និងអឺរ៉ុបក្នុងការជួយអ៊ុយក្រែនជាបន្តទៀត ។ ប្រេសិតពិសេសរបស់អាមេរិក លោកស្ទីវវីតខូស និងកូនប្រសារបស់លោកត្រាំ ព្យាយាមទាំងមិនជោគជ័យដើម្បីអូសទាញរុស្ស៊ី និងអ៊ុយក្រែនឱ្យខិតខំចរចាគ្នាឱ្យមានកិច្ចព្រមព្រៀងសន្តិភាព។
លោកទាំង២ត្រូវគេរំពឹងថានឹងធ្វើដំណើរទៅទីក្រុងអូស្លូ។ នេះបើយោងតាមការជូនដំណឹងពីរដ្ឋាភិបាលន័រវេ។ កូនប្រសាលោកត្រាំនឹងចូលរួមកិច្ចជំនួបតាមប្រព័ន្ធវីឌីអូពីចម្ងាយ។ នាយករដ្ឋមន្ត្រីន័រវេ និងប្រធានាធិបតីហ្វាំងឡង់ត្រៀមជួបលោកហ្សេឡិនស្គីនៅប្រទេសន័រវេ។ នៅពេលនេះ ការគាំទ្ររបស់អាមេរិកចំពោះអ៊ុយក្រែនស្ថិតនៅក្នុងភាពមិនប្រាកដប្រជាទេដោយសារទំនាក់ទំនងរវាងលោកត្រាំ និងលោកហ្សេឡិនស្គីកំពុងប្រេះឆាគ្នា។ បន្ទាប់ពីអាមេរិកបន្ធូរបន្ថយទណ្ឌកម្មរុស្ស៊ី និងឈានដល់កិច្ចព្រមព្រៀងទិញ-លក់ប្រេងម៉ាស៊ូត លោកហ្សេឡិនស្គីខឹងសម្បារយ៉ាងខ្លាំង និងរិះគន់កិច្ចព្រមព្រៀងនេះ។ ហេតុនេះ លោកត្រាំក៏មានប្រតិកម្មត្រឡប់ទៅវិញដោយអំពាវនាវឱ្យប្រជាជនអ៊ុយក្រែនទម្លាក់មេដឹកនាំរូបនេះចោល។
ក្រោយមក លោកត្រាំចោទប្រកាន់ថាលោកហ្សេឡិនស្គីមិនចង់បញ្ចប់សង្គ្រាមអ៊ុយក្រែនទេ។ លោកហ្សេឡិនស្គីថ្លែងថាលោកបានសន្ទនាគ្នាជាមួយរដ្ឋមន្ត្រីការបរទេសអាមេរិក លោករូប៊ីអូ ដែលកំពុងបំពេញទស្សនកិច្ចនៅទ្វីបអាស៊ី។ អ៊ុយក្រែនប្រើប្រាស់ជិតអស់មីស៊ីលការពារដែនអាកាសម៉ាកផេទ្រាតរបស់អាមេរិក។ មានតែមីស៊ីលនេះប៉ុណ្ណោះអាចបាញ់ទម្លាក់មីស៊ីលបាលីស្ទីករបស់រុស្ស៊ី។ លោកហ្សេឡិនស្គីស្នើសុំយ៉ាងទទូចឱ្យអាមេរិកបញ្ជូនមីស៊ីលនេះបន្ថែមទៀត។ លោកអះអាងថាមន្ទីរបញ្ចកោណពន្យារពេលបញ្ជូនមីស៊ីលនេះ ទោះបីប្រទេសដទៃទៀតបានទិញមីស៊ីលនេះរួចហើយក៏ដោយ។
នៅពេលសមរភូមិជើងគោកស្ថិតនៅក្នុងភាពមិនឈ្នះមិនចាញ់ មានន័យនៅទ្រឹងមួយកន្លែង លោកពូទីនចង់ងាកមកវាយប្រហារតាមអាកាសឱ្យបានខ្លាំងក្លាបំផុតដើម្បីឱ្យអ៊ុយក្រែនចុះចាញ់ព្រោះរុស្ស៊ីកំពុងឆ្លៀតឱកាសដែលអាមេរិកចាប់ផ្ដើមបន្ថយការគាំទ្រចំពោះអ៊ុយក្រែន។ ខាងលើនេះជាការយល់ឃើញរបស់មេដឹកនាំបស្ចិមប្រទេស និងក្រុមអ្នកវិភាគ។ ពួកអឺរ៉ុបក៏កំពុងខិតខំសម្បើមណាស់ដែរដើម្បីជួយជ្រោមជ្រែងអ៊ុយក្រែន។ ប៉ុន្តែអាវុធយុទ្ធភ័ណ្ឌសំខាន់ៗភាគច្រើនផលិតដោយអាមេរិក។ ដូចេ្នះបើអាមេរិកមិនអនុញ្ញាតឱ្យបញ្ជូនទៅអ៊ុយក្រែន ក៏ពួកគេមិនអាចបញ្ជូនទៅបានដែរ។
នៅក្នុងការវាយប្រហាររបស់រុស្ស៊ីថ្ងៃនេះ ក្រៅពីអ្នកស្លាប់ដូចរៀបរាប់ខាងលើ មនុស្ស២៧នាក់ទៀតរងរបួស។ មនុស្សបីនាក់ស្លាប់ និង៦នាក់រងរបួសនៅសង្កត់អូប៊ូគីវ (Obukhiv) នៃរដ្ឋធានីកៀវ នៅពេលរុស្ស៊ីវាយប្រហារទៅលើឃ្លាំងដាក់ឥវ៉ាន់មួយកន្លែង។ នៅសង្កាត់ប៊ូចា (Bucha) ស្ត្រីម្នាក់ស្លាប់ និង២១នាក់រងរបួស។ អគាររាប់រយខ្នងរងការខូចខាត។ រុស្ស៊ីក៏វាយប្រហារទីតាំងថាមពលរបស់អ៊ុយក្រែននៅតំបន់អូដេសា (Odesa) ផងដែរកាលពីយប់មិញ ហើយធ្វើឱ្យដាច់ភ្លើង។ សំណាងល្អ មិនមាននរណាម្នាក់រងរបួស ឬស្លាប់ទេ។ ក្រសួងការពារជាតិរុស្ស៊ីប្រកាសថាយោធារបស់ខ្លួនបញ្ជូនដ្រូនទៅវាយប្រហារទីតាំងព័ស្តុភារ កំពង់ផែ និងកប៉ាល់ដឹកទំនិញបីគ្រឿងនៅតំបន់អូដេសា។ រុស្ស៊ីក៏ទទួលរងការវាយប្រហារផងដែរ។ យោធារុស្ស៊ីបាញ់ទម្លាក់ដ្រូនរបស់អ៊ុយក្រែន១៣៦គ្រឿងនៅលើទីតាំងជាច្រើនកន្លែង។ នៅលើទីតាំងឧស្សាហកម្មមួយកន្លែងមានភ្លើងឆេះសន្ធោសន្ធៅ៕ ប្រភព៖ AP
ចែករំលែកព័តមាននេះ