រាជធានីភ្នំពេញ ៖ ក្រសួងការងារនិងបណ្តុះបណ្តាលវិជ្ជាជីវៈ នៅថ្ងៃទី២០ ខែតុលា ឆ្នាំ២០២៦ អំពាវនាវជាថ្មីដល់ប្រជាពលរដ្ឋខ្មែរ ជាពិសេសបងប្អូនអតីតពលករខ្មែរ ដែលបានត្រឡប់មកពីប្រទេសថៃ សូមកុំចំណាកស្រុកដោយខុសច្បាប់ និងចាប់យកឱកាសការងារនៅក្នុងស្រុក ខណៈបច្ចុប្បន្នឱកាសការងារនៅកម្ពុជាមានជិត ៩ម៉ឺនកន្លែង ។
លោក ស៊ុន មេសា អ្នកនាំពាក្យក្រសួងការងារនិងបណ្តុះបណ្តាលវិជ្ជាជីវៈ បានលើកឡើងថា ពលរដ្ឋខ្មែរ ជាពិសេសបងប្អូនអតីតពលករខ្មែរដែលបានត្រឡប់មកមាតុប្រទេស គួរពិនិត្យ និងចាប់យកឱកាសការងារក្នុងស្រុកឱ្យបានច្រើន ព្រោះនៅកម្ពុជាមានឱកាសការងារជាច្រើន ដែលកំពុងរងចាំបងប្អូន ទោះបីជាបងប្អូនមានបទពិសោធន៍ ឬគ្មានបទពិសោធន៍ក៏ដោយ ។
លោកមានប្រសាសន៍ថា៖ «ការធ្វើការនៅក្នុងស្រុកមិនត្រឹមតែអាចទទួលបានប្រាក់ឈ្នួល និងអត្ថប្រយោជន៍សមរម្យប៉ុណ្ណោះទេ ប៉ុន្តែថែមទាំងអាចឱ្យបងប្អូនរស់នៅជិតក្រុមគ្រួសារ កាត់បន្ថយចំណាយ ព្រមទាំងកសាងជីវភាពឱ្យកាន់តែមានស្ថិរភាពផងដែរ។ ដូច្នេះ សូមបងប្អូនដែលកំពុងត្រូវការឱកាសការងារ សូមទាក់ទងទៅលេខ ១២៩៧ ដើម្បីទទួលបានឱកាសការងារភ្លាមៗ» ។
ជាមួយគ្នានេះ អ្នកនាំពាក្យរូបនេះក៏បានអំពាវនាវឱ្យពលរដ្ឋខ្មែរបញ្ឈប់ការធ្វើចំណាកស្រុកដោយខុសច្បាប់ទៅប្រទេសថៃ ខណៈដែលប្រទេសទាំងពីរកំពុងបន្តមានអរិភាពនៅតាមបន្ទាត់ព្រំដែន ព្រោះបងប្អូនអាចប្រឈមនឹងហានិភ័យជាច្រើន រួមមានការខាតបង់ថវិកា ការចាប់ខ្លួនបញ្ជូនត្រឡប់មកប្រទេសកំណើតវិញ ការកេងប្រវ័ញ្ចកម្លាំងពលកម្ម ការមិនទទួលបានប្រាក់ឈ្នួលត្រឹមត្រូវ និងមិនមានការការពារសិទ្ធិ ប្រសិនបើកើតមានវិវាទការងារ ឬគ្រោះថ្នាក់ផ្សេងៗ ។
លោក ស៊ុន មេសា បានបន្តថា៖ «សូមបងប្អូនកុំប្រថុយធ្វើចំណាកស្រុកដោយខុសច្បាប់ តាមការបញ្ចុះបញ្ចូល ឬការសន្យាផ្តល់ការងារដែលមិនច្បាស់លាស់។ ក្រសួងសូមលើកទឹកចិត្តឱ្យបងប្អូនស្វែងរកការងារនៅក្នុងស្រុក ដែលសម្បូរបែប មានប្រាក់ឈ្នួលសមរម្យ និងអត្ថប្រយោជន៍ជាច្រើន» ។
អ្នកនាំពាក្យរូបនេះ បានលើកទឹកចិត្តឱ្យបងប្អូនអតីតពលករ ដែលមានជំនាញស្រាប់ សូមប្រើប្រាស់ជំនាញ និងបទពិសោធន៍ដែលទទួលបានពីការងារកន្លងមក ដើម្បីបន្តអាជីពនៅកម្ពុជា ។ ចំពោះអ្នកដែលត្រូវការបង្កើនសមត្ថភាព អាចស្វែងរកឱកាសបណ្តុះបណ្តាលជំនាញវិជ្ជាជីវៈ ដើម្បីបង្កើនលទ្ធភាពទទួលបានការងារសមស្រប និងមានស្ថិរភាព ។ ដោយឡែក សម្រាប់ពលរដ្ឋខ្មែរ ជាពិសេសបងប្អូនអតីតពលករ ដែលកំពុងត្រូវការឱកាសការងារ សូមទាក់ទងមកប្រព័ន្ធ Hotline ១២៩៧ ដើម្បីទទួលបានឱកាសការងារភ្លាម ៕ អត្ថបទសហការ
ចែករំលែកព័តមាននេះ