រាជធានីភ្នំពេញ ៖ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងអ្នកនាំពាក្យក្រសួងសុខាភិបាល បានថ្លែងឱ្យដឹងនារសៀលថ្ងៃទី៩ ខែមករា ឆ្នាំ២០២២ នេះថា មានអ្នកពាក់ព័ន្ធផ្ទាល់ចំនួន៦នាក់ជាមួយនឹងបុរសខ្មែរដែលមានវ័យ២៣ឆ្នាំ ហើយជាអ្នកជំងឺកូវីដ-១៩ ប្រភេទបំប្លែងថ្មី «អូមីក្រុង» និងក្រសួងកំពុងរង់ចាំលទ្ធផលសំណាកពីមន្ទីរពិសោធន៍ ។
លោកជំទាវវេជ្ជបណ្ឌិត ឱ វណ្ណឌីន បានថ្លែងបន្តថា ករណីបុរសជនជាតិខ្មែរ ដែលមានវ័យ ២៣ ឆ្នាំ ហើយដែលក្រសួងសុខាភិបាល បានប្រកាសព័ត៌មានជូនកាលពីយប់ថ្ងៃទី៨ ខែមករា ឆ្នាំ២០២២ កន្លងទៅនេះ គឺជាករណីដែលយើងរកឃើញជាដំបូង ឆ្លងវីរុសកូវីដ-១៩ បំប្លែងថ្មីប្រភេទ «អូមីក្រុង» នៅក្នុងសហគមន៍របស់យើង ។
លោកជំទាវវេជ្ជបណ្ឌិត ឱ វណ្ណឌីន បន្តថា «បុរសជនជាតិខ្មែររូបនេះ គាត់អត់មានប្រវត្តិធ្វើដំណើរពីបរទេសអ្វីទេ គឺគាត់បានធ្វើដំណើរនៅក្នុងតែព្រះរាជណាចក្រកម្ពុជារបស់យើងទេ ដូចសេចក្តីជូនព័ត៌មានក្រសួងសុខាភិបាលបានផ្សាយជូនហើយ» ។
លោកជំទាវវេជ្ជបណ្ឌិត អ្នកនាំពាក្យរូបនេះបន្តថា «ប៉ុន្តែអ្វីដែលជាការសំខាន់នោះ គាត់បានរួមដំណើរជាមួយនឹងបងប្អូនជីដូនមួយរបស់គាត់ ដែលបងប្អូនជីដូនមួយរបស់គាត់នេះ មកពីប្រទេសអូស្ត្រាលី កាលពីថ្ងៃទី២៧ ខែធ្នូ ឆ្នាំ២០២១ កន្លងទៅនេះ ។ ហើយគាត់បានដើរលេងជាមួយគ្នា ។ ហើយបច្ចុប្បន្ននេះ បងប្អូនជីដូនមួយរបស់គាត់ ក៏៏ស្ថិតនៅក្រោមការតាមដាន និងធ្វើតេស្តវិភាគ ដែលយើងមិនទាន់ទទួលបាននូវលទ្ធផលនូវឡើយ ។ យើងកំពុងតែរង់ចាំលទ្ធផលវិភាគ ។ រីឯនៅរាជធានីភ្នំពេញ គឺមានតែ២នាក់ដែលមានប៉ះពាល់ផ្ទាល់ជាមួយគាត់ ហើយក៏កំពុងរង់ចាំលទ្ធផលពីមន្ទីរពិសោធន៍» ។
«ហើយក្រសួងសុខាភិបាល ក៏បានចាត់ចែងដើម្បីធ្វើការស្រាវជ្រាវហើយ ទៅតាមទីតាំង ដែលបុរសដែលយើងបានរកឃើញថា មានវីរុស កូវីដ-១៩ អូមីក្រុងនេះ នៅតាមទីកន្លែងមួយចំនួន ។ នៅក្នុងនេះ គឺយើងបានស្រាវជ្រាវឃើញថា អ្នកដែលមានប៉ះពាល់ផ្ទាល់ជាមួយគាត់ នៅខេត្តកំពត ពីព្រោះផ្ទះសម្បែងរបស់គាត់ គឺនៅខេត្តកំពត ហើយនៅទីនោះ យើងមាន៣នាក់កំពុងស្ថិតនៅក្រោមការតាមដាន និងវិភាគសំណាកពីមន្ទីរពិសោធន៍ដែរ យើងកំពុងរង់ចាំលទ្ធផលដែរ» ។
ហើយនៅឯរាជធានីភ្នំពេញនេះវិញ ក៏មានអ្នកប៉ះពាល់ផ្ទាល់ចំនួន២រូប និងកំពុងរង់ចាំលទ្ធផលផងដែរ ។ គួររំលឹកថា ៖ សូមបង្កើនការប្រុងប្រយ័ត្ន! អូមីក្រុង ឆ្លងចូលក្នុងសហគមន៍ហើយ! ទើបរកឃើញម្នាក់ នៅទួលសង្កែ ៕
ចែករំលែកព័តមាននេះ