សមត្ថកិច្ចចម្រុះចុះប្រមូលជនអនាថារាប់សិបនាក់ បញ្ជូនទៅមណ្ឌលសំចត និងមណ្ឌលបន្សាបគ្រឿ.ងញៀ.ន
- បាត់ដំបង
ខេត្តបាត់ដំបង ៖ ជនអនាថាមានប្រុសមានស្រីរាប់សិបនាក់ ដែលស្នាក់នៅយ៉ាងអនាធិបតេយ្យនៅក្នុងស្ថានីយរថភ្លើងក្នុងក្រុងបាត់ដំបង ត្រូវបានកម្លាំងសមត្ថកិច្ចកំពុងដើរគៀងគរប្រមូលដឹកបញ្ជូនទៅដាក់ក្នុង«មណ្ឌលសំចត»ក្នុងស្រុកសង្កែ និងមួយចំនួនបញ្ជូនទៅដាក់នៅ«មណ្ឌលបន្សាបគ្រឿងញៀន»នៅព្រឹកថ្ងៃទី២០ តុលា ។ នេះបើតាមការឲ្យដឹងពីមន្ត្រីអធិការក្រុងបាត់ដំបង ដែលកំពុងចុះប្រមូលក្រុមជនអនាថាទាំងនោះ ។
នៅក្នុងកិច្ចប្រតិបត្តិការនេះ អធិការក្រុងបាត់ដំបង លោក ពេជ្រ សារ៉ែន បានប្រាប់កោះសន្តិភាពថា គិតត្រឹមម៉ោង១០ព្រឹកថ្ងៃទី២០ តុលា នេះ កម្លាំងរបស់លោក និងកម្លាំងកងរាជអាវុធហត្ថក្រុងបាត់ដំបង បានចុះប្រមូលក្រុមជនអនាធិបតេយ្យ មានប្រុស មានស្រីបានចំនួនជាង៥០នាក់ហើយ ។
លោកថា ជនអនាថាទាំងនោះ អ្នកខ្លះទើបចេញពីមណ្ឌលកែប្រែ ឬមណ្ឌលសំចត ឬ មណ្ឌលបន្សាបគ្រឿងញៀន ហើតអ្នកខ្លះទៀតមកពីតាមបណ្ដាខេត្តផ្សេងៗ ។ ពួកគេបានមកស្នាក់នៅរាយប៉ាយនៅក្នុងស្ថានីយរថភ្លើងបែបអនាធិបតេយ្យ ។ ដូច្នេះហើយទើបលោកស្នងការខេត្ត និងលោកអភិបាលខេត្ត បញ្ជាឲ្យសមត្ថកិច្ចចុះត្រូតពិនិត្យ ដើម្បីកែសម្រូលស្ថានភាព និងសណ្ដាប់ធ្នាប់នៅក្នុងស្ថានីយរថភ្លើង ចៀសវាងបង្កឲ្យភាពអនាធិបតេយ្យ ឬអាចឈានដល់ការបង្កឲ្យមានបទល្មើសនានាកើតឡើងដោយយថាហេតុ ។
នេះមិនមែនជាលើកដំបូងទេ ដែលកម្លាំងសមត្ថកិច្ចចុះប្រមូលក្រុមជនអនាថា ដែលពុំមានប្រវត្តិច្បាស់លាស់ មកស្នាក់នៅគ្មានរបៀប គ្មានសណ្ដាប់នៅក្នុងស្ថានីយរថភ្លើង ក្នុងក្រុងបាត់ដំបង ។ កម្លាំងសមត្ថកិច្ចនៃអធិការក្រុងបាត់ដំបង ធ្លាប់ចុះប្រមូលច្រើនលើក ច្រើនសារហើយ ។ ពួកគេត្រូវបានបញ្ជូនទៅកាន់មណ្ឌលនានាទៅតាមស្ថានភាពផ្ទាល់ខ្លួនជាក់ស្ដែង ។
បើតាមការផ្ដល់ចម្លើយបឋម ពួកគេមួយចំនួនត្រូវបានគេដឹកមកពីតាមខេត្តផ្សេងៗ យកមកទម្លាក់ចោលនៅក្នុងក្រុងបាត់ដំបង រីឯអ្នកខ្លះទៀត ក៏ជាអ្នកស្នាក់នៅក្នុងស្ថានីយរថភ្លើងនេះតែម្ដង ។ ពួកគេខ្លះ ជាអ្នកប្រើប្រាស់ថ្នាំញៀន រីឯអ្នកខ្លះ ជាជនមានសតិមិនប្រក្រតី ខណៈជនខ្លះទៀត ជាជនអនាថាគ្មានប្រវត្តិច្បាស់លាស់ ហើយក៏អាចជាមុខសញ្ញាប្រព្រឹត្តបទល្មើសផងដែរ ដែលបានមកស្នាក់នៅយ៉ាងច្របូកច្របល់នៅក្នុងស្ថានីយរថភ្លើង ។
លោក ពេជ្រ សារ៉ែន អធិការក្រុងបាត់ដំបងបានបញ្ជាក់ដែរថា ពេលនេះ កម្លាំងបាននិងកំពូងដើរប្រមូលនៅឡើយ ។ ក្រោយពីប្រមូលអស់ពីក្នុងស្ថានីយរថភ្លើង យើងនឹងត្រួតពិនិត្យមើលពីស្ថានភាពពួកគេ បើជាជនមានសតិមិនប្រក្រតីត្រូវបញ្ជូនទៅដាក់ «មណ្ឌលសំចត» របស់មន្ទីរសង្គមកិច្ចខេត្ត ដែលមានទីតាំងនៅស្រុកសង្កែ ប៉ុន្តែបើជាជនប្រើប្រាស់ថ្នាំញៀន យើងនឹងបញ្ជូនទៅកាន់«មណ្ឌលបន្សាបគ្រឿងញៀន» ហើយបើមានមានជនខ្លះរកឃើញថា មានជាប់ពាក់ព័ន្ធនឹងបទល្មើសផ្សេងៗ ពួកគេអាចប្រឈមនឹងផ្លូវច្បាប់ ត្រូវចាត់ការតាមនីតិវិធី ។ ប៉ុន្តែយ៉ាងណា បើតាមលោក ពេជ្រ សារ៉ែន បានបញ្ជាក់បន្ថែមថា ពេលនេះ កម្លាំងរបស់លោកប្រមូលក្រុមជនអនាថា មានប្រុស មានស្រី បានជាង៥០នាក់ហើយ ហើយកំពុងសួរនាំ និងត្រួតពិនិត្យពីស្ថានភាពពួកគេដែរ មុននឹងបញ្ជូនពួកគេទៅដាក់តាមគោលដៅ ៕
ចែករំលែកព័តមាននេះ