ម៉ូតូ២គ្រឿងបុ.កគ្នាខ្ទា.តចូលក្រោមរថយន្តធុនធំ កិ.នស្លា.ប់ម្នាក់ របួសធ្ង.ន់ម្នាក់ អ្នកបើករថយន្តរត់គេចខ្លួនបាត់
- កំពង់ស្ពឺ
ខេត្តកំពង់ស្ពឺ៖ មនុស្សម្នាក់បានស្លាប់ភ្លាមៗនៅនឹងកន្លែងកើតហេតុ ហើយមនុស្សម្នាក់ទៀតបានរងរបួសធ្ងន់ធ្ងរត្រូវបានដឹកបញ្ជូនយកទៅសង្គ្រោះព្យាបាលនៅមន្ទីរពេទ្យភ្លាមៗ ក្នុងហេតុការណ៍គ្រោះថ្នាក់ចរាចរណ៍រវាងម៉ូតូ២គ្រឿងបុកគ្នាពេញទំហឹងខ្ទាតចូលក្រោមរថយន្តធុនធំបុកកិនពីលើ។
ហេតុការណ៍គ្រោះថ្នាក់ចរាចរណ៍ខាងលើបង្កឱ្យមានការភ្ញាក់ផ្អើល កាលពីវេលាម៉ោង៦និង២៨នាទីព្រលប់ថ្ងៃទី១៩ ខែតុលា ឆ្នាំ២០២៦ នៅលើកំណាត់ផ្លូវជាតិលេខ៤ ចន្លោះបង្គោលគីឡូម៉ែត្រលេខ៦៣ ទៅលេខ៦៤ ស្ថិតនៅក្នុងភូមិក្រាំងល្ហុង ឃុំមហាសាំង ស្រុកភ្នំស្រួច ខេត្តកំពង់ស្ពឺ។
នគរបាលស្រុកភ្នំស្រួចបាននិយាយឲ្យដឹងថា នៅមុនពេលកើតហេតុ មានម៉ូតូ១គ្រឿងម៉ាក ហុងដាសេ១២៥ ស៊េរីឆ្នាំ២០១៥ ពណ៌ខ្មៅ ពាក់ផ្លាកលេខភ្នំពេញ 1FH-3704 អ្នកបើកបរមិនស្គាល់អត្តសញ្ញាណ បានបើកបរតាមបណ្ដោយផ្លូវជាតិលេខ៤ ពីទិសខាងកើតទៅទិសខាងលិច នោះពេលធ្វើដំណើរមកដល់ចំណុចកើតហេតុខាងលើ បានបុកជាមួយម៉ូតូ១គ្រឿង ម៉ាកហុងដាវ៉េវ ពណ៌ទឹសមុទ្រ គ្មានផ្លាកលេខ អ្នកបើកបរមិនស្គាល់អត្តសញ្ញាណ ដែលកំពុងបើកបរបញ្ច្រាសទិសគ្នា រួចបត់ឆ្លងផ្លូវពីទិសខាងត្បូងទៅទិសខាងជើងពេញទំហឹង។ រួចហើយម៉ូតូទាំង២គ្រឿងបានខ្ទាតទៅចូលរថយន្ត១គ្រឿង ម៉ាកHYUDAI ពណ៌ស ពាក់ផ្លាកលេខកំពង់ស្ពឺ3A-2041 សណ្ដោងសឺមីរ៉ុម៉ក ពាក់ផ្លាកលេខ កណ្តាល4A-0038 អ្នកបើកបរមិនស្គាល់អត្តសញ្ញាណ(បានរត់គេចខ្លួនក្រោយកើតហេតុ) ដែលកំពុងបើកបរពីទិសខាងលិចទៅទិសខាងកើត បណ្តាលឱ្យ កិនស្លាប់បុរសម្នាក់(មិនស្គាល់អត្តសញ្ញាណ)នៅកន្លែងកើតហេតុ ហើយបុរសម្នាក់ទៀត បានរងរបួសធ្ងន់ធ្ងរ។
នគរបាលស្រុកភ្នំស្រួចបានបន្តឲ្យដឹងទៀតថា ក្រោយកើតហេតុនគរបាលបានចុះធ្វើការវាស់វែង ហៅរថយន្តដឹកមនុស្សដែលរងរបួសទៅសង្គ្រោះព្យាបាលនៅមន្ទីរពេទ្យ។ ចំណែកសពបុរសម្នាក់ដឹកយកទៅតម្កល់នៅវត្តមួយក្បែរកន្លែងកើតហេតុ។
ចំពោះរថយន្ត១គ្រឿងរងការខូចខាតស្រាល ចំណែកម៉ូតូចំនួន២គ្រឿងរងការខូចខាតកម្រិតធ្ងន់ ។
វត្ថុតាងទាំង៣គ្រឿងនគរបាលជំនាញបានអូសយកទៅរក្សាទុកនៅអធិការដ្ឋាននគរបាលស្រុកភ្នំស្រួច ដើម្បីកសាងសំណុំរឿងចាត់ការបន្តតាមផ្លូវច្បាប់នៅពេលក្រោយ ៕
ចែករំលែកព័តមាននេះ