ខេត្តកំពង់ស្ពឺ៖ ជនសង្ស័យម្នាក់ក្នុងចំណោមបក្ខពួក២នាក់ត្រូវបានកម្លាំងនគរបាលស្រុកភ្នំស្រួចធ្វើការឃាត់ខ្លួន ខណៈដែលជនសង្ស័យបានធ្វើសកម្មភាពលួចខ្សែភ្លើងពីក្រុមហ៊ុនកិនថ្មមួយកន្លែងដែលក្ស័យធន ហើយក៏ជិះម៉ូតូឌុបខ្សែភ្លើង ចៃដន្យអាក្រក់បានជួបជាមួយកម្លាំងនគរបាលកំពុងតែល្បាតតាមមូលដ្ឋាន។
ការឃាត់ខ្លួនជនសង្ស័យលួចខ្សែភ្លើងបានធ្វើឡើងកាលពីវេលាម៉ោង៥និង៣០នាទីល្ងាចថ្ងៃទី១៩ ខែតុលា ឆ្នាំ២០២៦ ស្ថិតនៅចំណុចក្នុងភូមិក្រាំងតាតន់ ឃុំអូរ ស្រុកភ្នំស្រួច ខេត្តកំពង់ស្ពឺ។
នគរបាលស្រុកភ្នំស្រួចបាននិយាយដឹងថាជនសង្ស័យដែលឃាត់ខ្លួនបានមានឈ្មោះ ស៊ឹម សាន ភេទប្រុស អាយុ២៤ឆ្នាំ មុខរបរមិនពិតប្រាកដ រស់នៅភូមិកាប់ទូក ឃុំព្រៃរំដួល ស្រុកភ្នំស្រួច ខេត្តកំពង់ស្ពឺ ។
នគរបាលស្រុកភ្នំស្រួចបានបន្តឲ្យដឹងទៀតថា នៅមុនពេលឃាត់ខ្លួន ជនសង្ស័យបានគឺកម្លាំងនគរបាលប៉ុស្ដិ៍ឃុំអូរ បានសហការជាមួយនគរបាលប៉ុស្ដិ៍ឃុំព្រៃរំដួល បានធ្វើការល្បាតតាមមូលដ្ឋាន និងតំបន់ងាយរងគ្រោះ លុះពេលធ្វើការល្បាតដល់ ចំណុចក្នុងភូមិក្រាំងតាតន់ ឃុំអូរ ស្រុកភ្នំស្រួច បានឃើញជនសង្ស័យម្នាក់ កំពុងជិះម៉ូតូ១គ្រឿងម៉ាកវីវ៉ា(VIVA )ពណ៌ខ្មៅ គ្មានផ្លាកលេខ ដឹកខ្សែភ្លើងចំនួន១កាតេ(មួយការ៉ុង)។
ភ្លាមៗនោះកម្លាំងនគរបាលក៏បានឃាត់ជនសង្ស័យ ហើយយកមកសាកសួរ ជនសង្ស័យបានឆ្លើយសារភាពថា ខ្សែភ្លើងដែលខ្លួនដឹកគឺបានធ្វើសកម្មភាពលួចនៅចំណុចក្នុងក្រុមហ៊ុនកិនថ្ម យីហោ ភ្នំពេញ ហ្ស៊ី ឡុង(ក្រុមហ៊ុនក្ស័យធន) ស្ថិតនៅក្នុងភូមិមាត់សាយ ឃុំតាំងស្យា ស្រុកភ្នំស្រួច ជាមួយបក្ខពួកម្នាក់ទៀតមាន ឈ្មោះ ធី ភេទប្រុស អាយុប្រហែល៣០ឆ្នាំជាង រស់នៅម្ដុំផ្សារត្រពាំងក្រឡឹង (បានរត់គេចខ្លួនបាត់ហើយ) ។
នគរបាលស្រុកភ្នំស្រួចបានបន្ថែមឲ្យដឹងទៀតថាក្រោយឃាត់ខ្លួនជនសង្ស័យនគរបាលបានធ្វើការដកហូតសម្ភារៈម៉ូតូ១គ្រឿង ម៉ាកវីវ៉ា (VIVA) ពណ៌ខ្មៅ គ្មានផ្លាកលេខ ខ្សែភ្លើងដុតរួចទម្ងន់២០គីឡូក្រាម។ ស្រាប់តែនៅវេលាម៉ោង៩និង៣០នាទីព្រឹកថ្ងៃទី២០ ខែតុលា ឆ្នាំ២០២៦ នេះ មានឈ្មោះ HUANG JIANCHUN ភេទប្រុស អាយុ៥៤ឆ្នាំ ជនជាតិចិន ស្នាក់នៅក្នុងក្រុមហ៊ុនកិនថ្ម ភ្នំពេញ ហ្ស៊ី ឡុង បានមកដាក់ពាក្យបណ្តឹងជនសង្ស័យខាងលើឱ្យសមត្ថកិច្ចអនុវត្តតាមច្បាប់។ សមត្ថកិច្ចក៏បានប្រគល់ខ្សែភ្លើងដែលដុតរួចចំនួន២០គីឡូជូនឈ្មោះ HUANG JIANCHUN វិញរួចរាល់ហើយ។
នគរបាលស្រុកភ្នំស្រួចបានបញ្ជាក់ដឹងថា ក្រោយឃាត់ខ្លួន ជនសង្ស័យរួមជាមួយនឹងវត្ថុតាងម៉ូតូ១គ្រឿង ជាមធ្យោបាយនគរបាលបានកសាងសំណុំរឿងបញ្ជូនទៅស្នងការដ្ឋាននគរបាលខេត្តកំពង់ស្ពឺដើម្បីចាត់ការបន្តតាមផ្លូវច្បាប់ ៕
ចែករំលែកព័តមាននេះ