សាខាកាកបាទក្រហមខេត្តស្ទឹងត្រែង ចុះប្រគល់ស្បៀង និងសម្ភារជួយសម្រាលបន្ទុកគ្រួសារចិញ្ចឹមក្មេងកំព្រា
- ស្ទឹងត្រែង
ខេត្តស្ទឹងត្រែង៖ ក្រុមការងារសាខាកាកបាទក្រហមកម្ពុជាប្រចាំខេត្តស្ទឹងត្រែង ដឹកនាំដោយលោក សាយ ព្រលឹង នាយកសាខា បានចុះជួបសួរសុខទុក្ខ និងប្រគល់ជំនួយសង្គ្រោះបន្ទាន់ជូនគ្រួសារជួបការលំបាកមួយ ស្ថិតនៅតំបន់អូរឈើទាល ភូមិកាំងមេម៉ាយ សង្កាត់ព្រះបាទ ក្រុងស្ទឹងត្រែង កាលពីព្រឹកថ្ងៃទី២២ ខែវិច្ឆិកា ឆ្នាំ២០២៦។
គ្រួសារទទួលផលពីសកម្មភាពមនុស្សធម៌នេះ រួមមាន ក្មួយស្រី គុណ សុខឡា អាយុ ២៥ឆ្នាំ និងស្វាមីឈ្មោះ ឈុន សុខគា អាយុ ២៦ឆ្នាំ ដែលកំពុងទទួលបន្ទុកមើលថែក្មេងកំព្រាឪពុកម្តាយចំនួន ៣នាក់ ក្នុងស្ថានភាពជីវភាពខ្វះខាតប្រចាំថ្ងៃ។
នាឱកាសនោះ លោកនាយកសាខា បានពាំនាំប្រសាសន៍ផ្តាំផ្ញើ និងការគិតគូរពី ឯកឧត្តម សរ សុពុត្រា អភិបាលខេត្តស្ទឹងត្រែង និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត ដែលតែងតែយកចិត្តទុកដាក់ដោះស្រាយទុក្ខលំបាករបស់ពលរដ្ឋ ជាពិសេសក្រុមគ្រួសារងាយរងគ្រោះ ដោយគោរពតាមគោលការណ៍មនុស្សធម៌ មិនប្រកាន់និន្នាការនយោបាយ ជាតិសាសន៍ ពណ៌សម្បុរ ឬវណ្ណៈឡើយ។
ទន្ទឹមនឹងការផ្តល់ជំនួយលោក សាយ ព្រលឹង ក៏បានជំរុញឱ្យប្តីប្រពន្ធម្ចាស់ផ្ទះបន្តមើលថែទាំប្អូនៗកំព្រាទាំងបីឱ្យកាន់តែកក់ក្តៅ និងផ្តល់ដំបូន្មានដល់ក្មេងៗឱ្យតាំងចិត្តរៀនសូត្រ ដើម្បីត្រៀមខ្លួនកសាងជីវិតរុងរឿងទៅថ្ងៃអនាគត។
ចំពោះគ្រឿងឧបភោគបរិភោគ និងសម្ភារៈប្រើប្រាស់ដែលបានប្រគល់ជូននាពេលនោះ មានដូចជា៖ អង្ករ ៣០គីឡូក្រាម មី ១កេស ត្រីខ ១យួរ ទឹកត្រី ១យួរ មុង ២ ភួយ ៣ ខ្នើយ ៣ និងកន្ទេល ៣៕



ចែករំលែកព័តមាននេះ