រាជធានីភ្នំពេញ ៖ សម្ដេចធិបតី ហ៊ុន ម៉ាណែត នាយករដ្ឋមន្ដ្រីកម្ពុជា បានបញ្ជាក់ថា សម្ដេចទុកពេលឱ្យលោក អ៊ុំ សំអាន ត្រឹមដំណាច់ខែតុលានេះ ដើម្បីសម្រេចចិត្ដថា ត្រូវមកកម្ពុជាផ្ទាល់ ឬចាត់តំណាង ឬក្រុមតំណាង ដែលអាចជាអ្នកនៅក្រៅប្រទេស ឬអ្នកនៅក្នុងប្រទេសកម្ពុជាស្រាប់ក៏បាន មកចូលរួមជជែកតទល់ពីបញ្ហាព្រំដែនកម្ពុជា-ថៃ នៅចន្លោះបង្គោលលេខ៥២-៥៩ ជាមួយគ្នា ។
ការកំណត់នេះ គឺជាការឆ្លើយតបនឹងលោក អ៊ុំ សំអាន ក្រោយអ្នកនយោបាយប្រឆាំងនៅក្រៅប្រទេសរូបនេះ បានផ្ញើលិខិតជាលើកទីពីរជូនសម្ដេចនាយករដ្ឋមន្ដ្រី នាពេលថ្មីៗ ស្នើឱ្យរៀបចំកិច្ចពិភាក្សានៅដើមខែវិច្ឆិកា ខាងមុខ ។
តាមរយៈសារបង្ហោះនៅលើបណ្ដាញសង្គមហ្វេសប៊ុក នៅថ្ងៃទី១៩ ខែតុលា ឆ្នាំ២០២៦នេះ សម្ដេចធិបតី លើកឡើងទៀតថា អំឡុងពេលសម្ដេចបំពេញទស្សនកិច្ចនៅក្រៅប្រទេស លោក អ៊ុំ សំអាន បានចេញសារជាបន្ដបន្ទាប់ ប៉ុន្ដែសម្ដេចយល់ថា សារទាំងនោះហាក់ជាការនិយាយដដែលៗ គឺបង្ហាញថា លោក អ៊ុំ សំអាន មិនហ៊ានមកកម្ពុជានោះទេ ទោះបីជាមានការធានាពីសុវត្ថិភាពច្បាស់លាស់ក៏ដោយ។ ម្យ៉ាងវិញទៀត លោក អ៊ុំ សំអាន ក៏អត់មានមូលដ្ឋានភស្តុតាង ឬឯកសារព្រំដែនច្បាស់លាស់ដែរ បានត្រឹមបង្ហើបថា ភស្តុតាងរបស់លោកបានមកពីលឺគេថា, លឺតាមព័ត៌មានដូចជាអាស៊ីសេរី និងចុងក្រោយថា អត់មានអ្វីច្បាស់លាស់ទេ ទាល់តែបារាំងបានមាន។ ត្រង់ចំណុចនេះ នាយករដ្ឋមន្ដ្រីកម្ពុជា ចោទជាសំណួរថា៖ “ឆ្ងល់ដែរថា ចុះពេលដែលគាត់ចោទរាជរដ្ឋាភិបាលថាកាត់ដីឱ្យថៃ តើផ្អែកលើមូលដ្ឋានអ្វីទៅវិញចឹង ?” ។
ទន្ទឹមនេះ សម្ដេចធិបតីនៅតែមើលឃើញថា តាមរយៈសាររបស់លោក អ៊ុំ សំអាន គឺលោកព្យាយាមគេចវេះតាមរយៈការបង្កើតលក្ខខណ្ឌនានា ដើម្បីបង្វែរពីការដែលលោកត្រូវចូលមកបង្ហាញភស្តុតាង ជុំវិញការចោទរាជរដ្ឋាភិបាលថា បានកាត់ដីឱ្យថៃនៅចន្លោះបង្គោលលេខ៥២-៥៩ ទៅជាការទាមទារឱ្យលើកលែងទោសទៅវិញ។ តែទោះជាបែបនេះក្ដី នាយករដ្ឋមន្ដ្រីកម្ពុជាថា ទ្វារក៏នៅមិនទាន់បិទដែរ គឺនៅមានជម្រើសបន្ថែមមួយទៀតក្នុងករណីអ្នកនយោបាយប្រឆាំងរូបនេះ មិនហ៊ានមកផ្ទាល់។ ជម្រើសនោះ គឺអាចចាត់តាំងតំណាង ឬក្រុមតំណាង ដែលអាចជាអ្នកមកពីក្រៅប្រទេស ឬអាចជាអ្នកនៅក្នុងប្រទេសកម្ពុជាស្រាប់ក៏បាន ដើម្បីចូលមកជជែក ផ្ទៀងផ្ទាត់ បញ្ហាព្រំដែនជាមួយគ្នានៅចន្លោះបង្គោលលេខ៥២-៥៩ ។
