កម្ពុជាបញ្ជាក់ជាថ្មីនូវការគាំទ្រពេញលេញចំពោះដំណើរការផ្សះផ្សា ដែលខ្លួនបានផ្តួចផ្តើម និងជំនឿថា ច្បាប់អន្តរជាតិផ្តល់នូវមាគ៌ាសម្រាប់ការដោះស្រាយវិវាទជាមួយថៃ
- ភ្នំពេញ
រាជធានីភ្នំពេញ ៖ កម្ពុជាបានបញ្ជាក់ជាថ្មីនូវការគាំទ្រពេញលេញចំពោះដំណើរការផ្សះផ្សា ដែលខ្លួនបានផ្តួចផ្តើម និងមានជំនឿថា ច្បាប់អន្តរជាតិផ្តល់នូវមាគ៌ាសម្រាប់ការដោះស្រាយវិវាទរវាងកម្ពុជានិងថៃ ក៏ដូចជារវាងរដ្ឋនានា ។
យោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជាចេញផ្សាយនៅថ្ងៃទី១៩ ខែតុលា ឆ្នាំ២០២៦ របស់គណៈកម្មការផ្សះផ្សា ក្រោមអនុសញ្ញាអង្គការសហប្រជាជាតិស្តីពីនីតិសមុទ្រប្រកាសវិធានការកសាងទំនុកចិត្តរវាងកម្ពុជា និងថៃបានលើកឡើងថា តុលា ការមជ្ឈត្តការអចិន្ត្រៃយ៍ នៅថ្ងៃនេះ(ទី១៩) បានប្រកាសថា គណៈកម្មការផ្សះផ្សា ដែលត្រូវបានបង្កើតឡើងក្រោមឧបសម្ព័ន្ធទី៥នៃអនុសញ្ញាអង្គការសហប្រជាជាតិស្តីពីនីតិសមុទ្រ (UNCLOS) បានបញ្ចប់សំណុំវិធានការកសាងទំនុកចិត្តរវាងកម្ពុជា និងថៃ នៅក្នុងកិច្ចប្រជុំលើកទីពីរ នៅទីក្រុងឡាអេ ប្រទេសហូឡង់ ។
ប្រភពថា វិធានការកសាងទំនុកចិត្តទាំងនេះ មានគោលបំណងពង្រឹងការជឿទុកចិត្តគ្នាទៅវិញទៅមក បង្កើនទំនាក់ទំនង និងលើកកម្ពស់បរិយាកាសអំណោយផលសម្រាប់ការឈានដល់កិច្ចព្រមព្រៀងមួយ។ សំណុំវិធានការពេញលេញនេះ ដែលឆ្លុះបញ្ចាំងពីជំនឿរួមរបស់ភាគីទាំងពីរចំពោះការសន្ទនា និងនីតិរដ្ឋ ព្រមទាំងការប្តេជ្ញាចិត្តរបស់ពួកគេក្នុងការចូលរួមដោយស្ថាបនាក្នុងដំណើរការផ្សះផ្សា ត្រូវបានដាក់បញ្ចូលក្នុងឧបសម្ព័ន្ធ នៃសេចក្តីប្រកាសព័ត៌មានរបស់តុលាការមជ្ឈត្តការអចិន្ត្រៃយ៍។
ក្នុងចំណោមវិធានការដែលបានព្រមព្រៀងគ្នានេះ គណៈកម្មការផ្សះផ្សាបានកត់សម្គាល់ថា ការឯកភាព និងវិធានការដែលភាគីទាំងពីរធ្លាប់បានព្រមព្រៀងពីមុន មិនទាន់ត្រូវបានអនុវត្តពេញលេញនៅឡើយ ។ គណៈកម្មការផ្សះផ្សាលើកទឹកចិត្តឱ្យភាគីទាំងពីរអនុវត្តការប្តេជ្ញាចិត្តដែលនឹងជួយបង្កើតបរិយាកាសអំណោយផល សម្រាប់ការចរចាប្រកបដោយស្ថាបនាក្នុងដំណើរការផ្សះផ្សានេះ ។ ក្នុងបរិបទនេះ គណៈកម្មការផ្សះផ្សាលើក ទឹកចិត្តឱ្យភាគីទាំងពីរខិតខំដំឡើងកម្រិតតំណាងការទូតរបស់ខ្លួនដោយតែងតាំងតំណាងជាន់ខ្ពស់ម្នាក់ប្រចាំ នៅរាជធានីរបស់ភាគីម្ខាងទៀត ។
គណៈកម្មការក៏លើកទឹកចិត្តឱ្យភាគីទាំងពីរចូលរួមដោយការស្ថាបនា និងដោយបើកចំហលើទិដ្ឋភាពបច្ចេកទេសការកំណត់ព្រំដែននៅក្នុងក្រុមការងារមួយក្រោមការដឹកនាំរបស់គណៈកម្មការផ្សះផ្សា។ដោយផ្អែកលើអនុសាសន៍ខាងលើរបស់គណៈកម្មការផ្សះផ្សាភាគីទាំងពីរព្រមព្រៀងអនុវត្តសកម្មភាព ឬវិធាន ការដែលអាចជួយកសាងការជឿងទុកចិត្ត និងការជឿរជាក់រវាងគ្នាទៅវិញទៅមក រួមទាំងអ្វីដែលបានកំណត់ខាងលើ។
បន្ថែមលើនេះ ភាគីទាំងពីរទទួលស្គាល់ថា ខ្លួនមានសិទ្ធិធ្វើសេចក្តីថ្លែងការណ៍ ដើម្បីការ ពារសិទ្ធិស្របច្បាប់របស់ខ្លួន ឬកែតម្រូវព័ត៌មានមិនពិត និងព័ត៌មានបំភាន់ ។ ដើម្បីលើកកម្ពស់បរិយាកាសអំណោយផល សម្រាប់ការឈានដល់កិច្ចព្រមព្រៀងមួយ ភាគីទាំងពីរនឹងប្តេជ្ញាអនុវត្តការអត់ធ្មត់ក្នុងទំនាក់ទំនងសាធារណៈ និងការធ្វើសេចក្តីថ្លែងការណ៍នានា ដែលអាចរួមចំណែកដល់អារម្មណ៍អវិជ្ជមានរបស់សាធារណជន ឬបង្កើនភាពតានតឹងរវាងប្រជាជននៃប្រទេសទាំងពីរ ។
ជាថ្មីម្តងទៀត កម្ពុជាសូមថ្លែងអំណរគុណចំពោះគណៈកម្មការផ្សះផ្សា និងតុលាការមជ្ឈត្តការអចិន្ត្រៃយ៍ដែលបានជួយរហូតឈានទៅដល់កិច្ចព្រមព្រៀងស្តីពីវិធានការកសាងទំនុកចិត្តទាំងនេះ ។ សេចក្តីប្រកាសព័ត៌មានបញ្ជាក់ថា «កម្ពុជាសូមបញ្ជាក់ជាថ្មីនូវការគាំទ្រពេញលេញចំពោះដំណើរការផ្សះផ្សា ដែលខ្លួនបានផ្តួចផ្តើម និងមានជំនឿថា ច្បាប់អន្តរជាតិ ផ្តល់នូវមាគ៌ាសម្រាប់ការដោះស្រាយវិវាទរវាងរដ្ឋនានាដោយសន្តិវិធី» ៕
ចែករំលែកព័តមាននេះ