ខេត្តមណ្ឌលគិរី ៖ កម្លាំងមន្ត្រីឧទ្យាននុរក្ស និងភ្នាក់ងារល្បាត នៃដែនជម្រកសត្វព្រៃស្រែពក សរុបចំនួន ១២រូប (ភ្នាក់ងារល្បាត ៨រូប) បានចុះប្រតិបត្តិការទប់ស្កាត់ និងបង្ក្រាបបទល្មើសធនធានធម្មជាតិភ្លាមៗ នៅថ្ងៃទី២០ ខែតុលា ឆ្នាំ២០២៦នេះ បន្ទាប់ពីទទួលបានព័ត៌មានរាយការណ៍ពីប្រជាពលរដ្ឋមកកាន់ស្នាក់ការណាំរ៉ាម ។
យោងតាមប្រភពរាយការណ៍ពីប្រជាពលរដ្ឋនៅវេលាម៉ោង៨:៣០នាទីព្រឹក បានឱ្យដឹងថា មានសកម្មភាពកាប់រំលំដើមឈើដើម្បីកាត់យកស្វា នៅចំណុចដៃអូរជីមីស ស្ថិតក្នុងភូមិពូជ្រៃចុងផាង(ដេអេ) ឃុំពូជ្រៃ ស្រុកពេជ្រាដា ខេត្តមណ្ឌលគិរី។ ក្រោយទទួលបានព័ត៌មានភ្លាម ក្រុមការងារបានចេញប្រតិបត្តិការយ៉ាងក្តៅគគុក និងបានទៅដល់ទីតាំងកើតហេតុនៅវេលាម៉ោង ១០:៣៥នាទីព្រឹកនាថ្ងៃដដែល ។
តាមការពិនិត្យ និងត្រួតពិនិត្យជាក់ស្តែងនៅជុំវិញកន្លែងកើតហេតុ ក្រុមការងារពុំបានជួបប្រទះឃើញជនសង្ស័យនោះឡើយ ដោយជនល្មើសបានគេចខ្លួនបាត់ ប៉ុន្តែនៅទីតាំងនោះមានបន្សល់ទុកនូវស្លាកស្នាម និងដាននៃការកាត់រំលំដើមឈើថ្មីៗជាច្រើនដើម ។
ពាក់ព័ន្ធនឹងករណីនេះ លោក ហាស់ វិបុល ប្រធានមន្ទីរបរិស្ថានខេត្តមណ្ឌលគិរី បានមានប្រសាសន៍គូសបញ្ជាក់អំពីផលលំបាករបស់មន្ត្រីជំនាញក្នុងការចុះទប់ស្កាត់ និងបង្ក្រាបបទល្មើសធនធានធម្មជាតិថា៖ «ការចុះល្បាត និងបង្ក្រាបបទល្មើសព្រៃឈើនៅតំបន់ការពារធម្មជាតិជួបប្រទះនូវផលលំបាកជាច្រើន ដោយសារភូមិសាស្ត្រមានផ្ទៃដីធំល្វឹងល្វើយ ផ្លូវធ្វើដំណើរលំបាកស្មុគស្មាញ ជាពិសេសនៅរដូវវស្សា។ បន្ថែមពីនេះ ជនល្មើសតែងតែលួចធ្វើសកម្មភាពនៅតាមតំបន់ឆ្ងាយៗ និងមានការប្រុងប្រយ័ត្នខ្ពស់ ដោយពួកគេតែងតែគេចខ្លួនភ្លាមៗនៅពេលដឹងថាមន្ត្រីចុះទៅដល់។ ទោះជាយ៉ាងណាក៏ដោយ មន្ត្រីឧទ្យាននុរក្ស និងអាជ្ញាធរពាក់ព័ន្ធទាំងអស់ នៅតែខិតខំប្តេជ្ញាចិត្តពង្រឹងការល្បាត ទប់ស្កាត់ និងស្រាវជ្រាវស្វែងរកមុខសញ្ញាជនល្មើស មកផ្តន្ទាទោសតាមច្បាប់ជាធរមាន ដោយមិនលើកលែងឡើយ»។
បច្ចុប្បន្ន ក្រុមការងារដែនជម្រកសត្វព្រៃស្រែពក កំពុងបន្តស្រាវជ្រាវប្រមូលព័ត៌មានបន្ថែម ដើម្បីកំណត់មុខសញ្ញាជនល្មើស និងចាត់វិធានការតាមនីតិវិធីច្បាប់៕
ចែករំលែកព័តមាននេះ