ក្នុងករណីយល់ព្រមចាត់តាំងតំណាង ឬក្រុមតំណាងមកចូលរួម សម្ដេចថា លោ ក អ៊ុំ សំអាន ត្រូវគោរពលក្ខខណ្ឌមួយចំនួន គឺត្រូវប្រគល់សិទ្ធិពេញលេញឱ្យពួកគេជាតំណាងក្នុងការជជែក ផ្ទៀងផ្ទាត់ជាមួយក្រុមការងារព្រំដែនរបស់រាជរដ្ឋាភិបាល, ត្រូវប្រគល់រាល់ឯកសារ ភស្តុតាង និងសាក្សីទាំងអស់ ដែលមានពាក់ព័ន្ធនឹងព្រំដែនកម្ពុជា-ថៃ ចន្លោះបង្គោលលេខ៥២-៥៩ ឱ្យទៅក្រុមតំណាង ដើម្បីមានមូលដ្ឋានគ្រប់គ្រាន់ក្នុងការជជែក និងផ្ទៀងផ្ទាត់ឱ្យបានច្បាស់លាស់ នៅដើមខែវិច្ឆិកា ដូចបានស្នើសុំ។ ជាមួយគ្នា លោក អ៊ុំ សំអាន ក៏ត្រូវទទួលស្គាល់ចំពោះរាល់ខ្លឹមសាររបស់តំណាង ឬក្រុមតំណាង លើកមកជជែក ផ្ទៀងផ្ទាត់គ្នា និងត្រូវទទួលស្គាល់នូវលទ្ធផល នៃការជជែក ផ្ទៀងផ្ទាត់គ្នា ដែលតំណាង ឬក្រុមតំណាងរបស់លោកបានចូលរួម ។
សម្តេចធិបតី បន្ថែមថា សម្រាប់រាជរដ្ឋាភិបាល ស្វាគមន៍ជម្រើសមួយណាក៏បាន ពោលលោក អ៊ុំ សំអាន ដឹកនាំមកខ្លួនឯងក៏បាន (ប៉ុន្ដែដោយគ្មានលក្ខខណ្ឌ ដែលបានលើកដើម្បីដោះខ្លួននោះទេ ព្រោះសុវត្ថិភាពត្រូវបានធានារួចហើយ) ឬអាចចាត់តាំងតំណាង ឬក្រុមតំណាងរបស់លោកមកក៏បាន ។
សម្តេចសង្ឃឹមថា លោក អ៊ុំ សំអាន នឹងហ៊ានសម្រេចយកជម្រើសណាមួយ និងផ្តល់ចម្លើយត្រង់ៗក្នុងពេលឆាប់ៗ ដើម្បីជួយបញ្ចប់មន្ទិលរបស់ប្រជាពលរដ្ឋពាក់ព័ន្ធនឹងព្រំដែនចន្លោះបង្គោលលេខ៥២-៥៩ ។
ជាមួយគ្នានោះដែរ សម្ដេចសង្ឃឹមផងដែរថា លោក អ៊ុំ សំអាន មិនបង្កើតហេតុផល ឬរកលេសផ្សេងៗទៀត ដើម្បីគេចមិនចូលរួមដូចកន្លងមកនោះទេ ជាក់ស្ដែងដូចជាការទាមទារឱ្យលើកលែងទោស ។
សម្តេចលើកឡើងថា ៖ “និយាយអោយខ្លីទៅ រឿងគាត់ខ្លាចគឺមធ្យម ប៉ុន្តែងំត្រង់ថា គាត់បង្កើតលក្ខខណ្ឌ ដើម្បីធ្វើជាលេសដោះខ្លួន ហើយថែមទាំងឌឺដងទៀតផង។ ទោះជាយ៉ាងនេះក្តី ក៏ទ្វារនៅមិនទាន់បិទដែរ” ។
សម្តេចធិបតី បានបញ្ជាក់បន្ថែមថា ៖”ខ្ញុំទុកពេលអោយលោកដល់ដំណាច់ខែតុលា ដើម្បីធ្វើការសម្រេចចិត្ត និងរៀបចំក្រុមការងារ ឬចាត់តំណាង និងរៀបចំឯកសារ មកជជែក ផ្ទៀងផ្ទាត់ជាមួយគ្នា នៅដើមខែវិច្ឆិកា ដូចលោកបានស្នើសុំ។ ផ្តល់ឱកាសបន្ថែមប៉ុណ្ណេះហើយ បើលោក អ៊ុំ សំអាន នៅតែមិនហ៊ានទៀតគឺ…” ។
សម្តេចនាយករដ្ឋមន្ដ្រី បានបញ្ជាក់ច្បាស់ៗថា រាជរដ្ឋាភិបាលមានកិច្ចការច្រើនទៀត ដើម្បីប្រទេសជាតិ និងប្រជាជន រួមទាំងការងារព្រំដែនជាមួយប្រទេសថៃ ហើយសម្ដេចតែងតែអំពាវនាវឱ្យប្រជាពលរដ្ឋខ្មែរគ្រប់និន្នាការ ផ្តល់ឱកាសឱ្យរាជរដ្ឋាភិបាលដោះស្រាយបញ្ហាជាមួយភាគីថៃដោយការទទួលខុសត្រូវ ជាពិសេសនៅក្នុងដំណាក់កាល ដែលបញ្ហាព្រំដែននៅមានភាពស្មុគស្មាញ និងមិនទាន់ដោះស្រាយរួច ជាជាងត្រូវឆ្លើយឆ្លងជាមួយខ្មែរគ្នាឯងដូចជាករណីនេះ។ តែមូលហេតុ ដែលសម្ដេចត្រូវឆ្លើយតប ព្រោះការចោទប្រកាន់ពីសំណាក់លោក អ៊ុំ សំអាន មកលើរាជរដ្ឋាភិបាលថា បានកាត់ដីឱ្យថៃ នៅចន្លោះបង្គោលព្រំដែនលេខ៥២-៥៩ វាពិតជាធ្ងន់ធ្ងរពេកមិនអាចទទួលយកបាន ៕
ចែករំលែកព័តមាននេះ