ប្រទេសបារាំង ៖ បន្ទាប់ពីបាតុកម្មពោរពេញដោយហិង្សានៅបារាំង កាលពីថ្ងៃទី១៧ តុលា ប្រទេសជាច្រើន កាលពីថ្ងៃទី១៩តុលា អំពាវនាវដល់ពលរដ្ឋពួកគេទៅបារាំងឲ្យប្រុងប្រយ័ត្ន ។ ប្រទេសទាំងនោះ លើកឡើងជាពិសេស ពីការធ្លាក់ចុះនៃលក្ខ ខណ្ឌសន្តិសុខ ។
ប្រទេសអ៉ីតាលីក្នុងសារមួយចេញ កាលពីថ្ងៃទី១៧ តុលា បានស្នើដល់ពលរដ្ឋខ្លួន ដែលបច្ចុប្បន្នកំពុងស្ថិតនៅបារាំង ឲ្យចុះឈ្មោះក្នុងបណ្ដាញវ៉ែបសាយមួយ ដើម្បីងាយស្រួលក្នុងការទាក់ទង ។ ប្រទេសនេះ បានស្នើដល់ពលរដ្ឋខ្លួនចៀសវាងកុំទៅកាន់កន្លែងមានការប្រមូលផ្ដុំមនុស្សធំៗ ហើយឲ្យប្រុងប្រយ័ត្ន ។
ចំណែកក្រសួងការបរទេសអាល្លឺម៉ង់ បានបង្កើតព្រឹត្តិប័ត្រព័ត៌មាន និងសន្តិសុខសម្រាប់បារាំង ដែលកាលពីថ្ងៃទី១៨ តុលា គូសបញ្ជាក់ថា បាតុកម្មថ្មីៗទៀតនិងការប៉ះទង្គិចគ្នាដោយហិង្សាជាយថាហេតុនាប៉ុន្មានថ្ងៃខាងមុខនេះ ។ ក្រសួងការបរទេសអាមេ
រិក ក៏ណែនាំផងដែរ នាថ្ងៃទី១៩ តុលា ដល់ពលរដ្ឋខ្លួនឲ្យចៀសវាងកុំទៅកាន់បណ្ដាតំបន់មានបាតុកម្មនៅបារាំង ហើយក៏អំពាវនាវដែរឲ្យមានការប្រុងប្រយ័ត្ន ក្នុងករណីស្ថិតនៅក្បែរកន្លែងមានការប្រមូលផ្ដុំមនុស្សធំៗ ។
នាយករដ្ឋមន្ត្រីអង់គ្លេស លោកអានឌីប៊នហាម ថ្លែងក្នុងសន្និសីទសារព័ត៌មានមួយ ដោយវាយតម្លៃថា អំពើហិង្សាដែលកើតមាននៅបារាំង មិនអាចទទួលយកបានឡើយ ។ លោកអំពាវនាវដល់បណ្ដាពលរដ្ឋអង់គ្លេសស្ថិតនៅបារាំង ឲ្យតាមដានការណែនាំរបស់អាជ្ញាធរមូលដ្ឋាន ។ ប្រទេសឆេក ក៏បញ្ជូនសារមួយដល់ពលរដ្ឋខ្លួនស្ថិតនៅបារាំង ចៀសវាងកុំចូលរួមក្នុងបាតុកម្ម ក្នុងការដើរហែក្បួន និងក្នុងការប្រមូលផ្ដុំមនុស្សនានា ។ ប៉ូឡូញក៏ស្នើដល់ពលរដ្ឋខ្លួនចៀសវាងកុំទៅក្បែរបាតុកម្មដែរ ។ ហូឡង់បានចេញការណែនាំប្រហាក់ប្រហែលគ្នានេះចំពោះពលរដ្ឋខ្លួននៅបារាំង ។ ហូឡង់ក៏ដូចជាដាណឺម៉ាក់ ស៊ុយអែត ហ្វាំងឡង់និងន័រវែសបានចេញការណែនាំប្រហាក់ប្រហែលគ្នានេះ។
ក្រសួងការបរទេសចិន និងស្ថានទូតចិនប្រចាំបារាំង អំពាវនាវដល់ពលរដ្ឋចិន ស្ថិតនៅបារាំងឲ្យពង្រឹងការប្រុងប្រយ័ត្ន ចៀសវាងកុំទៅកាន់បណ្ដាតំបន់បាតុកម្ម ។ បាតុកម្មរ៉ាំរ៉ៃនៅបារាំងតាំងពីច្រើនថ្ងៃមកហើយ ចាប់ពីបាតុកម្មរបស់សិស្សវិទ្យាល័យ និស្សិត ពួកអាវលឿងរហូតដល់បាតុកម្មប្រឆាំងទំនិញឡើងថ្លៃ កាលពីថ្ងៃទី១៧ តុលា បានប្រែក្លាយជាការបះបោរ ការវាយកម្ទេច ដុតបំផ្លាញ និងប្លន់យករបស់របរយ៉ាងអានាធិបតេយ្យ ដែលអាជ្ញាធរបារាំងចេញការព្រមានពិការបង្ក្រាប បើមានអំពើហិង្សាបែបនោះទៀត ។ ប្រធានាធិបតីអាមេរិក លោកដូណាល់ត្រាំ បានព្រមានកាលពីថ្ងៃទី១៩ តុលា ថា អាមេរិកក៏អាចផ្ទុះបាតុកម្មហិង្សាដុតបំផ្លាញដូចនៅបារាំងដែរ ក្នុងករណីគណបក្សលោកចាញ់ក្នុងការបោះឆ្នោតពាក់កណ្ដាលអាណត្តិ ៕
ចែករំលែកព័តមាននេះ