តស៊ូពីព្រលឹមទល់ព្រលប់! ក្រុមអ្នកបង់សំណាញ់ឈរលើបង្កាន់ស្ពានកម្ពស់ ១០ម៉ែត្រ ប្រឈមគ្រោះថ្នា.ក់ ដើម្បីជីវភាពគ្រួសារ
- ព្រៃវែង
ខេត្តព្រៃវែង ៖ អ្នកបង់សំណាញ់មួយក្រុមមានគ្នាប្រមាណជាង 10 នាក់ បានឈរបង់សំណាញ់នៅលើបង្កាន់ដៃស្ពាន ដែលមានកម្ពស់១០ម៉ែត្ររៀងរាល់ថ្ងៃ ដើម្បីរកប្រាក់ផ្គត់ផ្គង់ជីវភាពគ្រួសារ។
ក្រុមអ្នកនេសាទទាំងនេះ បាននាំគ្នាទៅបង់សំណាញ់រៀងរាល់ថ្ងៃ នៅលើបង្កាន់ដៃស្ពានកំពង់ខ្សាច់ ដែលស្ថិតក្នុងឃុំពោធិ៍រៀង ស្រុកពោធ៍រៀង ខេត្តព្រៃវែង ដោយពេលត្រីត្រូវខ្លាំង ចំនួនអ្នកបង់សំណាញ់មានប្រមាណជាង 20 នាក់ ហើយពេលដែលបង់លែងសូវត្រូវ ក៏ថយចុះនៅសល់ប្រមាណជាង 10 នាក់ប៉ុណ្ណោះ។
ក្រុមអ្នកបង់សំណាញ់ទាំងនេះបានឲ្យដឹងថា ពួកគាត់អ្នកខ្លះមកពីស្រុកអូរាំងឪ ខេត្តត្បូងឃ្មុំ ខ្លះមកពីក្រុងព្រៃវែង និងខ្លះទៀតជាអ្នកស្រុកនៅឃុំពោធិ៍រៀងនេះតែម្ដង ដោយពួកគាត់នាំគ្នាបង់សំណាញ់តាំងពីព្រឹកព្រលឹមរហូតដល់ព្រលប់ មេឃងងឹតមើលលែងឃើញតែម្ដង ហើយក្នុងមួយថ្ងៃគាត់អាចរកត្រីបានចន្លោះពី ៥ ទៅ ១០គីឡូ និងលក់បានលុយប្រមាណពី ១០ ទៅ ២០ម៉ឺនរៀល ហើយត្រីដែលបង់បាន មិនបាច់យកទៅលក់នៅផ្សារទេ ព្រោះមានអ្នកដំណើរមកឃើញទិញយកអស់តែម្ដង ព្រោះគេចូលចិត្តត្រីទន្លេធម្មជាតិ។
ក្រុមអ្នកនេសាទទាំងនេះបានបញ្ជាក់ថា មុខរបរនេសាទរបស់ពួកគាត់នឿយហត់ខ្លាំង និងប្រថុយគ្រោះថ្នាក់ផងដែរ ដោយឈរបង់សំណាញ់លើបង្កាន់ដៃស្ពានកម្ពស់ 10 ម៉ែត្រពីទឹក ពេលខ្លះបង់សំណាញ់ទៅ ដោយទាំងមនុស្សធ្លាក់ចូលក្នុងទឹក ឈ្លក់ស្ទើរស្លាប់ក៏មានដែរ ប៉ុន្តែចេះតែទ្រាំៗទៅ ដើម្បីជីវភាពគ្រួសារ។
គួរបញ្ជាក់ផងដែរថា ក្រុមអ្នកនេសាទក្លាហានទាំងនេះ បាននាំគ្នាមកបង់សំណាញ់នៅលើបង្កាន់ដៃស្ពានកំពង់ខ្សាច់ រយៈពេលជាងមួយខែមកហើយ ចំណែកត្រីដែលពួកគាត់បង់បានភាគច្រើនជាត្រីតូចៗប្រភេទត្រីឆ្លាំង ត្រីច្រកែង ត្រីអណ្ដែង ត្រីកេះជាដើម ហើយយូរៗក៏ចូលបានត្រីធំម្ដង ប្រភេទត្រីប្រា ត្រីពោធិ៍ និងត្រីឆ្កោកជាដើម ៕
ចែករំលែកព័តមាននេះ