ប្រទេសព័រទុយហ្គាល់ ៖ កីឡាករ Cristiano Ronaldo ត្រូវបានសហព័ន្ធកីឡាបាល់ទាត់ព័រទុយហ្គាល់ (FPF) ដាក់ពិន័យផ្អាកសកម្មភាពរយៈពេល៣០ថ្ងៃ និងជាប្រាក់ ២៥៥ អឺរ៉ូ (២៨៦ ដុល្លារអាមេរិក) ជុំវិញការចាកចេញភា្លមៗពីជំរំហ្វឹកហាត់របស់ក្រុមជម្រើសជាតិ កាលពីខែមុន។ នេះបើតាមប្រភពពី BBC ចេញផ្សាយកាលពីថ្ងៃទី១៩ ខែតុលា។
ខ្សែប្រយុទ្ធឆ្នើមវ័យ៤១ឆ្នាំរូបនេះ បានចាកចេញពីក្រុមជម្រើសជាតិព័រទុយហ្គាល់ភ្លាមៗ អំឡុងការប្រកួតពានរង្វាន់ UEFA Nations League កាលពីខែកញ្ញា បន្ទាប់ពីភាពមិនចុះសម្រុងគ្នាជាមួយលោកគ្រូបង្វឹក Jorge Jesus។
ការមើលមុខគ្នាមិនចំនេះ កើតឡើងបន្ទាប់ពីគ្រូព័រទុយហ្គាល់ សម្រេចដាក់ Ronaldo ជាកីឡាករបម្រុងមិនប្តូរឱ្យចូលលេងក្នុងជំនួបទល់នឹងន័រវែស ហើយបន្ទាប់មកបានដឹងថា ខ្លួនក៏មិនស្ថិតជាជម្រើសដំបូង សម្រាប់ប្រកួតទល់នឹងដាណឺម៉ាកថែមទៀត ទើបប្រធានក្រុមរូបនេះ ចាកចេញពីជំរំហ្វឹកហាត់ភ្លាមៗតែម្តង។
ក្រោយមក Ronaldo បានបញ្ជាក់ក្នុងសេចក្តីថ្លែងការណ៍ដ៏វែងមួយថា លោកសម្រេចចិត្តចាកចេញ ដោយសារតែលោក Jorge Jesus ធ្វើខុសពាក្យសន្យាចំនួនពីរដង និងបានចោទប្រកាន់គ្រូបង្វឹករូបនេះថា បំផ្លាញលើការទុកចិត្តទាំងស្រុង។
ការផ្អាកសកម្មភាពរបស់ខ្សែប្រយុទ្ធក្លិប Al-Nassr រូបនេះ ជាមួយក្រុមជម្រើសជាតិ មានប្រសិទ្ធភាពចាប់ពីថ្ងៃប្រកួតជាមួយដាណឺម៉ាក កាលពីថ្ងៃទី១ ខែតុលា ដែលមានន័យថា លោកបានអនុវត្តទោសពិន័យអស់រយៈពេល ១៩ ថ្ងៃរួចហើយ ហើយនឹងមិនខកខានការប្រកួតណាមួយរបស់ព័រទុយហ្គាល់ឡើយ។ ដ្បិតព័រទុយហ្គាល់ត្រូវប៉ះដាណឺម៉ាកម្តងទៀតនៅក្នុងពានរង្វាន់ Nations League នាថ្ងៃទី១៤ ខែវិច្ឆិកា មុនពេលទៅតទល់នឹងម្ចាស់ផ្ទះវែលស៍ នៅបីថ្ងៃបន្ទាប់៕ ប្រភព ៖ BBC
ចែករំលែកព័តមាននេះ