ទីក្រុងតេអេរ៉ង់៖ ក្រុមឧទ្ទាមហ៊ូទីវាយប្រហារដោយមីស៊ីលបាលីស្ទីកទៅលើទីតាំងហ្វឹកហ្វឺនយោធាមួយកន្លែងនៅប្រទេសយេម៉េនសម្លាប់មនុស្សយ៉ាងតិច៥៨នាក់។ នេះជាការវាយប្រហារដ៏ផ្ដាច់ផ្ដិលជីវិតមនុស្សបំផុតមួយចាប់តាំងការប្រយុទ្ធគ្នាផ្ទុះឡើងកាន់តែខ្លាំងឡើងកាលពីរដូវក្ដៅឆ្នាំនេះ។ ក្រៅពីអ្នកស្លាប់ទាំងនោះ ការវាយប្រហារក៏បានបណ្ដាលឱ្យរបួសមនុស្ស២០០នាក់ផងដែរ។ ពួកគេជាទាហានដែលទើបតែជ្រើសរើសបានថ្មីៗ។
ហេតុការណ៍នេះកើតឡើងនៅខេត្តសាបវ៉ា (Shabwa)។ ក្រុមហ៊ូទីប្រកាសទទួលស្គាល់ថានេះជាស្នាដៃរបស់ខ្លួនពិតមែន។ សង្គ្រាមរវាងក្រុមហ៊ូទី និងកងទ័ពរដ្ឋាភិបាលយេម៉េនដែលទទួលស្គាល់ដោយសហគមន៍អន្តរជាតិ និងដែលមានប្រទេសអារ៉ាប៊ីសាអូឌីត និងសម្ព័ន្ធមិត្តជួយជ្រោមជ្រែងពីក្រោយខ្នងផងដែរនោះកំពុងតែរីករាលដាលយ៉ាងខ្លាំងបន្ថែមពីលើសង្គ្រាមអុីរ៉ង់ដែលចាប់ផ្ដើមតាំងពីចុងខែកុម្ភៈ និងដែលមិនទាន់បិទបញ្ចប់ទៅវិញនៅឡើយទេ។
ក្រុមហ៊ូទីកំពុងបង្ហាញថាពួកគេកាន់តែមានសមត្ថភាពយោធាខ្លាំងឡើងៗ អាចវាយប្រហារលើច្រើនសមរភូមិនៅក្នុងពេលតំណាលគ្នានាប៉ុន្មានសប្ដាហ៍ចុងក្រោយនេះ។ ពួកគេបន្តវាយប្រហារម្ដងហើយម្ដងទៀតទៅលើអាកាសយានដ្ឋានអន្តរជាតិរបស់ប្រទេសអារ៉ាប៊ីសាអូឌីតដែលមានចម្ងាយរាប់រយម៉ាយពីទីតាំងរបស់ពួកគេ និងវាយដណ្ដើមកាន់កាប់ទីតាំងនៅក្នុងប្រទេសយេម៉េនក្បែរច្រកចេញចូលផ្លូវដឹកជញ្ជូនទំនិញតាមកប៉ាល់ដ៏សំខាន់មួយ។
នៅពេលមានសញ្ញាថាការវាយប្រហាររបស់ហ៊ូទីអាចនឹងប៉ះពាល់សង្គមរបស់អារ៉ាប៊ីសាអូឌីត ប្រទេសនេះក៏សម្រេចលុបចោលកិច្ចប្រជុំស្ដីពីការវិនិយោគជាសាកលដែលគ្រោងធ្វើនៅសប្ដាហ៍ក្រោយ។ អារ៉ាប៊ីសាអូឌីតចេញបញ្ជាឱ្យសាលារៀននៅទីក្រុងរីយ៉ាត និងជុំវិញទីក្រុងនោះបន្តបង្រៀនតាមអនឡាញ។ អុីរ៉ង់ និងសម្ព័ន្ធមិត្តរបស់ខ្លួននៅលីបង់ និងអុីរ៉ាក់បន្តផ្ដល់ជំនាញ ការហ្វឹកហ្វឺន និងអាវុធយុទ្ធភ័ណ្ឌទំនើបៗទៅឱ្យក្រុមហ៊ូទី។ នេះបើយោងតាមអង្គការសហប្រជាជាតិ និងក្រុមអ្នកជំនាញ។ បើដូច្នេះមែន មានន័យថាអុីរ៉ង់ធ្វើខុសពីបម្រាមរបស់ UN ស្ដីពីការចែកចាយអាវុធ។ ប៉ុន្តែអុីរ៉ង់តែងតែប្រកែកអំពីរឿងនេះ៕ ប្រភព៖ AP, BBC
ចែករំលែកព័តមាននេះ