ទណ្ឌិតចំនួន ២រូប នៅពន្ធនាគារខេត្តស្ទឹងត្រែង ទទួលបានការបន្ធូរបន្ថយ និងលើកលែងទោ.ស នាឱកាសបុណ្យប្រពៃណី
- ស្ទឹងត្រែង
ខេត្តស្ទឹងត្រែង៖ ទណ្ឌិតចំនួន ២រូប នៅពន្ធនាគារខេត្តស្ទឹងត្រែង ត្រូវបានប្រកាសទទួលការបន្ធូរបន្ថយទោស និងលើកលែងទោស តាមព្រះរាជក្រឹត្យ លេខ នស/រកត/១១២៦/១០៨៤ ក្នុងឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៦ បន្ទាប់ពីបង្ហាញពីការកែប្រែឥរិយាបថ និងគោរពវិន័យបានល្អក្នុងអំឡុងពេលអនុវត្តទោស។
ពិធីប្រកាសព្រះរាជក្រឹត្យនេះ ត្រូវបានរៀបចំឡើងនៅថ្ងៃទី២២ ខែវិច្ឆិកា ឆ្នាំ២០២៦ នៅបរិវេណពន្ធនាគារខេត្តស្ទឹងត្រែង ដឹកនាំរៀបចំដោយលោកឧត្តមអគ្គានុរក្សថ្នាក់លេខ២ លីម វាសនា ប្រធានពន្ធនាគារខេត្តស្ទឹងត្រែង ក្រោមអធិបតីភាពលោក ហ៊ុន សុភាព ព្រះរាជអាជ្ញារង តំណាងព្រះរាជអាជ្ញា នៃអយ្យការអមសាលាដំបូងខេត្តស្ទឹងត្រែង ព្រមទាំងមានការចូលរួមពីមន្ត្រីជំនាញ និងភាគីពាក់ព័ន្ធផងដែរ។
យោងតាមខ្លឹមសារនៃព្រះរាជក្រឹត្យ លេខ នស/រកត/១១២៦/១០៨៤ ការផ្តល់ការបន្ធូរបន្ថយទោស និងការលើកលែងទោស ក្នុងឱកាសបុណ្យជាតិប្រពៃណី មិនមែនធ្វើឡើងដោយស្វ័យប្រវត្តិចំពោះទណ្ឌិតគ្រប់រូបនោះទេ ប៉ុន្តែផ្អែកលើការវាយតម្លៃជាក់ស្តែងពីការកែប្រែខ្លួន ការចូលរួមកម្មវិធីអប់រំ ការគោរពបទបញ្ជាផ្ទៃក្នុងពន្ធនាគារ និងលក្ខខណ្ឌកំណត់ដោយ
ច្បាប់។
ថ្លែងក្នុងពិធីនោះ តំណាងអយ្យការ និងថ្នាក់ដឹកនាំពន្ធនាគារ បានលើកទឹកចិត្តដល់ទណ្ឌិតដែលទទួលបានការបន្ធូរបន្ថយ និងលើកលែងទោស ឱ្យយកឱកាសនេះទៅកសាងជីវិតថ្មីប្រកបដោយសេចក្តីថ្លៃថ្នូរ គោរពច្បាប់រដ្ឋ និងត្រឡប់ទៅរួមរស់ជាមួយក្រុមគ្រួសារ និងសហគមន៍វិញ ក្នុងនាមជាពលរដ្ឋល្អ។ ទន្ទឹមនេះ មន្ត្រីជំនាញក៏បានជំរុញលើកទឹកចិត្តដល់ទណ្ឌិតដទៃ
ទៀត ដែលកំពុងបន្តអនុវត្តទោស ឱ្យខិតខំកែប្រែឥរិយាបថ និងចូលរួមការងារកែប្រែឱ្យបានល្អ ដើម្បីមានសិទ្ធិទទួលបានការពិចារណានៅពេលក្រោយៗទៀត។
ជាទូទៅ នៅកម្ពុជា ការបន្ធូរបន្ថយទោស និងការលើកលែងទោស ជាយន្តការមនុស្សធម៌ និងគោលនយោបាយកែប្រែរបស់រដ្ឋ ដែលត្រូវបានរៀបចំឡើងជាប្រចាំក្នុងឱកាសពិធីបុណ្យជាតិធំៗ ដូចជា បុណ្យចូលឆ្នាំថ្មីប្រពៃណីជាតិ បុណ្យភ្ជុំបិណ្ឌ និងបុណ្យអុំទូក បណ្តែតប្រទីប និងសំពះព្រះខែ អកអំបុក ដើម្បីផ្តល់ក្តីសង្ឃឹម និងជំរុញទឹកចិត្តដល់អ្នកជាប់ឃុំឱ្យកែប្រែខ្លួនប្រសើរឡើង៕





ចែករំលែកព័តមាននេះ