សុខភាព៖ យោងតាមការចុះផ្សាយពីប្រភពបរទេស របស់របរប្រើប្រាស់ប្រចាំថ្ងៃខ្លះ អាចបង្កហានិភ័យដល់សុខភាព ឬសុវត្ថិភាព ប្រសិនបើវាចាស់ ខូចខាត ឡើងផ្សិត ឬពិបាកសម្អាត។ ដូច្នេះ ការថែរក្សាផ្ទះឱ្យស្អាត មិនមែនត្រឹមតែបោសជូតប៉ុណ្ណោះទេ ប៉ុន្តែក៏គួរត្រួតពិនិត្យរបស់របរដែលប្រើរាល់ថ្ងៃ និងប្តូរនៅពេលចាំបាច់ផងដែរ។

ទីមួយ គឺជ្រញ់ដែលមានស្នាមប្រេះ ឬស្នាមកាំបិតជ្រៅ ព្រោះអាចមានកាកសំណល់អាហារជាប់ និងពិបាកសម្អាត ជាពិសេសក្រោយកាប់សាច់ឆៅ។ ទីពីរ គឺប្រអប់ប្លាស្ទិកដែលប្រេះ ប្រែទ្រង់ទ្រាយ ឬខូចខាតខ្លាំង។ គួរប្រើប្រអប់ឱ្យត្រូវតាមការណែនាំរបស់អ្នកផលិត ជាពិសេសពេលកម្ដៅអាហារក្នុងមីក្រូវ៉េវ។

ទីបី គឺអេប៉ុងលាងចានដែលមានក្លិនស្អុយ ប្រែពណ៌ ឬបែករលួយ ព្រោះសំណល់អាហារ និងសំណើមអាចជួយឱ្យមេរោគកើនឡើង។ ទីបួន គឺចង្កឹះឈើ ឬស្លាបព្រាឈើដែលប្រេះ ឡើងផ្សិត ឬមានក្លិនចម្លែកដែលសម្អាតមិនបាត់។ របស់របរទាំងនេះគួរប្តូរថ្មី ប្រសិនបើខូចខាតដល់ថ្នាក់ពិបាកធ្វើអនាម័យឱ្យបានល្អ។

ទីប្រាំ គឺខ្ទះស្រោបសារធាតុមិនឱ្យអាហារជាប់ ដែលស្រទាប់ស្រោបរបក ឬខូចខាតខ្លាំង។ ទីប្រាំមួយ គឺកន្សែងងូតទឹកដែលមានផ្សិត ឬក្លិនមិនល្អជាប់ ទោះបីបោកសម្អាតរួចក៏ដោយ។ គួរប្តូររបស់ទាំងនេះនៅពេលមិនអាចសម្អាត ឬប្រើប្រាស់បានល្អទៀត ហើយត្រូវសម្អាតនិងទុកកន្សែងឱ្យស្ងួតល្អក្រោយប្រើរាល់លើក។

ទីប្រាំពីរ គឺច្រាសដុសធ្មេញដែលសរសៃរីកបែក ឬខូចទ្រង់ទ្រាយ។ ជាទូទៅ គួរប្តូរច្រាសដុសធ្មេញរៀងរាល់ ៣ ទៅ ៤ ខែ ឬឆាប់ជាងនេះ ប្រសិនបើសរសៃច្រាសខូច។ ទីប្រាំបី គឺខ្សែភ្លើង ឬព្រីភ្លើងដែលបែកសំបក រលុង មានស្នាមឆេះ ក្តៅខ្លាំងខុសធម្មតា ឬមានក្លិនឆេះ។ ប្រសិនបើមានសញ្ញាទាំងនេះ គួរឈប់ប្រើភ្លាម និងឱ្យអ្នកជំនាញពិនិត្យ។ សូមចងចាំថា មិនចាំបាច់បោះចោលរបស់របរគ្រាន់តែដោយសារចាស់នោះទេ គួរពិនិត្យសភាពជាក់ស្តែង និងប្តូរនៅពេលវាខូចខាត ប៉ះពាល់ដល់អនាម័យ ឬបង្កគ្រោះថ្នាក់ ដើម្បីការពារសុខភាព និងសុវត្ថិភាពគ្រួសារ៕